الىس ساپارعا شىققاندا كىر جۋىپ, كىندىك كەسكەن شوق جۇلدىزداي شاعىن عانا تاسسۋاتتىڭ كوكىرەگىن قولامتانىڭ شوعىنداي قىزدىرىپ جۇرەتىنى بار. كۇش بەرەدى, قۋات دارىتادى. الاپات ساعىنىش جان دۇنيەسىن مەڭدەگەن سايىن الىپ-ۇشىپ اسىعاتىنى بار. تۋعان جەر دەگەن ىستىق قوي, شىركىن! وسى اۋىلدا تۋىپ-ءوستى, بالاۋسا ارمانى دا ءبۇر جاردى. بالاڭ كوڭىل قاشاندا شەتسىز, شەكسىز قيالشىل ەدى. بىراق سپورتشى بولامىن دەپ استە ويلاعان جوق. ءبارى 2017 جىلى باستالعان. سول جىلى ءزاۋى ءبىر سەبەپپەن اياعىنان ايىرىلىپ قالعانى. وتادان كەيىن بار دۇنيە كۇڭگىرت تارتىپ, بولاشاقتان كۇدەر ۇزگەندەي بولعانىن دا جاسىرا المايدى. كۇندەردىڭ ءبىر كۇنىندە تىرشىلىكتىڭ ارناسىن وزگەرتكىسى كەلگەن. قوس قاقپانىڭ اراسىنان جول تاپپاي, ابدىراپ قالعان ارۋ بۇل ءومىردىڭ كۇرەس ەكەنىن ۇققان. قيىندىقپەن كۇرەسە بىلگەندەر عانا جۇلدىزىن جاندىرماق. ەندەشە, بوركەمىك بولعان دۇرىس ەمەس. ءسويتىپ, سپورتپەن اينالىسا باستادى. وندا دا يادرو, نايزا, ديسك لاقتىرۋمەن. الگى زاتتاردى لاقتىرعاندا, يىعىنان باسقان, تۇلا بويىن جانىشتاپ جەرگە تىعىپ جىبەرگىسى كەلىپ تۇرعان تىرشىلىكتىڭ تاۋقىمەتىمەن. بويىنا بار كۇشىن جيناپ, سەرىپپەدەي شيىرىلىپ لاقتىرعاندا, قۇددى ءبىر نايزانى ەمەس, ءومىردىڭ قيىندىعىن, پەشەنەسىنە جازىلعان سىناقتىڭ سالماعىن لاقتىرعانداي ورشەلەنەتىن. از ۋاقىتتىڭ ىشىندە ءادىس-ءتاسىلىن مەڭگەرىپ الدى. تابيعات سىيلاعان قۋات تا ارناسىنان اسىپ-تاسىپ جاتقانداي.
– ومىردە نە بولمايدى؟! – دەيدى اسەم ءجانادىلوۆا, – ادام ەشقاشان قيىندىققا مويىنسۇنىپ, ۇنجىرعاسى تۇسپەۋى كەرەك. ءبىز مىناۋ جارقىن ومىردەن سىباعامىزدى كۇرەسىپ ءجۇرىپ الامىز. جالپى, تاعدىر ءور مىنەزدى, قايسار ادامداردى ۇناتادى. ال سپورت جىگەرىڭدى جانيتىن, ومىرگە دەگەن قۇشتارلىعىڭدى ارتتىراتىن, تۇلا بويىڭا شىمشىمداپ كۇش-قۋات دارىتاتىن ايرىقشا ونەر. وسى سپورت ارقىلى ءدام بۇيىرعان تالاي جەرگە بارىپ, جارىستارعا قاتىسىپ ءجۇرمىن. ەش كەمدىگى جوق. ءتىپتى بويىمداعى وكىنىش تاراپ, ءوزىم ءتارىزدى ادامداردى ەشتەڭەدەن تۇڭىلمەۋگە, قايتا قايراتتانۋعا شاقىرىپ جۇرەمىن.
العاشقى ايلار قيىن وتكەن. دەگەنمەن, ءۇمىت لەبى, كوكىرەكتەگى ادەمى ارمان ءبارىن جەڭەدى ەكەن. وبلىستىق جارىستاردا جۇلدەگە يە بولىپ ءجۇردى. وبلىستىق ء«ۇمىت» سپارتاكياداسىندا توپ جاردى. اتىراۋ قالاسىندا وتكەن يادرو لاقتىرۋدان ءبىرىنشى, ديسك لاقتىرۋدان ءبىرىنشى, نايزا لاقتىرۋدان ەكىنشى ورىنعا يە بولىپ, سپورت شەبەرى اتاندى. بيىل الماتى قالاسىندا ۇيىمداستىرىلعان رەسپۋبليكالىق جارىستا تاعى دا توپ جارعانىندا جاتتىقتىرۋشىسى دانيار بەكتەمىسوۆتىڭ قۋانىشىندا شەك بولعان جوق.
ەندى, مىنە, افريكا قۇرلىعىنىڭ ماروككو قالاسىندا وتەتىن الەمدىك جارىسقا اتتانىپ بارادى. ۇيىندە قالعان ۇلى مەن قىزىنا ازداپ الاڭداعانى بولماسا, كوڭىلدە ەش كۇدىك جوق. قوس پەرزەنتىن تاڭعى شىقتاي مولدىرەگەن انالىق اق ماحابباتىمەن ايالاپ, جاقسىنىڭ جالپاق دالاسىندا كوكتەمدە وسەتىن قىزعالداقتاي قۇلپىرتىپ, ءوسىرىپ كەلەدى. ولاردىڭ بويىنا دا ەمەننىڭ ءيىر بۇتاعىنداي قايسارلىق ءدانىن سىڭىرۋدە.
– الدىن كىم بولجاپ بىلگەن؟ – دەيدى كەيىپكەرىمىز, – باياعىدا تاسسۋاتتاعى اتالارىمىز بەن اجەلەرمىز «كەلەر كۇننەن كۇدەرىڭدى ۇزبە» دەپ اقىلدارىن ايتىپ وتىراتىن. دارقان دالانىڭ دانىشپانى – سول ادامداردىڭ جول سىلتەۋىمەن وستىك ەمەس پە؟ ەندى ءبىز دە كەيىنگىگە ومىردەن تۇيگەنىمىزدى ايتامىز. ايتۋ از, ءوز ىسىڭمەن ونەگە بولعان ءجون. ءوز باسىم وسىنداي جارىستاردا جەڭىسكە جەتكەن سايىن مۇمكىندىگى شەكتەۋلى جاندارعا ونەگەلى ۇلگى بولادى دەپ ەسەپتەيمىن.
اقمولا وبلىسى,
جارقايىڭ اۋدانى
