البەتتە, كاسىبي تاۋەكەلدى قاشاندا دۇرىس باعامداعان ءجون. جابۋلى قازان جابۋلى كۇيىندە قالادى دەپ كۇردەلى ماسەلەنى شەشۋدەن قاشۋدىڭ سوڭى ورنى تولماس قايعىلى جايلارعا اكەلىپ سوقتىرۋى دا ىقتيمال. ەلىمىزدە جىل سايىن 1 مىڭنان استام جۇمىسشى جۇمىس ورنىندا جاراقات الادى. بۇل – رەسمي تىركەلىپ, بەلگىلى بولعاندارى عانا. ەل ىشىندەگى «باس جارىلسا بورىك ىشىندە, قول سىنسا جەڭ ىشىندە» دەيتىندەردىڭ قانشا ەكەنى بەلگىسىز. وندىرىستە ورىن الىپ جاتقان وقىس وقيعالاردان 200-گە جۋىق جۇمىسشى كوز جۇمادى. مىنە, وسى دەرەكتەردى ساراپتاي كەلە, ەڭبەك قاۋىپسىزدىگىن قامتاماسىز ەتۋ ماسەلەسىنىڭ ءالى دە اقساپ جاتقاندىعىن تۇيسىنۋگە بولادى.
كونفەرەنتسيادا وسى ماسەلەلەر جان-جاقتى ءسوز بولدى, كەم-كەتىك ەكشەلدى, تىعىرىقتان شىعار جول كورسەتىلدى. الداعى ۋاقىتتا ءار جۇمىسشىنىڭ ەلەكتروندى دەنساۋلىق پاسپورتى جاسالماق. بۇل ازىرگە ۇسىنىس قانا. جان-جاقتى ساراپتاي كەلە, ۇسىنىستىڭ ۇتىمدى ەكەندىگىن ايقىن اڭعارۋعا بولادى. ءسال تاراتىپ ايتساق, ادام جۇمىسقا ورنالاسقان كۇننەن باستاپ ونىڭ دەنساۋلىعى باقىلاۋعا الىنىپ, جۇمىس بارىسىندا زيان كەلمەۋى جان-جاقتى ويلاستىرىلماق. سوندا عانا زياندى كاسىپورىنداردا تۋىنداۋى مۇمكىن اۋرۋدىڭ الدىن الۋعا بولادى. ال وقىس وقيعالاردىڭ الدىن الۋ ءۇشىن جۇمىس ورنىنىڭ تالاپقا ساي بولۋىن مۇقيات تەكسەرىپ وتىرۋ كەرەك.
– 2030 جىلعا دەيىنگى قاۋىپسىز ەڭبەك تۇجىرىمداماسى تۇزىلگەن, – دەيدى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ, – وسى تۇجىرىمدامانىڭ اياسىندا بىرقاتار شارانى قولعا الۋدى جوسپارلاپ وتىرمىز. قازىرگى ۋاقىتتا زياندى جۇمىس ورىندارىنداعى ەڭبەككەرلەرگە جۇمىس بەرۋشىلەر تاراپىنان 180 ملرد تەڭگە وتەماقى تولەنەدى. الداعى ۋاقىتتا وسى جۇيەنى جەتىلدىرۋ قاجەت. سونداي-اق كاسىپورىندارعا ەڭبەكتى قورعاۋ ستاندارتتارىن ەنگىزۋدى ءتيىمدى پايدالانعان ءلازىم.
كوكشەتاۋ قالاسىنداعى ENKI كىرپىش زاۋىتىندا 400-گە جۋىق ادام جۇمىس ىستەيدى. ولارعا ءبىرشاما قولايلى جاعداي جاسالعان. كاسىپورىن ەڭبەك قاۋىپسىزدىگى عىلىمي ينستيتۋتىمەن تىعىز بايلانىستا. سالا ماماندارى ونەركاسىپ ورنىنا ءجيى كەلىپ, تەكسەرىس جۇرگىزۋدە.
– سوڭعى ەكى جىلدا عىلىمي ينستيتۋتپەن بىرلەسىپ جۇمىس ىستەۋدەمىز, – دەيدى زاۋىت ديرەكتورى مىرزاباي ابدىقالىقوۆ, – عىلىمي نەگىزدە اتقارىلاتىن شارۋالاردى ءبىر جۇيەگە ءتۇسىردى. قاناتقاقتى جوبانىڭ ناتيجەسى جاقسى. ارينە, كەيدە جۇمىسشىلاردىڭ وزدەرى قاتەلىكتەرگە ورىن بەرىپ جاتادى. ءبىز ءوز تاراپىمىزدان بارلىق جاعدايدى تۋدىرۋدامىز.
عىلىمي-تاجىريبەلىك كونفەرەنتسياعا جاۋاپتى مەكەمەنىڭ وكىلدەرى, كاسىپورىن باسشىلارى, عالىمدار قاتىسىپ, ەڭبەكتى قورعاۋ باعىتىنداعى وزدەرىنىڭ تولىمدى پىكىرلەرىن ورتاعا سالدى. جيىنعا قاتىسۋشىلار ساقتاندىرۋ جۇيەسىنىڭ كەمشىلىگىن دە جاسىرماي ايتىپ, جەتىلدىرۋ جولىن نۇسقادى. ءسوز سوڭىن شيىرا ايتقاندا, ەڭبەك قاۋىپسىزدىگىن ساقتاۋ, ەڭبەك ادامىنىڭ ءومىرى مەن دەنساۋلىعىن قورعاۋ ەلدەگى ەڭ ەلەۋلى ماسەلە ەكەندىگى دە راس. كونفەرەنتسيادا ايتىلعان كوپ جايلار وسىنى اڭعارتادى.
