شىمكەنت ەلىمىزدىڭ تۋريستىك ورتالىعىنا اينالادى

شىمكەنتتە ءتۋريزمدى دامىتۋ ماقسا­تىندا قالاداعى ينفراقۇرىلىمدارعا مو­نيتورينگتىك جۇمىستار جۇرگىزىلىپ جاتىر. ياعني سىرتتان تۋريست كەلگەندە قانداي جەرلەرگە بارادى؟ وسى ماسەلەگە الدىمەن كوڭىل بولىنۋدە. مەگاپوليستە جۇزگە جۋىق تۋريستىك نىسان بار. سونىڭ ىشىندەگى ەڭ ماڭىزدىسى ءارى شوقتىعى بيىگى ول – تسيتادەل. ياعني ەسكى قالا اۋماعىنداعى بۇرىنعى قالپىنا كەلتىرىلگەن قورعان عيماراتى. تاريحي قۇندىلىعىنا وراي ول الەۋمەتتىك جەلىلەردە باسقا دا جارنامالىق قۇرالدار ارقىلى ناسيحاتتالىپ وتىرادى. سودان سوڭ قالانىڭ ماقتانىشى سانالاتىن دەندرولوگيالىق ساياباق بار. ول جەردە تال-تەرەكتىڭ, اعاشتاردىڭ 500-دەن اسا ءتۇرى وسەدى. ساياحاتشىلار بايدىبەك بي ەسكەرتكىشى مەن سونىڭ اينالاسىنداعى دەمالىس ورنىنا دا كوپ كەلەدى.

وسىعان وراي شىمكەنت قالاسىندا تۋريزم سۇرانىسقا قاراي بىرنەشە باعىت­قا بولىنگەن. ماسەلەن, كەيبىرەۋلەر كيەلى ورىندارعا بارعاندى قالايدى. وسى رەتتە باسقارما وزبەكستان رەسپۋبليكاسىمەن تۋريستىك بايلانىستاردى جانداندىرىپ جاتىر. مالايزيا, تايلاند ەلىنەن وزبەكستاننىڭ تاريحي جەرلەرىن ارالاۋ­عا جىل سايىن ميلليونداعان تۋريست كەلەدى ەكەن. ءوز كەزەگىندە جەرگىلىكتى اكىمدىك سول ­ساياحاتشىلاردى بىزگە قاراي بۇرۋ ماقسا­تىندا جۇمىس ىستەپ جاتىر. سول ءۇشىن دە كيەلى ورىندارعا ساياحات وڭتۇستىكتەن باس­تاۋ الادى دەگەن ۇعىمدى قالىپتاستىرۋ باعىتىندا ءتيىستى جۇمىستار قولعا الىنۋدا. ماسەلەن, قوجا-احمەت ياساۋي بابا­مىزدىڭ كەسەنەسى تۇركىستان قالاسىندا ورنالاسسا, ونىڭ اتا-اناسى يبراگيم اتا مەن قاراشاش انانىڭ قابىرى – شىمكەنت قالاسىنا كىرەتىن سايرام تۇرعىن الابىندا. ياعني زيارات ەتۋشىلەردىڭ كوبى الدىمەن سايرامعا كەلەدى, سوسىن بابامىزدىڭ ۇستازى ارىستان بابقا بارادى, سودان سوڭ تۇركىستانعا جول تارتادى.

اكىمدىك ءوز تاراپىنان وزبەك اعايىندار­عا وسى ساكرالدى ءتۋريزمدى بىرگە دامىتۋ بو­يىنشا ۇسىنىس بەرىپ وتىر. مۇنداعى ماق­سات – ەگەر تۋريستەر تاراپىنان قىزىعۋشى­لىق بولىپ جاتسا, شىمكەنت قالاسىندا بالاما رەتىندە ساياحاتتاۋ نىسانى رەتىندە ۇسىنۋ. وسىعان بايلانىستى باسقارما زيارات ەتۋشىلەرگە بارلىق جاعدايدى جاساۋ­عا دايىن. ماسەلەن, تەگىن گيد بەرىلەدى. وسى ارقىلى شەتەلدەن كەلەتىن تۋريستەر اعى­مىن كوبەيتۋدى جوسپارلاپ جاتىر.

