پرەزيدەنتكە اگەنتتىك جۇرگىزىپ جاتقان مونوپولياعا قارسى تەرگەۋ جۇمىستارى تۋرالى اقپارات بەرىلدى.
جىل باسىنان بەرى باسەكەلەستىكتى قورعاۋ زاڭناماسىن بۇزۋ بەلگىلەرى بار 293 حابارلاما بەرىلگەن, ونىڭ 78 پايىزى ءوز ەركىمەن ورىندالدى.
مارات وماروۆ اگەنتتىك جۇمىسىنداعى نەگىزگى ستراتەگيالىق باعىتتاردى اتادى, ولار: باسەكەلەستىكتى دامىتۋ جانە قورعاۋ بويىنشا ءتيىمدى جۇمىستى قامتاماسىز ەتۋ, ءوندىرىستىڭ نەگىزگى فاكتورلارىنىڭ كاسىپكەرلىك سۋبەكتىلەرىنە تەڭدەي قولجەتىمدى بولۋىن قامتاماسىز ەتۋ, جەكە باستامانى قولداۋ جانە باسەكەلەستىك الاڭىن فاۆوريتيزمنەن تازارتۋ.
«مەملەكەت باسشىسىنا جولداۋدا ايتىلعان, سونىڭ ىشىندە بىرىڭعاي وپەراتورلاردى قىسقارتۋ جانە كونگلومەراتتاردىڭ قىزمەتىن رەتتەۋ بولىگىندە بەرىلگەن تاپسىرمالارىن جۇزەگە اسىرۋ جوسپارلارى تۋرالى باياندالدى. اگەنتتىك مەملەكەتتىك قولداۋ شارالارىنىڭ تەڭدەي قولجەتىمدى بولۋىن قامتاماسىز ەتۋگە, ەكونوميكاداعى جەكە كاسىپكەرلىكتىڭ ۇلەسىن ارتتىرۋعا, ەكونوميكانىڭ نەگىزگى سالالارىندا باسەكەلەستىكتى دامىتۋ جۇمىسىنا ەرەكشە كوڭىل بولەدى», دەلىنگەن حابارلامادا.
كەزدەسۋ سوڭىندا پرەزيدەنت اگەنتتىك باسشىسىنا بىرقاتار ناقتى تاپسىرما بەردى.
