ءىس-شارا بارىسىندا سەنات توراعاسى, سەزد حاتشىلىعىنىڭ باسشىسى ماۋلەن اشىمباەۆ فەستيۆالدى ۇيىمداستىرۋشىلار مەن قاتىسۋشىلارعا العىسىن ءبىلدىردى. سەنات سپيكەرى كونتسەرتتىك باعدارلامانىڭ «We are the world» دەپ اتالۋى سيمۆوليكالىق مانگە يە ەكەنىن ايتتى. سونداي-اق ول دىنارالىق جانە وركەنيەتارالىق ديالوگتىڭ الاڭىنا اينالعان الەمدىك جانە ءداستۇرلى دىندەر ليدەرلەرىنىڭ VII سەزىنىڭ تاريحي ماڭىزىنا توقتالدى.
«الداعى سەزد بىرەگەي جانە تاريحي ماڭىزعا يە. وعان قازىرگى تاڭداعى اسا كورنەكتى دىندەر ليدەرلەرى قاتىسادى. فورۋمدا قازىرگى جاعدايدا بەيبىتشىلىكتى, ىنتىماقتاستىقتى جانە ديالوگتى نىعايتۋ ماسەلەلەرى تالقىلانادى دەپ جوسپارلانىپ وتىر», دەدى ماۋلەن اشىمباەۆ.
سونىمەن قاتار سەنات سپيكەرى قازاقستاندىق دامۋ ۇلگىسىنىڭ بىرەگەيلىگىنە جانە دۇرىس قۇندىلىقتاردى دارىپتەۋدەگى جاستاردىڭ رولىنە نازار اۋداردى.
«قازىرگى تاڭدا دۇنيەجۇزى ءبىزدىڭ ەلىمىزدى الەمدىك قوعامداستىقتىڭ بەلسەندى مۇشەسى رەتىندە تانيدى. ەلىمىزدە 100-دەن استام ەتنوس وكىلدەرى تاتۋ ءومىر سۇرۋدە. سوندىقتان قازاقستان بەيبىتشىلىكتىڭ مەكەنى دەپ ايتۋعا تولىق نەگىز بار. بۇگىنگى فەستيۆالدىڭ ءمانىن «قازاقستاندىق جاستار بەيبىتشىلىكتى قولدايدى» دەگەن سوزبەن سيپاتتاۋعا بولادى. ونەرلى جاستارىمىز ەلىمىزدە بەيبىتشىلىك پەن كەلىسىمدى ءارى قاراي دامىتۋعا ءوز ۇلەستەرىن قوسا بەرەدى دەپ سەنەمىز», دەدى ماۋلەن اشىمباەۆ.
ءىس-شارا بارىسىندا Ninety One, Orynkhan, Tamiris, Darkhan Juzz, Qonyratbay fam, MAKVIN, مارحابا ءسابي, Drummattack, DJ Puza جانە تاعى باسقا وتاندىق انشىلەر ونەر كورسەتتى.
ايتا كەتكەن ءجون, مۋزىكالىق فەستيۆالدان تۇسكەن قاراجات قوستاناي وبلىسىنداعى تابيعي ورتتەن زارداپ شەككەندەرگە كومەك كورسەتۋ ءۇشىن اشىلعان قايىرىمدىلىق قورىنا جىبەرىلەدى.