ودان بولەك تە تۋريستەردىڭ ساياحات­تاۋ نىسانىنا بايلانىستى ءارتۇرلى سۇرا­نىستارى بولادى. وعان, ايتالىق, ەكسترەمالدى ءتۋريزمدى جاتقىزا الامىز. وسى رەتتە قالا ىرگەسىندە بۇركىت سپورت ۇيىمى قىزمەت كورسەتەدى. ول جەردە ماسەلەن, پاراشيۋتپەن سەكىرۋگە بولادى. سونىمەن بىرگە كارتينگ بار. سونداي-اق قالا ءىشىن ارالاۋ, بالالار ءتۋريزمى سەكىلدى باعىتتار قوسىلعان.

بيىل 1 قاڭتاردان باستاپ ءتۋريزمدى دا­مىتۋ باعىتىندا ەلىمىزدە ارنايى باعدار­لاما ىسكە قوسىلدى. ول بويىنشا ەگەر ءسىز قازاقستان ىشىندە كەمىندە 5 كۇن ساياحات جاسايتىن بولساڭىز جانە وزىڭىزبەن بىرگە بالالارىڭىزدى الىپ جۇرسەڭىز, 17 جاسقا دەيىنگى بارلىق بالاڭىزعا دا اۋە بيلەتتەرى تەگىن. بىراق ءسىز ءبۇتىن تۋريستىك مارشرۋت ساتىپ الۋىڭىز كەرەك. ماسەلەن, شىمكەنت­كە كەلسەڭىز, كەمىندە 5 كۇن تۇ­نەۋ كەرەكسىز. جاتاتىن قوناقۇي, باراتىن نىساندار تۋريستىك وپەراتور ارقىلى بەلگىلەنەدى. وسى كەزدە عانا مەملەكەت اۋە بيلەتىنە سۋبسيديا جاساپ بەرەدى. سون­دىقتان باسقارما وسى باعدارلاما ار­قىلى كەلەتىن تۋريستەردىڭ بالالارىنا ارناپ قىزىقتى نىساندار­دى ازىرلەپ جاتىر.

شىمكەنتتە سونىمەن قاتار مەديتسي­نالىق تۋريزم دە ەرەكشە قانات جايىپ كەلەدى. ماسەلەن, وسى كۇنى جان-جاقتان, ءتىپتى شەتەلدەردەن شىمكەنتكە كەلىپ ەمدە­لۋدى قالايتىن ناۋقاستار سانى ارتا تۇس­كەن. جۇرەك-قان تامىرلارى اۋرۋلارىن ەمدەۋ, ونكولوگيالىق كەسەلدەرمەن كۇ­رەسۋ, باسقا دا كۇردەلى وتالار جاساۋ, سونىڭ ىشىندە ترانسپلانتولوگيا بويىنشا رەس­پۋبليكانىڭ ءۇشىنشى مەگاپوليسى وق بويى وزىق كەلەدى. مەديتسينالىق ءتۋريزم­نىڭ جارناماسىن كۇشەيتۋ ماقساتىندا بۇ­گىندە ارنايى بۋكلەتتەر ازىرلەنگەن. وندا شىم­كەنتتە مەديتسينانىڭ قاي سالاسى ەرەكشە دامىعانى, ءتىپتى سول سالادا قانداي بىلىكتى دارىگەرلەر بار ەكەنى تۋرالى ناقتى ماعلۇماتتار بەرىلگەن.

ءبىلىم ءتۋريزمىن دە ەرەكشە اتاپ وتۋگە بولادى. وسىعان سايكەس قازىرگى ۋاقىتتا شە­­تەلدەرمەن تىعىز بايلانىستا جۇمىستار قولعا الىنىپ جاتىر. مىسالى ءۇشىن شىم­كەنتتەگى مەديتسينالىق جوعارى وقۋ ورنىندا بۇگىنگى تاڭدا 1 200-دەن اسا ۇندىستان­دىق ستۋدەنت وقيدى. سونىمەن بىرگە باسقا دا وقۋ ورىندارىندا ءارتۇرلى ەلدەردەن ­كەل­گەن شەتەلدىك ستۋدەنتتەر ءبىلىم الۋدا. وسى قارىم-قاتىناستى ىلگەرىلەتۋ ماق­سا­تىندا ءبىلىم ءتۋريزمىن دامىتۋعا ايرىق­شا كوڭىل ءبولىنىپ وتىر. كوبىنەسە شە­تەل­دىك ستۋدەنتتەردى شىمكەنتتەگى وقۋ ورىن­دارى­نىڭ باعاسى مەن وسىنداعى جايلى ورتا قىزىقتىرادى.

