فوتوگالەرەيا • 15 قىركۇيەك، 2022

ۋچاسكەلىك ينسپەكتورلاردىڭ ءبىر ءتۇنى

235 رەت كورسەتىلدى

ۋچاسكەلىك پوليتسيا قىزمەتكەرلەرىنىڭ جۇمىستارى ءدال مۇنداي قىزىقتى، ءارى قاۋىپتى بولار دەپ ويلاماپپىن. جۋىقتا ەرتىس پوليتسيا ءبولىمىنىڭ ينسپەكتورلارىمەن تۇنگى كەزەككە تۇستىك. فورما كيىپ، يىققا پوگون تاقتىق. 

الدىمەن ەرتىس پوليتسيا ءبولىمى باستىعىنىڭ ءبىرىنشى ورىنباسارى، مايور بولاتجان راحيمجانوۆ ۋچاسكەلىك ينسپەكتورلاردىڭ مىندەتى مەن قىزمەتى تۋرالى قىسقاشا تۇسىنىك بەردى. 

– اسىرەسە، وتباسىلىق كيكىلجىڭدەرگە كوپ شاقىرادى. ال، قىلمىستىق ىستەرگە ءبىز بارمايمىز. ماسەلەن، پاتەردى سۋ باسسا، وتباسىلىق ۇرىس-توبەلەس بولسا، وقيعا ورنىنا ءبىز جەتەمىز. كەيبىر جاعدايدا، پسيحيكالىق ديسپانسەردە تىركەۋدە تۇرعان ازاماتتار تارتىپسىزدىك جاسايدى. ونداي بولسا، №20 بريگادانى شاقىرىپ، ديسپانسەرگە جونەلتەمىز. ەگەر دە، وتباسىلىق كيكىلجىڭ ورىن الىپ، ەكى تاراپتىڭ بىرىنە ورتاشا جاراقات تۇسىرسە، قىلمىستىق كودەكستىڭ 107 بابىنا سايكەس باسقا توپ اينالىسادى. قىسقاسى، جۇمىستىڭ قىزىعى مەن شىجىعى كوپ، – دەدى پوليتسيا مايورى ب.راحيمجانوۆ.   

كابينەتتەن شىعىپ بارا جاتقانىمىزدا: – جاراقات ءتۇسىپ قالماسىن، بايقاپ جۇرىڭىزدەر، – دەپ جانە ساقتاندىرىپ قويدى باسشىنىڭ ورىنباسارى. 

سوعان قاراعاندا، تەنتەكتەردى تەزگە سالۋ پوليتسيا قىزمەتكەرى ءۇشىن دە وڭاي ەمەستەي كورىندى. مىندەتىمىز – كەشكى سەگىزدەن تاڭعى سەگىزگە دەيىن ەرتىس پوليتسيا بولىمىنە قاراستى اۋماقتاعى شاقىرتۋلارعا بارۋ. №220 ەكيپاج. ەكى ۋچاسكەلىك پوليتسيا، ءبىر جۇرگىزۋشى. ىسكە كىرىسىپ كەتتىك.

«جۇما نەمەسە سەنبى ەمەس، شاقىرتۋلار تۇسەر مە ەكەن» دەگەنىمشە بولعان جوق، بۋروۆ كوشەسىنە شاقىرتۋ ءتۇستى. الدىن الا حابارلاعانداي، ادام قايتىس بولعان ەكەن. ۇشىپ جەتسەك، ۋچاسكەلىك پوليتسيا ينسپەكتورى بارىپ، ءتيىستى حاتتامانى تولتىرىپ قويىپتى. مۇنداي جاعدايدا، الدىمەن پوليتسيا قىزمەتكەرلەرى مايىتتە ەشقانداي جاراقاتتىڭ جوعىنا كوز جەتكىزەدى، تۋىستارىمەن تىلدەسەدى. ەگەر ازامات ءوز ولىمىمەن قايتقان بولسا، جەدەل جاردەم كەلىپ، مايىتحاناعا جونەلتەدى. 

