جەرلەۋ ءراسىمى 18-19 قىركۇيەك كۇندەرى لوندون قالاسىندا ءوتتى.
سەنات سپيكەرى 18 قىركۇيەكتە ۆەستمينستەر حوللىندا پاتشايىمنىڭ تابىتىن زيارات ەتۋ راسىمىنە قاتىسىپ, قازاقستان رەسپۋبليكاسىنىڭ اتىنان رەسمي كوڭىل ايتۋ كىتابىنا جازبا قالدىردى. ول ءوز جازباسىندا II ەليزاۆەتا اسا كورنەكتى كوشباسشى جانە بريتان ۇلتىنىڭ بىرلىگى مەن تۇراقتىلىعىنىڭ سيمۆولى بولعانىن, الداعى ۋاقىتتا دا پاتشايىمنىڭ تەكتىلىگى, قادىر-قاسيەتى مەن جەتىستىكتەرى الەمدەگى ميلليونداعان ادامدى جىگەرلەندىرە بەرەتىنىن اتاپ ءوتتى.
سول كۇنى ماۋلەن اشىمباەۆ بۋكينگەم سارايىندا كورول ءىىى ءچارلزدىڭ ەۋروپا, تاياۋ شىعىس جانە ازيا ەلدەرىنىڭ, ۇكىمەتتەر مەن حالىقارالىق ۇيىمداردىڭ باسشىلارىنىڭ جانە كورولدىك وتباسى مۇشەلەرىنىڭ قۇرمەتىنە ارنالعان قارالى قابىلداۋىنا قاتىستى.
سەنات توراعاسى كورول ءىىى چارلزبەن سۇحبات بارىسىندا پرەزيدەنت قاسىم-جومارت توقاەۆتىڭ اتىنان كوڭىل ايتىپ, ەل پرەزيدەنتىنىڭ شەشىمى بويىنشا جاقىن ارادا استانانىڭ ورتالىق ساياباعىنداعى گۇلزارلاردىڭ بىرىنە ءىى ەليزاۆەتا پاتشايىمنىڭ ەسىمى بەرىلەتىنىن جەتكىزدى. ۇلىبريتانيا مونارحى مۇراگەر حانزادا رەتىندە 1996 جىلى قازاقستانعا جاساعان ساپارىن ەسكە الدى.
كورول پاتشايىمنىڭ قازاسىنا بايلانىستى ىقىلاس تانىتقان قازاقستان تاراپىنا ريزاشىلىعىن ءبىلدىرىپ, قازاقستاندىقتارعا يگى تىلەكتەرى مەن ءىلتيپاتىن جەتكىزدى.
قازاقستاندىق دەلەگاتسيا 19 قىركۇيەكتە ۆەستمينستەردە وتكەن II ەليزاۆەتا پاتشايىمدى جەرلەۋ راسىمىنە قاتىستى. دەلەگاتسيا قۇرامىندا سىرتقى ىستەر ءمينيسترىنىڭ ورىنباسارى رومان ۆاسيلەنكو دا بولدى. راسىمگە 2000-عا جۋىق ادام قاتىستى. ولاردىڭ قاتارىندا كورولدىك وتباسىنىڭ مۇشەلەرى, مەملەكەت جانە ۇكىمەت باسشىلارى, ديپلوماتتار مەن قوعام وكىلدەرى بار.
