بۇل جولعى جولداۋدا مەملەكەت باسشىسىنىڭ «بالالارعا ارنالعان ۇلتتىق قور» باعدارلاماسىن ىسكە قوسۋ تۋرالى يدەياسى ۇنادى. كامەلەتتىك جاسقا تولعاننان كەيىن جيناقتالعان سوما تۇرعىن ءۇي ساتىپ الۋعا جانە ءبىلىم الۋعا جۇمسالادى. جالپى, بۇل باستاما ونشاقتى جىل اياسىندا ەلىمىزدە كەدەيلىكتىڭ شەگىندە تۇرعان كوپبالالى وتباسىلار جاعدايىن جاقسارتادى. وسى ارقىلى قازاقستان حالىقتىڭ بارىنە بىردەي تەڭ مۇمكىندىكتەر جاساۋعا جاقىنداي تۇسەدى.
مەملەكەت باسشىسىنىڭ مەكتەپكە دەيىنگى ءبىلىم بەرەتىن ۇيىمدى ەمەس, تاربيەشىنى اتتەستاتتاۋدان وتكىزۋ تۋرالى پىكىرى دە وسى سالا ماماندارىنىڭ ويىن ءدوپ باستى. شىنىمەن دە, بالامەن تىكەلەي جۇمىس ىستەيتىن تاربيەشىلەردى اتتەستاتتاماي, ءىس العا باسپايدى. بىراق بالاباقشا قۇرىلتايشىسى رەتىندە مەن تاربيەشىلەرگە قويىلاتىن تالاپتاردىڭ قازىرگى زامانعا ساي جانە ناقتى ىسكە قاتىستى ەكەندىگىنە سەنىمدى بولۋىم كەرەك. قازىرگى مەكتەپكە دەيىنگى ۇيىمداردا جۇمىس ىستەيتىن كادرلاردىڭ تەڭ جارتىسىنان استامى ءبىلىم, تاجىريبە جاعىنان اقساپ تۇر. سوندىقتان دا تاربيەشىلەر ءۇشىن اتتەستاتتاۋعا دەيىن بىلىكتىلىگىن ارتتىراتىن تەگىن كۋرستار ۇيىمداستىرىلعانى ءجون. ويتپەگەن جاعدايدا ءبىز كادرلاردىڭ تەڭ جارتىسىنان ايىرىلىپ, بالامەن جۇمىس ىستەيتىن ادام تاپپاي قالۋىمىز عاجاپ ەمەس.
قالالىق ءماسليحات دەپۋتاتى رەتىندە مەن قازاقستان رەسپۋبليكاسى پرەزيدەنتىن كەزەكتەن تىس سايلاۋ جونىندەگى باستامانى دا قولدايمىن. سونىمەن قاتار 2023 جىلى وتەتىن ءماسليحاتتار سايلاۋىندا ەل سەنىمىن ارقالاۋعا دايىنمىن. ال سايلاۋلار ءادىل ءوتۋى كەرەك. بۇل – ەلدىڭ ەرتەڭگى كۇنگە دەگەن ءۇمىتى مەن سەنىمى.
انار ىزدەن,
«وبلىستىق ۇەۇ اليانسى اسسوتسياتسياسى» قاۋىمداستىعىنىڭ ءتورايىمى,
قالالىق ءماسليحات دەپۋتاتى
