مەملەكەتتىك باسقارۋ جۇيەسىندە شەشىم قابىلداۋدا ءبىر-بىرىنە سىلتەۋ, جاۋاپكەرشىلىكتەن قاشۋ ءجيى كەزدەسەدى. ءوزىنىڭ جولداۋىندا ق.توقاەۆ مەملەكەتتىك باسقارۋ ءىسىن قايتا جاڭعىرتۋ تۋرالى ايتتى. «ەكونوميكانى تۇبەگەيلى رەفورمالاۋ ءۇشىن مەملەكەتتىك باسقارۋ جۇيەسىنە سەرپىلىس قاجەت. جۇرت بوس سوزدەن, جارقىن بولاشاق تۋرالى جالىندى ۇرانداردان جالىقتى. حالىق مەملەكەتتىك ورگانداردىڭ ءوز ۋادەسىن قاعاز بەتىندە ەمەس, ءىس جۇزىندە ورىنداعانىن قالايدى», دەدى ول.
بيلىكتىڭ بارلىعىن ءبىر قولدا جيناماي, ونى تومەنگىلەرمەن ءبولىسۋ تۋرالى ويمەن كەلىسەمىن. جەرگىلىكتى اكىمدەرگە قۇزىرەت پەن جاۋاپكەرشىلىكتى بەرۋ ۇسىنىسى ورىندى. مەملەكەتتىك قىزمەتكەر ەسەپ بەرۋمەن ەمەس, اۋىلدىڭ, قالانىڭ ماسەلەسىمەن ناقتى اينالىسۋعا ءتيىس. ونىڭ قولىندا قاراجاتى, ونى جۇمساي الاتىن قۇزىرەتى مەن مۇمكىندىگى بولماي, جاعداي وزگەرمەيدى.
قوعامدى قۋانتقانى, بالالاردىڭ بولاشاعىنا قاتىستى ايتىلعان جاقسى ۇسىنىستار. بىلتىر ەلىمىزدە 446 مىڭنان استام ءسابي دۇنيەگە كەلگەن. ال بيىل, بۇيىرسا, ودان دا كوبىرەك بولادى. بۇل – قۋانىشتى.
بيىل مەكتەپ تابالدىرىعىن 400 مىڭداي بالا العاش رەت اتتاپ وتىر. جىل سايىن بۇل كورسەتكىش كوبەيە بەرمەك. ەلىمىزدە بيىل 80 جاڭا مەكتەپ اشىلعان. جالپى, ەلىمىزدە 18 جاسقا دەيىنگى جاس ازاماتتار سانى 6 ملن 300 مىڭنان استام. وسى بالالاردىڭ بولاشاعى قالاي بولادى ەكەن دەپ ويلايسىڭ.
بيىلعى بالالار جىلىندا جاقسى جاڭالىقتىڭ ءبىرى جولداۋدا جاريا ەتىلگەن «ۇلتتىق قور – بالالارعا» اتتى باعدارلامانىڭ 2024 جىلدان باستاپ ىسكە اسۋى بولماق. ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالاردىڭ ارناۋلى جيناقتاۋشى ەسەپشوتىنا اۋدارىلادى. بۇل قارجى ءار بالا 18 جاسقا تولعانعا دەيىن اۋدارىلىپ تۇرادى, ونى مەرزىمىنەن بۇرىن ەسەپشوتتان شىعارىپ الۋعا بولمايدى.
ينفوگرافيكانى جاساعان امانگەلدى قياس, «ەQ»
ەسەپشوتتاعى قاراجاتتى ەكى ماقساتقا پايدالانۋعا بولادى: ءبىرىنشىسى – باسپانالى بولۋعا, ەكىنشىسى – ءبىلىم الۋعا.
دۇنيەگە كەلگەن ءار ءسابي ءوز نەسىبەسىمەن تۋادى عوي. بالانىڭ بولاشاعىن ەڭ الدىمەن اتا-اناسى ويلايدى. بالاعا لايىقتى جاعداي جاساۋ, دۇرىس تاربيە بەرۋ, ءبىلىم بەرىپ, وقىتۋ – اتا-اناسىنىڭ پارىزى. ال مەملەكەتتىڭ مىندەتى – قولداۋ كورسەتۋ. 6 ملن 300 مىڭ بالا ۇلتتىق قوردان تابىس كورسە, «الەۋمەتتىك مەملەكەت» دەگەن وسى عوي. بۇل تۋرالى بۇرىننان ايتىلىپ كەلە جاتىر. دامىعان ەلدەر بولماسا, بۇنداي قادامعا بارعان ەلدەر از. دامىعان ەلدەردىڭ ىشىندە قورلارىنان تابىس تولەيتىنى ودان دا از.
بۇل قادامنىڭ بالانى تولىق قامتاماسىز ەتپەسە دە پايدالى جاقتارى كوپ. ماسەلەن, دەموگرافيالىق كورسەتكىشتى جاقسارتۋعا سەبەپشى بولادى, بالانىڭ وتانعا دەگەن سەزىمىن كۇشەيتەدى. ياعني بالا مەملەكەتىنىڭ قامقورلىعىن, ءوزىنىڭ كەرەك ەكەنىن سەزەدى. مەملەكەت ءۇشىن ونىڭ قايتارىمى مىندەتتى تۇردە بولادى. سونداي-اق ونىڭ ادىلەتتىلىك جاعى دا بار. ءيا, ەلىمىزدىڭ بايلىعى مول. ونى بارلىق ازاماتتاردىڭ پايدالانۋى ابدەن دۇرىس.
الەۋمەتتىك دەپ جاريالايتىن مەملەكەت ءۇشىن جاس ازاماتتار الدىنداعى جاۋاپكەرشىلىگى بولعانى دۇرىس. بالاعا جۇمسالعان ينۆەستيتسيا – ەڭ پايدالى دا باياندى ينۆەستيتسيا.
ەلدوس جۇماعۇلوۆ,
ساياساتتانۋشى
قاراعاندى
