اتالعان قور باسشىسىنىڭ ايتۋىنشا, حالىقارالىق كومپانيالار بويىنشا وندىرىستىك سالادا دا, الدىڭعى قاتارلى ينۆەستيتسيالىق حولدينگتەردە دە تەرەڭ تالداۋ جۇرگىزىلگەن.
«كومپانيانىڭ ميسسياسى – حالىق مۇددەسى ءۇشىن اكتيۆتەردىڭ سارالانعان پورتفەلى مەن بيزنەس پورتفەلىن ءتيىمدى باسقارۋ ارقىلى ەكونوميكانىڭ تۇراقتى دامۋىنا ىقپال ەتۋ. ءبىز بيزنەس ءۇشىن ەكوجۇيە قۇراتىنىمىزدى جاريالادىق. نەگىزگى باسىمدىقتار رەتىندە ورنىقتى دامۋ, اكتيۆتەر پورتفەلىن ءتيىمدى جانە بەلسەندى باسقارۋ نەگىزگە الىنادى. بۇل رەتتە «سامۇرىق-قازىنانىڭ» قازاقستان ەكونوميكاسىنداعى ۇلەسى 2032 جىلعا قاراي 5%-عا دەيىن تومەندەيدى, سونداي-اق اتموسفەراعا كومىرقىشقىل گاز شىعارىندىلارىن 10%-عا ازايتامىز», دەپ اتاپ ءوتتى ا.ساتقاليەۆ.
سونىمەن قاتار تازا اكتيۆتەردىڭ قۇنىن ارتتىرۋدىڭ نەگىزگى مىندەتتەرى بەلگىلەندى. سونىڭ ىشىندە ەڭبەك ونىمدىلىگىن ارتتىرۋ, جوعارى تەحنولوگيالىق وندىرىستەردى دامىتۋ, قارجىلىق تۇراقتىلىقتى قامتاماسىز ەتۋ, اكتيۆتەردى جاڭعىرتۋ, پورتفەلدىك كومپانيالار باسشىلارىنىڭ دەربەس جاۋاپكەرشىلىگىن ارتتىرۋ ايقىن ماقسات ەتىپ قويىلدى.
بۇعان قوسا, قور ستراتەگيالىق اكتيۆتەردەگى باقىلاۋ ۇلەستەرىن ساقتايدى. 2025 جىلعا دەيىن IPO-عا قمگ, AirAstana, SamrukGreenCo, QazaqGaz, قتج كومپانيالارىن شىعارۋ جوسپارلانىپ وتىر.
«قور ەكونوميكانىڭ نەگىزگى سەكتورلارىن باقىلاۋ ءۇشىن جەتكىلىكتى ماجوريتارلىق پاكەتكە يە ينۆەستورعا اينالادى دەپ جاريالاندى. بۇل رەتتە كومپانيالاردى اۋقىمدى جەكەشەلەندىرۋ جۇرگىزىلەدى. ءبىز ۇكىمەت بەكىتكەن, جەتكىلىكتى دەڭگەيدە تەڭدەستىرىلگەن باعدارلاما ازىرلەدىك. ناتيجەسىندە, باسەكەلەس ورتاعا بەرىلەتىن كومپانيالاردىڭ كولەمى 105-تەن 254-كە دەيىن ۇلعايتىلدى. دالىرەك ايتساق, «قازمۇنايگاز» كومپانياسىندا جەرگىلىكتى بيرجالارداعى IPO ءۇشىن جەتكىلىكتى تۇردە بەلسەندى دايىندىق جۇمىستارى جۇرگىزىلدى. قىركۇيەكتىڭ ەكىنشى جارتىسىنان باستاپ قازاقستان قالالارىندا حالىقتىڭ ءبىراز بولىگىن قامتاماسىز ەتۋ جانە تارتۋ ءۇشىن رودشوۋ وتكىزۋ جوسپارلانىپ وتىر. AirAstana كومپانياسى IPO-عا دايىن, حالىقارالىق IPO-نى تارگەتتەۋ كوزدەلگەن. حالىقارالىق نارىقتار قالپىنا كەلتىرىلگەننەن كەيىن قاجەتتى قاراجاتتى تارتۋ ءۇشىن وسى كومپانيامەن شىعۋعا دايىن بولامىز. «سامۇرىق-ەنەرگو» ەكىگە بولىنەدى. ءبىرىنشىسى – SamrukGreenCo-دا بارلىق «جاسىل» اكتسيا شوعىرلانادى. بۇل – جەك, گەس وبەكتىلەرى. ەكىنشى كومپانيادا ەلەكتر ەنەرگياسىن ءوندىرۋ ءۇشىن تابيعي قازبالاردى پايدالانۋعا بايلانىستى بارلىق اكتيۆ توپتاستىرىلادى. SamrukGreenCo كومپانياسى IPO-دا قازاقستانداعى باسقا دا اكتيۆتەردى جيناقتايدى دەپ جوسپارلاپ وتىرمىز», دەدى سپيكەر.
