سۋرەتتى تۇسىرگەن اۆتور
ەكىنشى دۇنيەجۇزىلىك سوعىستا ەرەن ەرلىك كورسەتكەن باتىر اتىنداعى ساياباق قازىبەك بي مەن ءىلياس ەسەنبەرلين داڭعىلدارىنىڭ قيىلىسىندا ورىن تەپتى. ال قولادان قۇيىلعان ەسكەرتكىشتىڭ بيىكتىگى تۇعىرىمەن قوسا ەسەپتەگەندە 8,5 مەتردەي. گەنەرالدىڭ بولمىسىن سيپاتتايتىن ءمۇسىن شىنىمەن دە ءساتتى شىققان.
– قۇرمەتتى جەرلەستەر, بۇگىن – وبلىسىمىز بەن وسكەمەن قالاسى ءۇشىن ايتۋلى كۇن. سەبەبى ءبىز كەڭەس وداعىنىڭ باتىرى, تاۋەلسىز قازاقستاننىڭ تۇڭعىش قورعانىس ءمينيسترى, حالىق قاھارمانى, ارميا گەنەرالى ساعادات نۇرماعامبەتوۆكە ارنالعان ەسكەرتكىشتىڭ اشىلۋ سالتاناتىنا ارنايى جينالىپ وتىرمىز. ساعادات قوجاحمەت ۇلىنىڭ ءومىر جولى بارشا قازاقستاندىققا ۇلگى-ونەگە بولۋعا ءتيىس. ونىڭ تاۋەلسىز قازاقستاننىڭ قارۋلى كۇشتەرىن قالىپتاستىرۋ جانە دامىتۋ جولىنداعى اتقارعان ەڭبەگى وراسان زور. وسى رەتتە ساعادات قوجاحمەت ۇلى قازاقستانداعى حالىق قاھارمانى جانە ارميا گەنەرالى دەگەن اتاقتارعا يە بولعان ءبىرىنشى ادام ەكەنىن دە ەرەكشە اتاپ وتكىم كەلەدى. ءبىزدىڭ مىندەتىمىز – باتىرعا لايىقتى قۇرمەت كورسەتۋ, داڭقتى تۇلعانىڭ رۋحىن جاڭعىرتۋ. گەنەرالدىڭ ەرلىگى مەن ەڭبەگىن ناسيحاتتاۋ ماقساتىندا سالىنعان ساياباق حالىقتىڭ سۇيىكتى دەمالىس ورنىنا اينالادى دەپ سەنەمىن, – دەدى سالتاناتتى
جيىنعا ارنايى كەلگەن ايماق باسشىسى دانيال احمەتوۆ.
سونىمەن قاتار ساعادات نۇرماعامبەتوۆتىڭ شاكىرتى ءارى ارىپتەسى, گەنەرال-لەيتەنانت بولات جاناساەۆ پەن داڭقتى قولباسشىنىڭ نەمەرەسى ليرا نۇرماعامبەتوۆا دا جىلى ەستەلىكتەرىمەن ءبولىسىپ, وسىنداي ساياباق پەن ەسكەرتكىشتىڭ اشىلۋىنا ۇلەس قوسقان ەل اعالارىنا العىستارىن ايتتى.
ال ەسكەرتكىشتىڭ لەنتاسىن ەكىنشى دۇنيەجۇزىلىك سوعىستىڭ ارداگەرى قۇرمات راحيموۆ پەن حالىق قاھارمانى, گەنەرال-لەيتەنانت باقىتجان ەرتاەۆ قيدى. جينالعان قاۋىم باتىر بابا رۋحىنا تاعزىم ەتىپ, ەسكەرتكىشىنە گۇل شوقتارىن قويدى.
اۋماعى ءبىر جارىم گەكتار جاڭا ساياباق وتباسىمەن دەمالۋعا تاپتىرماس ورىن ەكەن. ءتورت سۋبۇرقاق, تەرراسا, 100-گە جۋىق ورىندىق پەن ساۋلەت ونەرىنىڭ وزگە دە تۋىندىلارى كوزدىڭ جاۋىن الادى. ساياباق اۋماعىنا 200-گە جۋىق ءتۇپ اعاش وتىرعىزىلىپ, جەرىنە سۋ جاڭا گازوننىڭ توسەلۋى دە كەلۋشىلەردى قۋانتاتىنى ءسوزسىز.
شىعىس قازاقستان وبلىسى
