قازاقستاندى سىرت ەلدەردىڭ ەكونوميكالىق, رۋحاني-مادەني ەكسپانسياسىنا ۇشىراپ, شەتەلدىك جاعىمسىز ىقپالدارعا شاراسىزدىق تانىتىپ, ۇلتتىق يممۋنيتەتىن كوتەرە الماي وتىرعان ەل رەتىندە قاراستىراتىندار كوپ. جوعارىداعى ايتىلعان كوزقاراستاعى ازاماتتاردىڭ ەلىمىزدىڭ شەتەلدىكتەردىڭ ەكونوميكالىق جانە رۋحاني-مادەني اگرەسسياسىنا لايىقتى قارسىلىق تانىتا الماي وتىرعانىن مەڭزەيتىن پىكىرلەرىن باق-تا, الەۋمەتتىك جەلىلەردە كوپتەپ كەزدەستىرۋگە بولادى. ارينە, سونداي پىكىرلەردىڭ بارلىعىنا بىردەي باس شۇلعىپ كەلىسە بەرۋگە بولماس, بىراق اراسىندا شىندىققا جاناساتىندارى بارشىلىق.
ينتەرنەت جەلىلەرى ارقىلى ەنتەلەي, ەش كەدەرگىسىز ومىرىمىزگە ەنىپ جاتقان, ۇلتتىق قۇندىلىقتارىمىزعا مۇلدە قاراما-قايشى ءتۇرلى كورسەتىلىمدەر, وزەگىنە جىمىسقى كوزقاراسىن بۇككەن جاريالانىمدار, جان تۇرشىكتىرەر اقپاراتتار اعىنىنا شەكتەۋ قويۋ ارمانعا اينالدى. ولارعا باقىلاۋ جاساپ, توقتام سالۋ مۇمكىندىگى وتە تومەن جاعدايدا. بۇل ماسەلەدە شاراسىزدىعىمىز جۇرەكتى جانشيدى.
ينتەرنەت الەمى – ۇسىناتىن ءونىمىنىڭ ىشىندە جاقسىسى دا, جامانى دا, جاقۇتى دا, جاسىعى دا كەزدەسەتىن ۇلكەن الاڭ. مىنە, سول الاڭنان وزىمىزگە كەرەگىن, جاقسىسى مەن جاقۇتىن ەكشەپ, تالعاپ الۋعا ۇندەيتىن, سوعان زاڭ جۇزىندە ماجبۇرلەيتىن ءبىر تەتىك كەرەك-اق بولىپ تۇر. بىراق بۇل قول جەتپەس ارمان سەكىلدى. دەسەك تە, ەڭ قۇرىعاندا جاس بالالارىمىزدىڭ ساناسىن ۋلايتىن, جانىن جاداعايلاندىراتىن, تاريحي تامىرىنان, ۇلتتىق تانىمىنان اداستىراتىن ونىمدەرگە شەكتەۋ, باقىلاۋ قويۋعا بولادى عوي. بۇلاي دەۋىمىزگە باقىلاۋعا الۋعا مۇمكىندىك بەرەتىن, ادەپسىز, جۇگەنسىز شىعارىلىمدار مەن جاريالانىمداردى ۇسىنۋىنا توقتام سالۋعا بولاتىن وتاندىق تەلەارنالاردىڭ كەيبىر ءجونسىز ءىس-قيمىلدارى كوزگە ۇرىپ تۇراتىنى سەبەپ بولىپ وتىر. بۇل قالاي؟
جاقىندا «بازز لايتەر» اتتى ءمۋلتفيلمنىڭ ەلىمىزدە پروكاتقا شىعۋىنا تىيىم سالىندى. بۇل ءبىرجىنىستى جۇپتىق ءومىردى كورسەتەتىن مۋلتفيلمگە قوعام ورە تۇرەگەلە قارسى شىعىپ, اقىرىندا مادەنيەت جانە سپورت ءمينيسترى ارالاسىپ بارىپ قانا ونىڭ پروكاتقا شىعۋىنا تىيىم سالىندى. بۇل كوزگە كورىنىپ قالعانى عانا. ال قوعام نازارىن اۋدارا قويماعان, بىراق كەيبىر تۇستارىندا اسا زياندى, بىرنەشە سەكۋندقا عانا سوزىلسا دا ادەپسىز, جات قىلىعىمەن بەتىڭدى دۋىلداتاتىن كورىنىستەرى ءجيى قايتالاناتىن انيماتسيالىق فيلمدەر وتاندىق تەلەارنالاردا قاپتاپ ءجۇر.