قالادا تۋريستەردى جايعاستىراتىن 140 ورنالاستىرۋ ورنى بار. ونىڭ 28-ءى – قوناقۇي. شىمكەنت ءبىر كۇندە 10 مىڭعا جۋىق ساياحاتشىنى قابىلداي الادى. حا­لىقارالىق ستاندارتقا سايكەس بەس جۇل­دىزدى «ريكسوس حاديشا» قوناقۇيىن ايرىق­شا اتاپ وتۋگە بولادى. ودان بولەك «قاي­نار» قوناقۇيى دە قازاقستاندىق ستاندارت بويىنشا بەس جۇلدىزدى قوناقۇي ساناتىنا جاتادى. سونداي-اق ءتورت, ءۇش, ەكى جۇلدىزدى جانە ساناتى جوق قوناقۇيلەر دە بار.

شىمكەنتتە ءتۋريزمدى وركەندەتۋدىڭ, الداعى دامۋ باعىتتارىن ايقىندايتىن تۇجىرىمداماسى ازىرلەنىپ, ول تاياۋ ۋاقىتتا جەرگىلىكتى اكىمدىك تاراپىنان بەكىتىلەدى. تۇجىرىمدامادا قالانىڭ تۋريستىك الەۋەتى جان-جاقتى سارالانادى. سونىڭ ىشىندە تۋريستىك ينفراقۇرىلىمدى قولعا الۋ بو­يىن­شا جوسپارلار بەلگىلەنەدى. مۇنداعى باس­تى ماقسات شىمكەنتكە قىدىرىپ كەل­گەن ءتۋريستىڭ قالادا ارالاپ كورەتىن ما­دە­ني-تانىمدىق, سەرۋەن قۇراتىن قىزىق­تى ورىن­دارى كوپ بولۋى قاجەت. مەگا­پو­ليس رەسپۋبليكانىڭ وڭتۇستىگىندە ورنالاس­قان­دىقتان قالادا شۋاقتى كۇندەر كوپ بولادى.

ەسكەرەتىن ءبىر جايت, وزبەكستانعا كەلە­تىن ەڭ كوپ تۋريستەردىڭ ىشىندە قازاقستان ءبىرىنشى ورىندا تۇر ەكەن. ال ءبىزدىڭ ەلىمىزدە رەسەيلىك تۋريستەردىڭ باسقالاردان قاراعاندا سانى باسىمداۋ. سوسىن وزبەكستان مەن تۇركيا ەلدەرىنەن كەلەتىندەر سانى كوپ. رەسمي ستاتيستيكاعا كوز جۇگىرتسەك, وتكەن ءۇش ايدا شىمكەنتكە ساياحاتتاعان ازاماتتار 94 مىڭ ادام بولعان. التى ايلىق كورسەتكىش بويىنشا 214 مىڭ ادام مەگاپوليسكە تۋريست رەتىندە ات ءىزىن سالعان. مالىمەتتى تارقاتا تۇسسەك, وسى التى ايداعى تۋريستەردىڭ 14 مىڭى شەتەلدىكتەر بولدى. قالعانىن ىشكى ءتۋريزمنىڭ ۇلەسى الىپ وتىر. ياعني شىمكەنتكە ساياحات جاسايتىنداردىڭ باسىم بولىگى – رەسپۋبليكانىڭ تۇكپىر-تۇكپىرىنەن كەلەتىن ءوزىمىزدىڭ وتانداستار.

