ەكونوميكا • 19 قىركۇيەك، 2022

كۇننەن قۋات الاتىن جوبا

608 رەت كورسەتىلدى

مۇنايلى وڭىرگە ينۆەستيتسيا سالۋعا شەتەلدىكتەر قىزىعۋشى­لىعى ارتىپ كەلەدى. ماسەلەن، ماجارستاندىق Globalia كومپانياسىنىڭ ديرەكتورى گابور شاگي اتىراۋ وبلىسىندا كۇننەن ەنەرگيا الۋ جوباسىن ۇسىنىپ وتىر.

وبلىس اكىمى سەرىك شاپ­كەنوۆتىڭ مالىمەتىنە سۇيەنسەك، بيىلعى التى ايدا اتىراۋ وبلىسىنىڭ ماجارستانمەن ىشكى ساۋدا اينالىمى 894 مىڭ دوللارعا جەتكەن. ونىڭ ىشىندە ەكسپورت كولەمى 440 مىڭ دوللاردى، يمپورتتىڭ ۇلەسى 454 مىڭ دوللاردى قۇرادى.

اكىم مەن ماجارستاندىق ينۆەستور وسى كەزگە دەيىنگى ەكونوميكالىق، ىسكەرلىك بايلانىستى بەكەمدەي ءتۇسۋدىڭ ىقتيمال باعىتتارىن تالقىلاپ، ورتاق مۇددەنى كوزدەۋدى ماقسات ەتىپ وتىر. سونىڭ دالەلىندەي، ماجار ينۆەستورى اتىراۋ وبلىسىندا قۋاتى 100 مۆت بولاتىن كۇننەن قۋات الۋ پاركىن ىسكە اسىرۋ يدەياسىن ۇسىندى.

– اتىراۋ وبلىسىنىڭ ەكولو­گيالىق احۋالى كوڭىل ءبولۋدى قاجەت ەتەدى. وسى ورايدا كۇننەن قۋات الۋ جوباسىنىڭ ماڭىزى زور. وعان قاجەتتى سۋ كوزىن «ساسىقساي» بۋلانۋ الاڭىنان الۋدى ۇسىنعىم كەلەدى. قازىر وبلىسقا قاراستى كەيبىر اۋداندار ەلەكتر جەلىسىن كورشىلەس رەسەي فەدەراتسياسىنان الىپ وتىر. ونى ءوز بالانسىمىزعا الۋ ءۇشىن بىرنەشە شاقىرىم جەلى تارتىپ، بەكەت ورناتۋ قاجەت. وسى جوبا اياسىندا 20 مۆت-تىق يندۋستريالىق ساياباق سالعان الدەقايدا ءتيىمدى بولار ەدى. سول سەبەپتەن، ءبىزدىڭ تاراپىمىزدان بۇل جوباعا قاجەتتى قولداۋ كورسەتىلەدى، – دەپ ءمالىم ەتتى س.شاپكەنوۆ.

شەتەلدىك ينۆەستوردىڭ ايتۋىنشا، ەكولوگيالىق تازا ەنەرگيامەن قامتاماسىز ەتەتىن «كۇن ساۋلەسىنىڭ كومەگىمەن سۋتەگى گەنەراتورى ارقىلى جاسىل ەنەرگيا الۋ» جوباسىنىڭ تيىمدىلىگى كوپ. ويتكەنى قالانى ۇزدىكسىز ەلەكتر ەنەرگيامەن جابدىقتاۋدىڭ بالامالى نۇسقاسى – سۋتەگى گەنەراتورى.

– وعان قاجەتتى ەنەرگيا كۇننەن قۋات الۋ ساياباعى نەمەسە جەل ەلەكتر ستانسالارى ارقىلى وندىرىلەدى. ەلەكتروليز كەزىندە الىنعان سۋتەگى گازىن شاعىن ەلەكتر قۇرىلعىلارىنا، اۆتوكولىكتەرگە، ونىڭ ىشىندە اۆتوبۋستارعا، ءتىپتى ۇلكەن ەلەكتر قوندىرعىلارىنا قۋات بەرۋ ءۇشىن پايدالانۋعا بولادى. سۋتەگى گەنەراتورىنا جانار-جاعارماي گەنەراتورلارىمەن بىردەي وتىن جۇمسالسا دا ۇزاق جۇمىس ىستەيدى، – دەيدى گابور شاگي.

 

اتىراۋ وبلىسى

سوڭعى جاڭالىقتار

ۇقساس جاڭالىقتار