بۇعان قوسا, KEGOC بويىنشا ۇكىمەتپەن باسەكەلەس ورتاعا بەرىلەتىن اكتسيالار كولەمىن ۇلعايتۋ كەلىسىلدى. قازىرگى ۋاقىتتا IPO-عا دايىندىق, مامىلە قۇرىلىمىن قالىپتاستىرۋ جانە زاڭنامالىق وزگەرىستەر پىسىقتالىپ جاتىر. QazaqGaz كومپانياسى بويىنشا كومپانيانى IPO-عا شىعارۋ جونىندەگى جول كارتاسى ءتۇزىلدى. QazaqAir قارجىلىق تۇراقتىلىقتى قالپىنا كەلتىرۋ, قارىزداردى قايتا قۇرىلىمداۋ بويىنشا جۇمىس جۇرگىزىپ جاتىر. جالپى, ينۆەستورلارعا ارنالعان كومپانيالار تۋرالى تولىق اقپارات ipo.sk.kz سايتىندا جاريالانعان.
سونداي-اق «قازاقستان تەمىر جولى» كومپانياسى تولىققاندى لوگيستيكالىق كورپوراتسيا بولىپ قايتا قۇرىلادى. ا.ساتقاليەۆتىڭ ايتۋىنشا, فۋنكتسيونالدىقتى وزگەرتۋ, قتج قۇزىرەتىن كۇشەيتۋ, ونىڭ گەوگرافياسىن كەڭەيتۋ جوسپارلانۋدا.
«قازاقستان تەمىر جولى» – نەگىزگى لوگيستيكالىق وڭىرلىك حاب. سوندىقتان ترانزيتتىك تاسىمالداردىڭ ءوسۋ قارقىنىن ساقتاپ, كولىكتىك قىزمەتتەردىڭ الەمدىك نارىعىنداعى باسەكەگە قابىلەتتىلىگىن ارتتىرىپ, سەرۆيس ساپاسىن جاقسارتىپ, ساراپتامالىق-ترانزيتتىك الەۋەتتى ىسكە اسىرۋ قاجەت. وسى ماقساتتا قتج قۇزىرەتىن كۇشەيتۋ ماڭىزدى. ونىڭ ىشىندە تالداۋ جۇمىسىن جاقسارتۋ, لوگيستيكا بويىنشا قۇزىرەتتەر ورتالىقتارىن قۇرۋ, كومپانيانىڭ قاتىسۋ گەوگرافياسىن كەڭەيتۋ, ياعني شەتەلدە لوگيستيكالىق قىزمەتتەردى ىلگەرىلەتۋ, نەگىزگى تەرمينالداردىڭ جۇمىسىن كۇشەيتۋ, سەرىكتەستەرمەن, كولىكتىڭ باسقا تۇرلەرىمەن – ياحتالارمەن, اۆيامەن, تەڭىز كولىگىمەن كوللابوراتسيا جاساۋ, ينستيتۋتتىق نەگىزدى دامىتۋ, قولدانىستاعى ۇيىمدىق قۇرىلىمدى جانە بيزنەس پروتسەستەردى وزگەرتۋ جوسپارلانىپ وتىر. بۇل رەتتە كومپانيانىڭ جەكەلەگەن قۇرىلىمدىق بولىمشەلەرىن جەكەشەلەندىرۋ قاراستىرىلعان», دەدى قور باسشىسى.