 د

ەكىنشى شاقىرتۋ ا.چەحوۆ كوشەسىنە ءتۇستى. بارساق، 50 جاستاعى ايەل ازاماتشانىڭ ۇيالى تەلەفونىنا «پوليتسيادان» دەپ بەلگىسىز بىرەۋلەر حابارلاسقانىن ايتىپ شاعىمداندى. قوڭىراۋ شالعاندار گ. ەسىمدى ازاماتشانىڭ اتىنا نەسيە راسىمدەمەك بولعانىن ەسكەرتىپ، كارتاسىن بلوكتاۋ كەرەك دەگەن كورىنەدى. ابىروي بولعاندا، ازاماتشا ولارعا ەشقانداي كود ايتپاعان. وسىنداي قوڭىراۋلار ءجيى تۇسە باستاعان سوڭ پوليتسيا كومەگىنە جۇگىنۋگە ءماجبۇر بولعان. شاقىرتۋىنا جەدەل جەتكەن جەرگىلىكتى پوليتسيا ينسپەكتورلارى قۋانىش ايبەك ۇلى مەن ەلدار سەرىك ۇلى مۇنداي قوڭىراۋعا مەيىلىنشە جاۋاپ بەرمەۋ كەرەكتىگىن ايتىپ ءتۇسىندىردى. جاۋاپ بەرگەن جاعدايدا دا، قىسقا عانا سويلەسكەن ءجون.

د

ينسپەكتورلاردىڭ ايتۋىنشا، جۇمىس كۇندەرى 70-كە جۋىق شاقىرتۋلارعا بارادى ەكەن. ال، جۇما، سەنبىدە جۇزدەن استام ازاماتتاردىڭ شاعىمىنا قۇلاق اسادى. بايقايمىن، حالىق بولماشى دۇنيەگە دە پوليتسيا شاقىراتىن كورىنەدى. ءار شاقىرتۋعا ينسپەكتورلار حاتتاما تولتىرادى نەمەسە راپورت جازادى. سوعان قاراعاندا، قاعاز بەن قالام شاق كەلمەيتىن سەكىلدى. 

ءۇشىنشى شاقىرتۋ قالانىڭ ىرگەسىندەگى «لەسحوز» شاعىن اۋدانىنا ءتۇستى. ايەل ازاماتشانى كورشىسى سوعىپ جىبەرگەن كورىنەدى. انىق-قانىعىنا بارعان سوڭ كوز جەتەدى.

...پوليتسەيلەردىڭ راتسيالارىندا بىج-بىج ەتىپ، مازا جوق. «لەسحوز» شاعىن اۋدانىنىڭ ورتالىق كوشەسىندەگى شامى جارقىراپ تۇرعان دۇكەن الدىنا توقتادىق. جابىرلەنۋشى ازاماتشا ءوزى كەلدى. جازعان ارىزىنا كوز سالساق، بۇرىنعى كۇيەۋىنىڭ ايەلى سوققىعا جىعىپتى. ءمان-جايدى انىقتاپ، ءتۇسىندىرۋ جۇمىستارىن جۇرگىزۋ ءۇشىن كۇيەۋىنىڭ ۇيىنە بەتتەدىك. قاتار كوشەدە تۇرادى ەكەن. ءتۇن ىشىندە ەسىگىن قاعىپ ءجۇرىپ وياتتىق. سويتسەك، كۇدىككە ىلىنگەن ايەل ارىزدانۋشىنى بۇل كۇنى مۇلدەم كورمەگەنىن ايتتى. جازا بەرسەك، شىم-شىتىرىق وقيعا. پوليتسەيلەر قوس تاراپقا دا ءتۇسىندىرۋ شارالارىن جۇرگىزدى. ونىڭ ۇستىنە، بۇل وتباسىلار بۇرىننان بەرى 102 ارناسىنا ءجيى قوڭىراۋ شالاتىن سەكىلدى.

ايتقانداي، ءتورتىنشى، بەسىنشى شاقىرتۋلارعا توقتاۋسىز بارا بەردىك. ءتۇن اۋا سانىنان جاڭىلدىق. ۋچاسكەلىك ينسپەكتورلار بىرىنە حاتتاما تولتىرسا، ەندى ءبىر جاعدايدا راپورت جازىپ ۇلگەرىپ ءجۇر. جۇمىستارى قاربالاس. مىنگەن كولىكتەرىندە دە، وزدەرىندە دە دامىلداۋعا مۇرشا جوق. كەزەكتى شاقىرتۋدان سوڭ كەلەسى مەكەنجايعا اسىعا شىعىپ بارا جاتتىق...

سوڭعى جاڭالىقتار

ءوڭىر جانە وركەنيەت

ساياسات • كەشە

اعا بۋىننىڭ قولداۋى

ساياسات • كەشە

ەسىمنەن كەتپەس ەساعاڭ

رۋحانيات • كەشە

بار ءۇمىت – بۋبليكتە

تەننيس • كەشە

وقىرماننىڭ رۋحاني ولجاسى

ەگەمەن قازاقستان • كەشە

ۇقساس جاڭالىقتار