داۋلەتتىڭ قانداي مىقتى بالۋان ەكەنىن جانكۇيەرلەر جاقسى بىلەدى. 96 جانە 125 كيلو سالماق دارەجەلەرىندە كۇش سىناسقان ول ەركىن كۇرەستەن وتكەن كوپتەگەن رەسپۋبليكالىق جانە حالىقارالىق جارىستا اتوي سالدى. 2008-2016 جىلدار ارالىعىندا ازيا چەمپيوناتىندا ءتورت كۇمىس جانە ءبىر قولا مەدالدى يەلەندى. 2014 جىلى ازيا ويىندارىندا قانداسىمىزدىڭ جەڭىس تۇعىرىنىڭ ەڭ بيىك ساتىسىنا كوتەرىلۋىنە تاماشا مۇمكىندىگى بولدى. نەبىر مىقتى قارسىلاستاردى جولىنان ىعىستىرعان شابانباي فينالدا يراننىڭ اتاقتى بالۋانى پارۆيز حاديدكە ەسە جىبەردى. ناتيجەسىندە جەرلەسىمىز كۇمىس مەدالدى موينىنا ءىلدى.
2012 جىلى لوندوندا الاۋى تۇتانعان وليمپيا ويىندارىن جاپ-جاقسى باستاعان داۋلەت شەشۋشى تۇستا ۇتىلىپ, بەسىنشى ورىندا قالىپ قويدى. بىراق ارادا بىرەر جىل وتكەننەن سوڭ باس جۇلدەنى ولجالاعان وزبەكستاندىق ارتۋر تايمازوۆ پەن كۇمىس جۇلدەنى يەلەنگەن گرۋزيالىق داۆيد ءمودزماناشۆيليدىڭ دوپينگ قولدانعانى انىقتالىپ, ولار ءوز اتاقتارىنان ايىرىلدى. سونىڭ ناتيجەسىندە يراندىق كومەيل گاسەمي مەن رەسەيلىك ءبىلال ماحوۆتىڭ ەكەۋى دە وليمپيا ويىندارىنىڭ جەڭىمپازى دەپ تانىلسا, قازاقستاندىق داۋلەت شابانبايعا قولا مەدال تابىس ەتىلدى. ءدال سونداي جۇلدەنى امەريكالىق تەرۆەل دلاگنەۆ تە يەلەندى. وسىلايشا, اراعا 10 جىل سالىپ, عالامدىق دودانىڭ مەدالدارى ءوز يەلەرىن تاپتى. ال قازاق جانكۇيەرلەرى داۋلەت ءۇشىن ءدان ريزا.