الەمگە داڭقى جايىلعان, انيماتسيالىق فيلمدەرىمەن ادامزاتتىڭ اقىل-ويىنا بارىنشا اسەر ەتىپ, ءوز ونىمدەرىمەن جاھانداعى جاس ۇرپاقتى اشسا الاقانىندا, جۇمسا جۇدىرىعىندا ۇستاپ وتىرعان, ۇلتتىق قۇندىلىقتارعا ويسىراتا سوققى بەرىپ, جاڭا ءداۋىردىڭ ءوزىن ءوزى اقتاي قويۋى قيىن جاڭاشا تاربيەسىنە ءۇيىرىپ اكەتىپ بارا جاتقان كومپانيالاردىڭ بارشاعا ءماشھۇر تۋىندىلارىن قازاقشاعا اۋدارىپ بەرۋ ءۇردىسىن قانشا جەردەن اقتاپ, ماقتاپ, جاقتاساق تا سول ونىمدەردىڭ بىرقاتارىنىڭ حالقىمىزدىڭ ۇلتتىق بولمىسىنا قايشى, تانىم-تۇسىنىگىنە كەراعار, كەيبىر تۇستارى انايى كەلەتىنىن قاپەرگە الار ەمەسپىز. جوعارىدا ايتقان رۋحاني شەكارامىزدىڭ ءبىر وسال تۇسى, ياعني «احيللەستىڭ وكشەسى» وسى جەردە ەكەنىن ايتقىمىز كەلەدى.
اۋدارما انيماتسيالىق فيلمدەردىڭ كەيبىرىنە قاراپ وتىرىپ جاس ۇرپاقتى «بەلدەن تومەن» عانا ويلاۋعا باۋلۋدىڭ زاماناۋي قيتۇرقى ادىسىنە جەم بولىپ جاتقانىمىزعا كوزىمىز جەتە تۇسەتىندەي. كەيدە ماعان وتاندىق كەيبىر باق-تار «قوي تەرىسىن جامىلعان قاسقىر» سەكىلدى كورىنىپ كەتەدى. وسىعان وراي ءبىر مىسال كەلتىرە كەتەيىن. جاقىندا بالالارىم ءبىر ارنادان «ساراي كورگيلەرى» دەگەن ءمۋلتفيلمنىڭ ءبىر بولىگىن كورىپ وتىر ەكەن. قوسىلىپ تۇرعان سوڭ سەنىمدى تۇردە مەن دە قاراپ وتىردىم. كەنەت ماسقارا باستالدى دا كەتتى. بالالارىم تومەن قاراي قالدى. مەن كىرەرگە تەسىك تاپپاي قىسىلدىم. كورىنىستى بايانداپ ۋاقىت المايىن. ونىڭ ۇستىنە ايتۋعا ۇيات.
بالالارمەن بىرگە وتىرىپ تەلەديدارعا قاراۋ مۇمكىن ەمەس مىنا زاماندا سەنىمگە دە سەلكەۋ تۇسە باستادى. قالاي دەسەك تە سىرتتان اعىلىپ كەلىپ جاتقان, ۇلتتىق بولمىسىمىزعا كەرەعار جاريالانىمدارعا توسقاۋىل قويا الماساق, وندا ءوزىمىزدىڭ وتاندىق «يبالى» ونىمدەردى ولارمەن باسەكەلەستىرىپ, سونىڭ ناتيجەسىندە سىرتقى كۇشتى السىرەتۋگە يەك ارتۋىمىز كەرەك. ولاي بولماسا, شەكارامىز شەگەندەۋلى بەرەكەلى ەلمىز دەپ ماقتانۋدىڭ ەشقانداي دا ءمانى جوق.