سونداي-اق ءتورت حالىقارالىق اۋە رەيسى ارقىلى ماسكەۋمەن, تۇركيانىڭ ەكى قالاسى انتاليا, ىستانبۇلمەن جانە گرۋزيانىڭ كۋتايسي قالاسىمەن تىكە­لەي بايلانىس ور­ناتىلعان. ەندىگى جەردە انكارا قالاسىنا بەسىنشى تىكەلەي اۋە رەيسى اشىل­عالى وتىر. سونىمەن بىرگە چارتەرلىك رەيستەر ارقىلى مىسىر, ساۋد ارابياسى, بىرىككەن اراب امىرلىكتەرى ەلدەرىمەن دە تۋريستىك بايلانىس نىعايىپ جاتىر.

شىمكەنتتە ميلليوننان اسا حالىق تۇرادى ءارى تۇرعىندار قالادا وتە تىعىز ورنالاسقان. ال مەگاپوليستىڭ 500 شىقى­رىم اينالاسىنداعى حالىق سانى 5 ميل­ليونعا جەتەدى. مىڭ شاقىرىم راديۋس­پەن ەسەپتەسەك حالىق سانى 10 ميلليونعا شىعادى. ونىڭ ىشىندە تاشكەنت قالاسىنىڭ دا تۇرعىندارى بار. جەرگىلىكتى اكىمدىك تۋريستىك بەلسەندىلىكتى ارتتىرۋ ءۇشىن وسىنشاما حالىقتى قىزىقتىراتىن رەسپۋبليكا كولەمىندە ەڭ اۋقىمدى اكۆوپارك سالۋدى ويلاستىرىپ وتىر. وسىعان بايلانىستى بادام سۋ قويماسى ماڭىنان ارنايى جەر اۋماعى ايقىندالىپ, وعان باراتىن اينالما جول سالىنىپ جاتىر. ەندى جاڭا اكۆوپاركتىڭ تۇجىرىمداماسى ازىرلەنەدى. ول بويىنشا اكۆوپاركتە قوناقۇيلەر, وتباسىمەن دەمالىپ, كوڭىل كوتەرەتىن ورىندار, بالالار وينايتىن اتتراكتسيوندار, ءتۇرلى ساۋدا ورتالىقتارى بولۋى شارت. قوسىمشا ينجەنەرلىك-كوممۋنيكاتسيالىق جۇيەلەرگە قوسىلاتىن نۇكتەلەر انىقتالدى. ەندىگى قالعانى – الەۋەتتى ينۆەستوردى تابۋ. ەگەر ينۆەستور اكۆوپارك جوباسىن قولعا الۋعا كەلىسىمىن بەرىپ جاتسا, اكىمدىك تە ءوز تاراپىنان ءتيىستى دەڭگەيدە قولۇشىن بەرۋگە ءازىر. بۇگىنگى تاڭدا جوبانى باستاپ كەتۋگە 3-4 ينۆەستور دايىن وتىر. سونىمەن بىرگە اكىمدىك جەرگىلىكتى كاسىپكەرلەرمەن دە ءتيىستى كەلىسسوزدەر جۇرگىزىپ جاتىر.

ودان بولەك قالادان تۋريستىك نىساندارعا باراتىن جول سىلتەگىشتەر قويىلادى. جانە دە سايرام تۇرعىن الابىنان 4 اقپارات­تىق تابلو ورناتىلادى. تابلودا تۋريستكە كەرەكتى بۇكىل مالىمەتتەر جاريالانادى. ماسەلەن, تۋريست وسى نۇسقامادان قاي جەردە جاقىن اۋرۋحانا, پوليتسيا بەكەتى جانە سەيىل قۇراتىن نەمەسە زيارات ەتەتىن قاسيەتتى ورىندار بار ەكەنىن وقىپ بىلە الادى.

بۇگىنگى تاڭدا قالانىڭ شىمكەنت سي­تي اۋماعىنان حالىقارالىق دەڭگەيدەگى برەندتى 2 قوناقۇيدى سالۋ بويىنشا جانە برەندتى قوناقۇيلەردى مەگاپوليسكە تارتۋ جاعىنان ءتيىستى جۇمىستار قولعا الىنۋدا.

