مەكتەپتە ساپالى ءبىلىم بەرۋ ۇدەرىسى ءۇشىن قولايلى جانە قاۋىپسىز جاعداي جاسالعان. ينتەراكتيۆتى قۇرال-جابدىقتارمەن قامتىلعان كەڭ كابينەتتەر, ەكى كومپيۋتەرلىك سىنىپ, ىڭعايلى شەبەرحانا, كىتاپحانا, تولىق جابدىقتالعان اسحانا جانە سپورت زالى بار.
سونىمەن قاتار ءبىلىم وشاعىنىڭ جانىنان مەكتەپكە دەيىنگى ءبىلىم بەرۋ ستاندارتىنا سايكەس 40 ورىندىق شاعىن ورتالىق اشىلدى. اۋدان ورتالىعىنداعى جاڭا ءبىلىم نىسانىنىڭ اشىلۋ سالتاناتىنا وبلىس اكىمى ارحيمەد مۇحامبەتوۆ ارنايى كەلىپ قاتىسىپ, مەكتەپ ۇجىمى مەن وقۋشىلاردى قۇتتىقتادى. ايماق باسشىسىنىڭ ايتۋىنشا, وبلىس اۋماعىنداعى باسقا دا ءبىلىم وشاقتارىن جاڭعىرتۋ, ولاردىڭ ماتەريالدىق-تەحنيكالىق بازاسىن نىعايتۋ جالعاسا بەرمەك. بيىل وڭىردەگى 30 اۋىل مەكتەبى جاڭا اۆتوبۋستارمەن قامتاماسىز ەتىلەدى. ال قارابالىق اۋدانىنداعى مەكتەپتەرگە 5 جاڭا اۆتوبۋس بەرىلەدى. بۇگىندە وبلىستاعى 455 مەكتەپتە 113 مىڭعا جۋىق وقۋشى ءبىلىم الادى. سونىڭ 11 734-ءى بيىل ءبىرىنشى سىنىپ تابالدىرىعىن اتتاعان.
– مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا «ورتا ءبىلىمنىڭ ساپاسى – تابىستى ۇلت بولۋدىڭ ماڭىزدى شارتى. ءاربىر وقۋشىنىڭ ءبىلىم الىپ, جان-جاقتى دامۋى ءۇشىن قولايلى جاعداي جاسالۋعا ءتيىس» دەپ ءبىلىم سالاسىنا ەرەكشە كوڭىل ءبولدى. بيىل 150 جىلدىعى اتاپ ءوتىلىپ جاتقان ۇلت ۇستازى احمەت بايتۇرسىن ۇلى «حالىقتى اعارتۋ بالادان, مەكتەپتەن باستاۋ الادى», دەپ ءبىلىمنىڭ تىرەگى مەكتەپ ەكەنىن ايرىقشا اتاپ وتكەن. وڭىردە بالالار جىلى اياسىندا ءبىلىم بەرۋ ساپاسىن ارتتىرۋ ءۇشىن بارلىق قاجەتتى شارا قابىلدانىپ, تاعى بىرنەشە زاماناۋي مەكتەپ بوي كوتەرەدى. قازىرگى تاڭدا قوستاناي قالاسىنداعى «بەرەكە», «قوناي» شاعىن اۋداندارىندا 2 مەكتەپتىڭ قۇرىلىسى ءجۇرىپ جاتىر. ال قوستاناي اۋدانىنىڭ ەڭبەك اۋىلىندا قۇنى 1,2 ملرد تەڭگە بولاتىن 100 ورىندىق ءبىلىم وشاعى سالىنادى. قارابالىق اۋدانىنىڭ گۋريانوۆ اۋىلىندا 1,3 ملرد تەڭگەگە 100 ورىندىق تاعى ءبىر مەكتەپتىڭ قۇرىلىسى باستالماق. جالپى, 2025 جىلعا دەيىن وبلىستىڭ قوستاناي, ارقالىق, رۋدنىي, توبىل قالالارى مەن اۋليەكول, جىتىقارا, قارابالىق, قوستاناي اۋداندارىندا 9 120 وقۋشىعا ارنالعان جاڭا 14 قازاق مەكتەبى اشىلادى, – دەدى ايماق باسشىسى.
قوستاناي وبلىسى
