دەرەكتەرگە سەنسەك, ءوڭىر تۇرعىندارى پوليتسيا قىزمەتكەرلەرىنە ۇزىن سانى 160 قارۋ تاپسىرعان. ولاردىڭ ىشىندە 16 ويىق, 140 تەگىس ۇڭعىلى جانە 4 تراۆماتيكالىق قارۋ-جاراق بار. پوليتسيا قىزمەتكەرلەرىنىڭ ايتۋىنشا, اكتسيانىڭ العاشقى جىلدارىندا قولونەر نەمەسە سيرەك كەزدەسەتىن قارۋلار تاپسىرىلعان بولسا, قازىر جۇرتشىلىق نەگىزىنەن تۋىستارىنان مۇرا بوپ قالعان, اڭ اۋلاۋعا ارنالعان قارۋدى وتكىزىپ جاتىر ەكەن.
«قارۋ-جاراق زاتتارىن ءوز ەركىمەن تاپسىرعانى ءۇشىن ءوڭىر تۇرعىندارى جالپى سوماسى 10 ملن 401 مىڭ 948 تەڭگە تولەماقى الدى. جالپى العاندا اكتسيا ويداعىداي جۇرگىزىلدى. بىزگە تاپسىرىلعان بارلىق قارۋ تۇرلەرى جويىلادى», دەيدى وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ باسشىسى, پوليتسيا پودپولكوۆنيگى جايداربەك قۇتتىباەۆ.
قۇزىرلى ورگان قىزمەتكەرىنىڭ ايتۋىنشا, تاپسىرىلعان قارۋ-جاراقتىڭ باسىم بولىگى ەكىنشى ساناتقا جاتقىزىلعان. ەكىنشى ساناتقا نەگىزىنەن اتۋعا جارامدى, بىراق باستاپقى قالىبىن جوعالتقان جانە اقاۋلارى بار قارۋلار جاتادى. وتكىزىلگەن قارۋدىڭ 149-ى ءدال وسى ساناتقا ەنگىزىلگەن. تەحنيكالىق اقاۋلارعا بايلانىستى ودان ءارى پايدالانۋعا جارامسىز نەمەسە پايدالانۋعا قاۋىپتى بولىپ ەسەپتەلەتىن 11 قارۋ پوليتسيا قىزمەتكەرلەرىنىڭ قولىنا تۇسكەن. بۇل قارۋلار تيىسىنشە ءۇشىنشى ساناتقا جاتادى.
ەستەرىڭىزگە سالا كەتەيىك, قارۋ مەن وق-دارىلەردى زاڭسىز ساقتاعانى ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعان. زاڭسىز ساقتالعان قارۋدى, وق-دارىلەردى جانە جارىلعىش زاتتاردى ءوز ەركىمەن تاپسىرعان ازاماتتاردىڭ ءىس-ارەكەتتەرىندە قانداي دا ءبىر قىلمىستىق ءىستىڭ قۇرامى بولماسا, قىلمىستىق جانە اكىمشىلىك جاۋاپكەرشىلىكتەن بوساتىلادى.
جامبىل وبلىسى