ء«تۋريزمدى ىلگەرىلەتۋدىڭ بىردەن-ءبىر كو­مەكشىسى – ول ماركەتينگ, ياعني جارناما. ءوز مۇمكىندىگىن باسقا بىرەۋلەرگە كورسەتە العان كاسىپكەر سىرتتان تۋريستەردى وزىنە شاقىرا الادى. ەگەر الەۋمەتتىك جەلىلەرگە ۆيدەو­مەن كورىكتى ءبىر جەردىڭ قانداي كەرەمەت ەكەنى كورسەتىلسە, ادامدار شىنىمەن سوندا بارۋعا تالپىنادى. سوندىقتان ماركەتينگ, جارنامالاۋ تۋريستىك سالادا وتە ۇلكەن ءرول وينايدى. ويتكەنى ادام جاقسى ءبىر جەردى الدىن كورىپ, ەستىمەگەن بولسا, ونى قايدان ءبىلسىن. سوندىقتان الدىن الا جاسالعان جوس­پارىمىز بويىنشا شەتەلدەگى جانە بارلىق ىشكى تۋريزم باعىتىنداعى تۋروپەراتورلار­عا ءبىزدىڭ الەۋەتىمىزدى كورسەتەتىن ءارتۇرلى جارنامالىق ونىمدەر ۇسىنامىز. ولار سونى وزدەرىنىڭ تۇتىنۋشىلارىنا جەتكى­زىپ, ناتيجەسىندە شىمكەنت قالاسىندا تۋريستەرگە ارنالعان قانداي كورىكتى نىسان­دار بار ەكەنىن جۇرت ءبىلىپ جۇرەتىن بولادى», دەيدى شىمكەنت قالالىق تۋريزم جانە سىرتقى بايلانىستار باسقارماسىنىڭ باسشىسى ەرلان قىدىروۆ.

شىمكەنت قالاسى مەن تۇركىستان وبلى­سىنىڭ تۋريستەرى ءبىر-بىرىنە وتە جاقىن, ال قالا مەن وبلىستاعى تۋريستىك نىساندار ەكەۋىنە دە ورتاق دۇنيە بولعاندىقتان باسقارما اتالعان وڭىرمەن تىعىز قارىم-قاتىناستا جۇمىس جۇرگىزۋدە. سوندىقتان سارىاعاش سەكىلدى بۇكىل ەلگە تانىمال شيپاجايلار جارناماسى شىمكەنتتە دە جاسالا بەرەدى. رەسمي دەرەك بويىنشا ءبىر تۋريست شىمكەنتتە 35 مىڭ تەڭگە جاراتادى. سوندا جوعارىدا ايتىلعان 6 ايلىق كورسەتكىش بويىنشا شىمكەنتكە كەلگەن 214 مىڭ تۋريستەر سانىن 35 مىڭ تەڭگەگە كوبەيتسەك, 7,4 ملرد تەڭگە شىعادى. تۋريستەر ەڭ كەمى قالادا 1 كۇننەن 5 كۇنگە دەيىن ساياحاتتايدى. سوندا ورتا ەسەپپەن 2 كۇندى الساق, جارتى جىلدا قالا ەكونوميكاسىنا 14 ملرد تەڭگەدەن استام تابىس كىرىپ تۇر. ول تىكەلەي بيۋدجەتتى تولتىرماسا دا وسى سالادا قىزمەت كورسەتىپ جاتقان قوناقۇي, تاكسي, ويىن-ساۋىق ورتالىقتارى سەكىلدى كاسىپكەرلىك نىسانداردىڭ پايداسىنا كەنەلدى. دەي تۇرعانمەن ولاردان الىناتىن سالىق ەسەبىندە بيۋدجەتتىڭ دە ءبۇيىرى تومپاياتىنى انىق. سونىمەن بىرگە بۇگىنگى تاڭدا تۋريزم سالاسىندا 30 مىڭعا جۋىق ادام ەڭبەك ەتىپ, ناپاقاسىن تاۋىپ ءجۇر.

