ول – سانالى عۇمىرىن قاراپايىم حالىقتىڭ كوزىن اشۋعا ۇمتىلعان جان, قازاقتان شىققان اتاقتى اعارتۋشى. ءوزىنىڭ وتكىر ءتىلدى ولەڭدەرى, جىر-جيناقتارى ارقىلى حالقىنىڭ قۇلاعىنا ماسا بولىپ ىزىڭداپ, ۇيىقتاپ جاتقان حالىقتى وياتۋعا تالپىنىپ, بولاشاققا زەر سالۋدى ناسيحاتتادى.
ۇلت ۇستازى سونداي-اق اراب جازۋى نەگىزىندە جاسالعان تۇڭعىش ءالىپبيدىڭ دۇنيەگە كەلۋىنە دە سەبەپشى بولدى. ول ءالىپبي ءالى كۇنگە دەيىن ءوزىنىڭ ماڭىزىن جويماي, قۇندى دۇنيە رەتىندە باعالانىپ وتىر. ال ء«تىل – قۇرال» – ءىزاشار وقۋلىق. وندا تەك جازىلۋ, وقىلۋ ەملەسى عانا كورسەتىلىپ قويماي, ناقتى دالەلدەرمەن انىقتامالار, گرامماتيكالىق ەرەجەلەر, تەرميندەر كەڭىنەن قاراستىرىلعان. مىسالى, زات ەسىم, سىن ەسىم, ەتىستىك, ەسىمدىك, وداعاي, ۇستەۋ, باستاۋىش, بايانداۋىش, پىسىقتاۋىش, شىلاۋ, ءسوز تاپتارى, سويلەم, قۇرمالاس سويلەم, قاراتپا سوزدەر, ت.ب. ناقتى انىقتامالار بەرىلىپ, وسىنىڭ ءبارى ساۋات اشۋعا نەگىز قالاعان.
تالاي جاننىڭ ومىرىنە شۋاق بولىپ شاشىلىپ, تالاي جاننىڭ شامشىراعىن جاعۋعا ىقپال ەتكەن ازامات تەك ءبىلىم سالاسىندا عانا وراسان تەر توگىپ قويماي, باسپا ءىسىنىڭ دامۋىنا دا ۇلكەن كومەگىن تيگىزدى. تۇڭعىش جالپىۇلتتىق «قازاق» گازەتىنىڭ جارىققا شىعۋىنا تۇرتكى بولعان دا ءدال وسى احمەت بايتۇرسىن ۇلى ەدى. ساياساتتان حابار-وشار تاراتىپ, حالىقپەن تىكەلەي بايلانىس ورناتقان باسىلىم ادامداردى ۇنەمى بىلىمگە دە ۇگىتتەپ وتىردى.
سونىمەن قاتار ول قازاق حالقىنىڭ حح عاسىردىڭ باسىنداعى ۇلت-ازاتتىق قوزعالىسى جەتەكشىلەرىنىڭ ءبىرى رەتىندە تاريحتا قالدى. ءتىپتى وتارشىلىقتىڭ وتتى لەبى ونىڭ وتباسىنا دا ءوز كەسىرىن تيگىزىپ, قازاقتىڭ تەكتى ۇلىنا جالا دا جابىلدى. ارينە, ۇلتتىڭ ۇرانىن ۇلىقتاعان جاندى پاتشا وكىمەتىنىڭ اسا جاقتىرا قويماعانى انىق. الايدا ۇلت ۇستازى ناق قازاق ءۇشىن قاشاندا بيىك تۇعىردا تۇراتىنى تالاسسىز.
پەستيفال بولات,
قازاق ءتىلى مەن ادەبيەتى ءپانىنىڭ مۇعالىمى
اقمولا وبلىسى,
تسەلينوگراد اۋدانى,
قوياندى اۋىلى
