بەينەبايلانىس ارقىلى وتكەن ىنتاماقتاستىق جيىنىندا الماتى وبلىسىنىڭ ينۆەستيتسيالىق تارتىمدىلىعى مەن ەكى ەل كاسىپكەرلەرىنىڭ بىرلەسكەن جوبالارى تۋرالى دا ءسوز بولدى. بۇگىندە وڭىرگە ينۆەستيتسيا تارتۋ باعىتى بويىنشا ناقتى شارالار قابىلدانعان, ونىڭ ناتيجەسى دە جوق ەمەس. مىسالعا, قازىر الماتى وبلىسى الەم بويىنشا 97 ەلمەن ساۋدا ىنتىماقتاستىعىن جۇرگىزۋدە. بيىلعى 7 ايدا وبلىستاعى ەكسپورت اينالىمى 179,9 ملن اقش دوللارىن قۇرادى. بۇدان باسقا شەتەلدىك ينۆەستورلاردىڭ قاتىسۋىمەن اشىلعان, جالپى قۇنى 1,3 ملرد اقش دوللارى بولاتىن 19 جوبا جۇزەگە اسىرىلۋدا. بۇل 6 500 جۇمىس ورنىن قۇرۋعا مۇمكىندىك بەرەدى.
وسى ساناتتا كورشىلەس قىتاي ەلىمەن دە ساۋدا-ساتتىق, ونەركاسىپتىك بايلانىس تەرەڭدەپ وتىر. اتاپ ايتقاندا, ينۆەستيتسيالىق پورتفەلى 94,5 ملرد تەڭگە بولاتىن جانە 350 ادامعا تۇراقتى جۇمىس ورنىن ۇسىناتىن «جەتىسۋ ۆولفرامى» جوباسى بويىنشا كەلىسىم ىسكە قوسىلۋ ساتىسىندا ەكەن. جوبا بويىنشا قىتاي ەلىنىڭ ينۆەستورلارى الماتى وبلىسىنىڭ اۋماعىنداعى «بۇعىتى» ۆولفرام كەن ورنىن يگەرۋگە كىرىسكەن. ال تاعى ءبىر ايتۋلى جوبا – «جەتىوزەننىڭ قۋاتى» جوباسى جالپى ينۆەستيتسيا سوماسى 37,4 ملرد تەڭگەنى قۇرايتىن, قۋاتى 60 مۆت بولاتىن «شەلەك» جەل ەلەكتر ستانساسىنىڭ قۇرىلىسىن جۇزەگە اسىرادى. جوبا ىسكە قوسىلعاندا 30 ادامعا تۇراقتى جۇمىس ورنى اشىلماق.
– الماتى وبلىسى مەن قىتاي حالىق رەسپۋبليكاسى اراسىنداعى ەكونوميكالىق قاتىناستاردىڭ قازىرگى جاعدايى جاڭا بىرلەسكەن جوبالاردى ىسكە اسىرۋ بويىنشا ۇلكەن مۇمكىندىكتەر اشادى. بۇگىندە لوگيستيكا, تۋريزم, اۋىل شارۋاشىلىعى, جاڭارتىلاتىن ەنەرگيا كوزدەرى, وڭدەۋ ونەركاسىبى, قۇرىلىس ماتەريالدارىن ءوندىرۋ جانە فارماتسەۆتيكا سىندى ەكونوميكانىڭ سالالارى ءوڭىردى دامىتۋدىڭ باسىم باعىتتارى بولىپ وتىر. ەلىمىزدىڭ وڭتۇستىك-شىعىسىندا ورنالاسقان ءبىزدىڭ وبلىس پەن كورشى ەلمەن ورتاق شەكاراسى 300 شاقىرىمنان اسادى. جانە الماتى وبلىسى – « ۇلى جىبەك جولى» بويىندا جاتقان ءتورت وبلىستىڭ ءبىرى, سونداي-اق ءوڭىر «باتىس ەۋروپا – باتىس قىتاي» حالىقارالىق ماڭىزى بار اۆتوموبيل ءدالىزىنىڭ اجىراماس بولىگى سانالادى. ياعني ەكىجاقتى سەرىكتەستىكتىڭ سەرپىن الاتىن ءساتى تۋدى, – دەيدى الماتى وبلىسىنىڭ اكىمى مارات سۇلتانعازيەۆ.
ياعني الماتى وبلىسىنىڭ ترانسكونتينەنتالدى ءدالىز بويىندا ورنالاسۋى ايماق ءۇشىن عانا ەمەس, تۇتاس ەل ەكونوميكاسىنا تابىس اكەلەتىن جوبالاردى جۇزەگە اسىرۋعا مۇمكىندىك بەرەدى. ال كورشى مەملەكەت ءۇشىن شىعىس قاقپاداعى ايماقپەن ارىپتەستىك 183 ملن شاماسىنداعى ادامي الەۋەتى بار ەۋرازيالىق ەكونوميكالىق وداق نارىعىنا شىعۋدىڭ ءتيىمدى جولى بولىپ وتىر.
ايتپاقشى, ءدال وسى ترانسكونتينەنتالدى ءدالىز بويىنشا ساۋدا جانە ەكونوميكالىق ارىپتەستىكتى دامىتۋ ماسەلەلەرى قازاقستان – قىتاي ىنتىماقتاستىعى بويىنشا «دوستىق ديالوگى» اتتى تەلەكوپىردە كەڭىنەن تالقىلاندى. ال جيىن قورىتىندىسىندا الماتى وبلىسىنىڭ اكىمى مارات سۇلتانعازيەۆ پەن قىتايدىڭ شۇار حالىق ۇكىمەتىنىڭ توراعاسى ەركىن تۋنياز شىڭجاڭ وڭىرىمەن باۋىرلاستىق بايلانىس ورناتۋ نيەتى تۋرالى حاتتاماعا قول قويدى.
الماتى وبلىسى
