تەاتر ديرەكتورى اسحات ماەميروۆ بۇگىندە جازۋشىنىڭ شىعارمالارى وزەكتىلىگىن جوعالتپاي ءالى كۇنگە دەيىن كوپتەگەن قازاق تەاترىنىڭ ساحناسىندا قويىلىپ جۇرگەنىن, سونىمەن قاتار مۋزىكالىق جاس كورەرمەن تەاترى ەڭ العاشقى شىمىلدىعىن «اباي-توعجان» مۋزىكالىق دراماسىمەن اشىپ, ونى جىل سايىن ادەتكە اينالدىرعانىن اتاپ ءوتتى. سونداي-اق جاڭا ماۋسىمدا تەاتر ۇجىمى كورەرمەنگە تىڭ تۋىندىلاردى ۇسىناتىنىن, حالىقارالىق فەستيۆالدەرگە قاتىساتىنىن حابارلادى.
ءۇشىنشى ماۋسىمنىڭ اشىلۋىنا قازاق كسر ەڭبەك سىڭىرگەن ءارتىسى, قازاقتىڭ «قىز جىبەگى» مەرۋەرت وتەكەشەۆا, قازاقستاننىڭ ەڭبەك سىڭىرگەن قايراتكەرى, ءانشى-كومپوزيتور دونەدىل قاجىموۆ, باسقا دا ەلوردالىق زيالى قاۋىم مەن جۋرناليستەر قاتىستى.
– بۇگىنگى جاڭا ماۋسىمنىڭ اشىلۋىمەن بارشاڭىزدى قۇتتىقتايمىن. سونىمەن قاتار بيىل قازاق ادەبيەتىنىڭ كلاسسيگى, ۇلتتىق دراماتۋرگيانىڭ الىبى مۇحتار اۋەزوۆتىڭ تۋعانىنا 125 جىل تولعالى وتىر. بۇيىرسا, قازاق ەلىندە ۇلكەن توي بولادى. سول تويدىڭ باستاماسى رەتىندە مۇحتار اۋەزوۆتىڭ قويىلىمىمەن باستاۋ العاندارىڭىز بارلىعىمىزدى قۋانتادى. بۇگىنگى قويىلىمداعى اباي مەن توعجاننىڭ كىرشىكسىز ماحابباتتى – ءناپ-نازىك ىڭكارلىكتىڭ بەلگىسى. ول ىڭكارلىك ادامعا ءبىر جىلۋلىق, تازالىق سىيلايدى. ونەردىڭ دە بار قۇدىرەتى وسى ەمەس پە؟! كورەرمەننىڭ جانىن جىلىتۋ, سەزىمىن قوزعاۋ. ساحناداعى ارتىستەر دە ءوز شەبەرلىكتەرىمەن جاستاردىڭ ساناسىن ءبىر سىلكىنتتى دەپ ويلايمىن, – دەدى مەرۋەرت وتەكەشەۆا.
ادامزات تاريحىنداعى ءبىرتۋار تۇلعالاردىڭ بولمىس-بىتىمىندەگى جاسامپاز رۋح – بالالىق شاقتان باستاۋ الادى. «اباي-توعجان» مۋزىكالىق دراماسى – بۇگىنگە دەيىنگى ۇلى اقىن جايلى قويىلعان شىعارمالاردان بولمىسى بولەك, بەينەسى ەرەك جاڭا تۋىندى. بالالار مەن جاسوسپىرىمدەردىڭ دۇنيەتانىمىنا, تالعامىنا, رۋحاني بولمىسىنىڭ قالىپتاسۋىنا اسەر ەتەتىن بۇل قويىلىم اباي عۇمىرىنىڭ بوزبالا كەزەڭىنەن كورىنىس بەرەدى.
جاس ابايدىڭ جۇرەگىندە ويانعان العاشقى ماحابباتى, كوكىرەگىندە تۋعان تۇڭعىش جىرى اۋەزدى انگە اينالىپ, ىشكى سەزىم تەبىرەنىستەرىن الاساپىران كۇيگە سالادى. توعجانعا دەگەن ىڭكار سەزىم – ومىرگە دەگەن قۇشتارلىققا ۇلاسىپ, ابايدىڭ ادامزاتقا دەگەن اسقاق ماحابباتىنىڭ تەمىرقازىعىنا اينالدى. قۇنانبايداي اكەنىڭ ونەگەسى, ۇلجانداي انانىڭ تاربيەسى, قورشاعان ورتانىڭ تىلسىم سىرى, عاشىقتىقتىڭ عالاماتى, دوس پەن باۋىردىڭ قادىرى جاس كورەرمەننىڭ جانىنا رۋحاني ءلاززات سىيلاپ, ساناسىنا كوركەم كوزقاراس قالىپتاستىرۋعا ىقپال ەتەدى. اباي پوەزياسىنداعى ويلى جىرلار مەن ەستى اندەر ورىندالاتىن قويىلىمدا ۇلتىمىزدىڭ قۇندىلىقتارى ساحنا بيىگىنە كوتەرىلەدى.
ايتا كەتەيىك, مۋزىكالىق درامانىڭ ينستسەنيروۆكا اۆتورى – ميراس ءابىل, رەجيسسەرى – اسحات ماەميروۆ, مۋزىكالىق كەڭەسشى – ديماش قۇدايبەرگەن, قويۋشى-سۋرەتشى – الما سىرباەۆا, كومپوزيتورى – باۋىرجان اقتاەۆ, بالەتمەيستەرى – شىرىن مۇستافينا, حورمەيستەرى – عالىمجان بەرەكەشەۆ.
ال ابايدىڭ رولىندە ءدىنيسلام نۇرماعامبەتوۆ, توعجان – ارەلانا امانگەلديەۆا, قۇنانباي – التىنبەك امانقۇلوۆ, ۇلجان – سامال ەسلياموۆا, وسپان – جاسۇلان ابدراحمان.
ءار جاڭا ماۋسىم – كەز كەلگەن ونەر ۇجىمى ءۇشىن جاڭا بەلەس. تەاتر رەپەرتۋارىن ءتۇرلى باعىتتاعى سپەكتالدەرمەن تۇرلەندىرىپ, تالاي دودادا توپ جارعان ونەرلى ۇجىمنان بيىلعى ماۋسىمىندا دا جاقسى جاڭالىقتار كۇتەمىز.
