گيپوتەرميا اپپاراتى دۇنيەگە كەلگەن كەزىندە اۋا جەتپەي قينالاتىن نارەستەلەردى قۇتقارۋعا ارنالعان. شارانالاردىڭ اراسىندا مۇنداي اۋىتقۋ سيرەك تە بولسا كەزدەسەدى. سونداي ساتتە نارەستەنىڭ ميى اۋىر اسفيكسيادان زاقىم الۋى مۇمكىن. سوندىقتان بالا دۇنيەگە كەلگەن بەتتە ساۋاتتى, جەدەل كاسىبي كومەك كەرەك. مۇنداي گيپوتەرميا جابدىعى بولماعان كەزدە دارىگەرلەر قولدان كەلگەن ارەكەتىن جاسايتىن. نارەستەنىڭ اينالاسىنا مۇز سالىنعان نەمەسە سۋىق سۋ قۇيىلعان پاكەتتەر قويىلاتىن. جانساقتاۋ بولىمىندەگى دارىگەرلەر مەن مەدبيكەلەر ونداعان ساعات بويى جاڭا تۋعان نارەستەنىڭ ورتالىق جۇيكە جۇيەسىن قۇتقارۋ ءۇشىن ارپالىسىپ, قاجەتتى تومەن دەنە تەمپەراتۋراسىن قولمەن ۇستاپ تۇرۋعا تىرىساتىن.
مىنە, ورالداعى ورتالىققا بەرىلگەن وسى گيپوتەرميا اپپاراتى دارىگەر قاۋىمىن وسى بەينەتتەن قۇتقاردى. جاڭا كەشەن مەتابوليزمدى جانە نارەستەنىڭ ميىندا زاقىمدانعان جاسۋشالاردىڭ قالپىنا كەلۋىن باقىلاپ, قاجەتتى تەمپەراتۋرانى اۆتوماتتى تۇردە ۇستاپ تۇرادى.
– 2007 جىلدان بەرى وسىنداي قايىرىمدىلىق جوبامەن اينالىسىپ كەلەمىز. سودان بەرى ەلىمىزدە ءدال وسى گيپوتەرميا اپپاراتىنىڭ يگىلىگىن 225 ءسابي كورىپ ۇلگەرىپتى. بۇل نارەستەلەردىڭ 92 پايىزى بۇگىندە امان-ساۋ ءوسىپ, دەنساۋلىعى تۇزەلىپ كەتتى. «سامۇرىق قازىنا» قورىنىڭ كومەگىمەن اتقارىلعان مۇنداي باستامانىڭ ماڭىزى وتە ۇلكەن! – دەيدى AYALA قايىرىمدىلىق قورىنىڭ ۆيتسە-پرەزيدەنتى ەلەنا ەسكوۆا.
سوڭعى ءۇش جىل ىشىندە باتىس قازاقستان وبلىسىندا 9 ءسابي اسفيكسيا بەلگىسىمەن دۇنيەگە كەلگەن ەكەن. بۇل دەرتتىڭ قاۋىپتىلىگى سوندا – دەر كەزىندە تولىق كومەك الا الماعان شارانا ءومىر بويىنا مۇگەدەك بولىپ قالۋى, ءتىپتى شەتىنەپ كەتۋى دە مۇمكىن. سوندىقتان جاڭا مەديتسينالىق كەشەندى باتىسقازاقستاندىق دارىگەرلەردىڭ ءسابي دەنساۋلىعى ءۇشىن كۇرەسىندە اسا قاجەتتى قۇرال دەۋگە ابدەن بولادى.
– وسى اپپارات ارقىلى ءبىزدىڭ سابيلەرىمىز ءتۋابىتتى اقاۋىنان تەز ارىلىپ, سوزىلمالى زارداپتارىنان قۇتىلاتىن بولدى, – دەيدى وبلىستىق پەريناتالدىق ورتالىقتىڭ نەوناتولوگ-دارىگەرى ناتاليا ياتسەنكو.
وبلىستىق پەريناتالدىق ورتالىعىندا جىل سايىن شامامەن 6 مىڭداي ءسابي ءومىر ەسىگىن اشادى. سونىڭ ىشىندە 300-دەي نارەستەنىڭ دەنساۋلىعىندا ءتۇرلى اۋىتقۋ بولىپ جاتادى. ولار بىردەن جانساقتاۋ بولىمىنە نەمەسە ينتەنسيۆتى تەراپيا بولىمىنە جەتكىزىلىپ, قاجەتتى مەديتسينالىق جاردەم كورسەتىلەدى. جىل باسىنان بەرى وسىنداي 176 شارانا دارىگەر كومەگىنە ءزارۋ بولعان.
– ءبىزدىڭ ورتالىق 1985 جىلى ايەلدەر بوساناتىن ءۇي بولىپ اشىلعان. 2006 جىلدان بەرى وڭىردە ەڭ ءىرى اكۋشەرلىك, گينەكولوگيالىق جانە نەوناتولوگيالىق كومەك كورسەتەتىن ورتالىق رەتىندە جۇمىس ىستەيدى. 145 كەرەۋەتتىك بولىمدە 54 دارىگەر ەڭبەك ەتەدى. ورتالىقتىڭ قاجەتتى مەديتسينالىق جابدىقتارمەن قامتىلۋى جامان ەمەس, الايدا ولار 63 پايىزعا ەسكىرىپ, توزدى. سوندىقتان مۇنداي زاماناۋي جابدىقتىڭ كەلگەنىنە ەرەكشە قۋانىشتىمىز. Samruk-Kazyna Trust جانە AYALA قورلارىنا گيپوتەرميا اپپاراتى مەن امپليتۋدالىق ەلەكترەنتسەفالوگرافيا مونيتورى ءۇشىن العىس ايتامىز», – دەدى وبلىستىق پەريناتالدىق ورتالىعىنىڭ ديرەكتورى جاننا ءدىلمانوۆا.
باتىس قازاقستان وبلىسى