سونىمەن قاتار «سامۇرىق-قازىنا» قورى قازاقستانداعى 16 جاڭا باسىم ينۆەستيتسيالىق جوبالاردىڭ ءتىزىمىن ۇسىندى. قور 13 باسىم جوبانىڭ ءبىرىنشى پاكەتىن 2022 جىلدىڭ كوكتەمىندە جاريالادى. وعان الماتى جەو-نى گازداندىرۋ, باتىس قازاقستاندى سۋمەن جابدىقتاۋ, جاڭا گاز قۇبىرلارى مەن تەمىر جولدار سالۋ سياقتى باستامالار كىرگىزىلدى. ال 16 جوبانىڭ جاڭا تىزىمىندە – مۇناي-گاز حيمياسى, ۇلتتىق ەلەكتر جەلىسىن جاڭعىرتۋ, بازالىق قۋات كوزىن سالۋ, جاڭارتىلاتىن ەنەرگيا كوزدەرىن دامىتۋ جوبالارى, 5G ينتەرنەت جەلىسىن ورناتۋ, جاڭا تەمىرجولداردى سالۋ جانە باسقا دا جوبالار قامتىلعان.
جوبالار قازاقستان حالقىنىڭ ءومىر ءسۇرۋ ساپاسىن جاقسارتۋعا باعىتتالعان. جۇمىس ورىندارىن اشۋعا بايلانىستى تىكەلەي اسەر ەتۋدەن باسقا, جوبالار جاناما ۇزاق مەرزىمدى اسەرلەرگە يە. ناقتى ايتقاندا, ولار – ەڭبەك جاعدايلارى مەن ەكولوگيالىق احۋالدى جاقسارتۋدىڭ, تىرشىلىك ەتۋ دەڭگەيىن ارتتىرۋدىڭ, الەۋمەتتىك ينفراقۇرىلىمدى دامىتۋدىڭ, بيزنەستى ىلگەرىلەتۋدى ىنتالاندىرۋدىڭ جيىنتىق ناتيجەسى.
رەفورمالار ناتيجەسىندە «سامۇرىق-قازىنا» پرەزيدەنت ايقىندايتىن اسا ماڭىزدى جوبالارعا عانا تەڭ ينۆەستور رەتىندە قاتىسادى.
بريفينگ بارىسىندا جۋرناليستەر ساۋالىنا جاۋاپ بەرگەن ا.ساتقاليەۆ ەلىمىزدە اتوم ەلەكتر ستانساسىن سالۋ جوباسى اياسىنداعى جۇمىس باستالعانىن مالىمدەدى.
«بولجامدى ەنەرگەتيكالىق تەڭگەرىم 2023 جىلعا قاراي قۋاتى 2 400 مەگاۆاتقا دەيىنگى اتوم ەلەكتر ستانساسىن سالۋ قاجەتتىگىن كورسەتتى. ءبىزدىڭ قور ۇكىمەتتىڭ باسشىلىعىمەن اتالعان جوبانى ىسكە اسىرۋعا كىرىستى. بۇل باعىتتاعى جۇمىس تۋرالى مۇددەلى تۇلعالار, جۋرناليستەر جانە جالپى قوعام الدىندا بايانداپ وتىرامىز», دەدى سپيكەر.
سونداي-اق قور باسشىسى قايىرىمدىلىق باعىتتارى بويىنشا اتقارىلاتىن جۇمىستار جونىندە دە ايتىپ بەردى.
«مەملەكەت باسشىسى قور پايداسىنىڭ 7%-ى «قازاقستان حالقىنا» قورىنا جىبەرىلەتىنىن ايتتى. 2018 جىلدان باستاپ قور اكتسيالارىنىڭ مەملەكەتتىك پاكەتىندە ديۆيدەندتەر 13 ەسە ءوستى. بيىل اتالعان كورسەتكىش 170 ملرد تەڭگە بولادى. سونىمەن قاتار شامامەن 183 ملرد تەڭگە قايىرىمدىلىققا جانە اكتسيونەرلەردىڭ پايداسىنا, وزگە دە بولۋگە باعىتتالادى. قوردىڭ قايىرىمدىلىق باعدارلاماسى بار. بۇل جۇمىستى «سامۇرىق-قازىنا تراست» كومپانياسى جۇزەگە اسىرادى», دەدى ول.