ماركەتينگتى قولعا الۋ اياسىندا وقي­عالى تۋريزم دە وركەندەيدى. شىمكەنتتى كوپ­شىلىك ءبىر جاعىنان باسقا وڭىرلەرمەن سالىستىرعاندا تاماعىنىڭ ارزانداۋ ءارى ءدامدى ەكەنىمەن كوبىرەك تانيدى. مەگا­پوليس گاسترونومياسىن ناسيحاتتاۋ ماق­ساتىندا وسى جىلى تۇڭعىش رەت ناۋ­رىز ء«دامداستۇر» اتتى اۋقىمدى ءىس-شارا ۇيىم­داستىرىلدى. وسى ءىس-شارا اياسىندا قالا­داعى بارلىق بەلگىلى ءدامحانالار مەن جەلىلىك تاماقتانۋ ورتالىقتارى وزدەرىنىڭ ونىمدەرىن كەلۋشىلەر نازارىنا ۇسىندى. سول كەزدە «دامداستۇردەن» ءدام اۋىز تيۋ­گە قالانىڭ 20 مىڭعا جۋىق حالقى جينالدى. وقيعالى تۋريزم دەپ مىنە, وسىنداي ءىس-شارالاردى ايتادى. وسىلايشا, ەل تۇرعىندارى اراسىندا شىمكەنت – رەس­پۋبليكانىڭ گاسترونوميالىق ورتالىعى دەگەن ۇعىم قالىپتاسسا, ەكىنشى جاعىنان بۇل دا جەرگىلىكتى بيزنەس ءۇشىن ۇلكەن قولداۋ بولىپ سانالادى. ەندىگى رەتتە ء«دامداستۇر» جىلدا ۇيىمداستىرىلاتىن مەرەكەلىك ءداستۇرلى ءىس-شارا اينالماق.

سونىمەن بىرگە وتكەن جىلى جاستار اراسىندا رەسپۋبليكا بويىنشا العاش رەت موبيلوگرافيا فەستيۆالى وتكىزىلدى. مۇندا دا كوزدەلگەن جالعىز ماقسات بىرەۋ عانا – تۋريستىك سالانى دامىتۋ ءۇشىن ونىڭ ىرگەتاسى بولار ماركەتينگتى ىلگەرىلە­تۋ. مو­بيلوگرافيا دەگەنىمىز ادەمى ۆيدەو ءتۇسى­­رىپ, الەۋمەتتىك جەلىدە جاريالاۋدى ايتا­دى. وسى كاسىپتى مەڭگەرگەن جاس وزىنە قو­سىمشا جۇمىس تاپسا, ەكىنشىدەن قالا­نىڭ كو­رىكتى جەرلەرىن تەلەفون كامەراسى­نىڭ وبەك­تيۆىنە ىلىندىرەدى. فەستيۆالدى ۇيىم­داس­تىرۋداعى ەكىنشى ماقساتتىڭ ءبىرى مىنە, وسى بولدى. سول ءىس-شاراعا شا­قىرىلعان 17 ءوڭىردىڭ 14-ىنەن جاستار كەلىپ قاتىسىپ كەتتى. سول قاتىسقان جاستاردىڭ 70 پايىزعا جۋىعى – شىمكەنت قالاسىنا ءبىرىنشى مارتە كەلگەندەر. باس جۇلدەگە Iphone 13 Pro Max ۇيالى بايلانىس تەلەفونى قويىلدى. ايتا كەتۋ كەرەك, بۇل فەس­تيۆالدا ەشكىم جۇلدەسىز قالعان جوق. ورىن الماعانداردىڭ وزىنە ءىس-شاراعا قا­تىسقانى تۋرالى ارنايى سەرتيفيكات بەرىلدى. فەستيۆال قالا تۇرعىندارىنا ەرەكشە ۇنادى. ءتىپتى رەسپۋب­ليكا كولەمىندە تانىلىپ, ەكى ايدان سوڭ ءدال وسىنداي بايقاۋدى الماتى قالاسى دا وتكىزدى. بۇگىنگى تاڭدا بەلگىلى پروديۋسەر نۇرلان قويانباەۆ شىمكەنتتەن باستاۋ العان بۇل باستامانى ءىلىپ اكەتىپ, ءوزىنىڭ قورى ارقىلى رەسپۋبليكا بويىنشا فەستيۆالدى ۇيىمداستىرىپ جاتىر. دەگەنمەن بيىلعى ەكىنشى ءىس-شارا الداعى ۋاقىتتا شىمكەنت قالاسىندا نۇرلان قويانباەۆتىڭ قاتىسۋىمەن تاعى دا وتكىزىلەدى.

