سەرەنا ۋيليامس 1981 جىلدىڭ 26 قىركۇيەگىنە اقش-تىڭ ميچيگان شتاتىنداعى ساگينو قالاسىندا دۇنيەگە كەلدى. كوپبالالى وتباسىندا تۋىپ-وسكەن قىزدارىن اكەسى بالاۋسا شاعىنان تەننيسكە باۋلىدى. سولاردىڭ اراسىنان سۋىرىلىپ شىققان ۆينۋس پەن سەرەنا ۋاقىت وزا الەمنىڭ ەڭ مىقتى تەننيسشىلەرىنىڭ ساناتىنا ەركىن قوسىلدى. ەكەۋى دە كەزىندە دۇنيەجۇزىلىك رەيتينگتە ۇزاق ۋاقىت بويى كوش باستادى. سەرەنا 1996 جىلدى 216-ورىنمەن قورىتىندىلاسا, كەلەسى جىلى WTA رەيتينگىندە 22-ورىنعا كوتەرىلدى. سودان كەيىن-اق ونىڭ ورلەۋ كەزەڭى باستالدى. ول ۇزاق ۋاقىت بويى الەمدىك رەيتينگتە كوش باستادى. امەريكالىق سپورتشىنىڭ قول جەتكىزگەن تابىستارى تومەندەگىدەي:
- وليمپيادا چەمپيونى (2012)
- جۇپتىق سايىستا وليمپيادانىڭ ءۇش دۇركىن چەمپيونى (2000, 2008, 2012)
- جەكەلەي باسەكەدە «ۇلكەن دۋلىعا» ساناتىنداعى تۋرنيرلەردىڭ 23 دۇركىن جەڭىمپازى (2002-2017)
- جۇپتىق سايىستا «ۇلكەن دۋلىعا» ساناتىنداعى تۋرنيرلەردىڭ 14 دۇركىن جەڭىمپازى (1999-2016)
- ميكستە «ۇلكەن دۋلىعا» ساناتىنداعى تۋرنيرلەردىڭ 2 دۇركىن جەڭىمپازى (1998)
- WTA قورىتىندى ءتۋرنيرىنىڭ بەس دۇركىن جەڭىمپازى (2001, 2009, 2012-2014)
- WTA تۋرنيرلەرىنىڭ جەكەلەي سايىستارىندا 72 رەت توپ جاردى
- 319 اپتا بويى الەمنىڭ ءبىرىنشى راكەتكاسى اتاعىن ساقتاپ تۇر.
قازاقستاننىڭ بۇرىمدىلارىمەن سەرەنا ءۋيليامستىڭ جولى 15 مارتە قيىستى. سونىڭ 14-ىندە ول جەڭىس تويىن تويلادى. اقش تەننيسشىسى ياروسلاۆا شۆەدوۆانى بەس رەت, يۋليا پۋتينتسەۆا مەن زارينا دياستى ءۇش رەت, گالينا ۆوسكوبوەۆا مەن سەسيل كاراتانچەۆانى ءبىر رەت ۇتتى. ەڭ سوڭعى 15-كەزدەسۋىندە ۋيليامس ەلەنا رىباكيناعا ەسە جىبەردى. بۇل 2021 جىلى بولعان ەدى. پاريجدە ۇيىمداستىرىلعان رولان گارروس تۋرنيرىندە جەرلەسىمىز شاۋ تارتىپ قالعان ايگىلى تەننيسشىدەن 6:3, 7:5 ەسەبىمەن باسىم ءتۇستى.
رودجەر فەدەرەر 1981 جىلدىڭ 8 تامىزىندا شۆەيتساريانىڭ بازەل قالاسىندا دۇنيەگە كەلدى. ونىڭ اكە-شەشەسى دە كەزىندە اۋەسقويلار اراسىنداعى جارىستارعا قاتىسىپ, جۇلدەلى ورىنداردى يەلەنگەن. سودان كەيىن ۇلدارىنىڭ مىقتى ويىنشىعا اينالۋىنا بارىنشا ەڭبەك ءسىڭىردى. رودجەردىڭ ءوزى بوزبالا شاعىنان گەرمانيانىڭ اتاقتى تەننيسشىسى بوريس بەككەرگە ەلىكتەپ ءوستى. العاش رەت ول 2003 جىلى «ۇلكەن دۋلىعا» تۋرنيرلەرىندە توپ جارىپ, كوپشىلىك نازارىن وزىنە اۋداردى. 22 جاسىندا تولاعاي تابىسقا قول جەتكىزگەن فەدەرەر ودان كەيىنگى 20 جىل ۋاقىت ارالىعىندا قانداي جارىستارعا قاتىسسا دا, باستى فاۆريتتەردىڭ ءبىرى سانالدى. شۆەيتساريانىڭ ماقتانىشىنىڭ باعىندىرعان بەلەستەرى مىناداي:
- جۇپتىق سايىستا وليمپيادا چەمپيونى (2008)
- جەكەلەي باسەكەدە وليمپيادا چەمپيونى (2012)
- جەكەلەي باسەكەدە «ۇلكەن دۋلىعا» ساناتىنداعى تۋرنيرلەردىڭ 20 دۇركىن جەڭىمپازى (2002-2017)
- اتر الەمدىك تۋرىنىڭ 6 دۇركىن جەڭىمپازى (2003, 2004, 2006, 2007, 2010, 2011).
- جەكەلەي باسەكەدە اتر تۋرنيرلەرىنىڭ 101 دۇركىن جەڭىمپازى
- جۇپتىق سايىستا اتر تۋرنيرلەرىنىڭ 8 دۇركىن جەڭىمپازى
- 319 اپتا بويى الەمنىڭ ءبىرىنشى راكەتكاسى اتاعىن ساقتاپ تۇردى
- دەۆيس كۋبوگىنىڭ جەڭىمپازى (2014)
رودجەر فەدەرەردىڭ ءالى دە اسا جوعارى دەڭگەيدە ويناۋىنا الەۋەتى جەتەتىن ەدى. ولاي دەۋگە نەگىز, ونىڭ قاي جارىسقا قاتىسسا دا, جارتى جولدا سۇرىنگەن كەزدەرى سيرەك. بىراق ءتۇرلى جاراقاتتارى ءجيى-ءجيى مازالاعاننان كەيىن رودجەر كورتپەن قوشتاسۋدى قۇپ كوردى. بۇل سپورتشىمەن قازاقستاننىڭ بىرنەشە تەننيسشىسى كەزدەستى. بىراق ولاردىڭ ەشقايسىسىنىڭ داڭقتى ويىنشىعا الدەرى جەتپەدى.