باسقارما اتاۋىنىڭ سىرتقى بايلا­نىستار بولۋىنىڭ سەبەبى, مەكەمە شىم­كەنت­تىڭ اسىرەسە تۋريزم سالاسىنداعى سىرت­قى باي­لانىستارىنا دا تىكەلەي جاۋاپ بەرەدى. وتكەن جىلى وسى ماقساتقا وراي باسقارما ماماندارى شەتەلدەرگە شىعىپ, مەگاپوليستى الىس ەلدەرگە تانىستىرىپ, سول جاقتىڭ بيزنەس وكىلدەرىمەن, تۋريستىك وپەراتورلارىمەن كەلىسسوزدەر جۇرگىزىپ قايتتى. سونداي-اق قولعا الىنعان تاعى ءبىر مەملەكەتتىك باعدارلاما تۋرالى ايتساق, ەلگە الىپ كەلگەن ءاربىر شەتەلدىك تۋريست ءۇشىن مەملەكەت 15 مىڭ تەڭگە سۋبسيديا تولەيدى. بۇل دا بولسىن وتاندىق ءتۋريزمنىڭ دامۋىنا سەرپىن بەرەرى ءسوزسىز. قازىر­دىڭ وزىندە جەرگىلىكتى تۋروپەراتورلار وسى مەم­لەكەتتىك كومەكتى الۋ اياسىندا تۋريستىك الەۋەتتى كوتەرەمىز دەپ بىلەك سىبانا ىسكە كىرىسىپ جاتىر.

وتكەن جىلى دۋبايداعى ەكسپو كە­زىندە شىمكەنت قالاسىنىڭ كۇندەرى وتكىزىلگەن بولاتىن. اراب ەلىندە شىم­كەنتتەن بارعان ۇلكەن دەلەگاتسيا ىسكەرلىك كەزدەسۋلەر ۇيىمداستىرىپ, الەمنىڭ 120 مەملەكەتىنە شىمكەنتتىڭ تۋريستىك الە­ۋەتى تانىستىرىلدى. بىرىككەن اراب امىر­لىكتەرىمەن جىلى قارىم-قاتىناس ورناتۋدىڭ ارقاسىندا مەگاپوليس تاريحىندا العاش رەت ءباا-ءنىڭ باس كونسۋلدىعى شىمكەنتتەن اشىلعالى جاتىر. وسىعان دەيىن باس ەلشى­لىك ەلوردادا, ال باس كونسۋلدىق الماتى قالاسىندا بولاتىن. ءوز كەزەگىندە باە باس كونسۋلدىعىن شىمكەنتتەن اشۋدى ۇيعارعان. وسى جۇمىستاردىڭ اياسىندا قالا­داعى اۋەجاي ماڭىنان كونسۋلدىق عيما-­
­را­تى تاڭداپ الىندى. باس كونسۋلدىقتا ­الدا­عى ۋاقىتتا 11 ديپلومات جۇمىس ىستەيدى. ­وسى باستامانىڭ ناتيجەسىندە شىمكەنتكە ­الدىمەن تىكەلەي اۋە رەيسى اشىلادى. سو­سىن ونىڭ ارتىنان تۋريستەر لەگى باستالا­دى. كەلەتىن جاڭا ينۆەستيتسيالاردى دا ۇمىت­پاۋ كەرەك. سونىڭ ارقاسىندا مادەني بايلا­نىستار جاڭعىرىپ, رۋحاني قارىم-قاتىناستار كۇشەيەدى. وسى رەتتە اكىمدىك باسقا دا ەلدەر­دىڭ باس كونسۋلدىقتارىن شىمكەنتتەن اشۋ جونىندە ءتيىستى ۇسىنىس­تار ازىرلەپ جاتىر.

پرەزيدەنت قاسىم-جومارت توقاەۆتىڭ جۋىرداعى ازەربايجان استاناسى باكۋ قالاسىنداعى رەسمي ءىسساپارى اياسىندا شىمكەنت كۇندەرى ۇيىمداستىرىلدى. باكۋ تورىندە قازاقتىڭ اقشاڭقان كيىز ۇيلەرى تىگىلدى. شىمكەنتتىڭ وپەرا جانە بالەت تەاترىن باسقارىپ وتىرعان ەلگە تانىمال ءانشى مايرا مۇحامەدقىزى سوندا ونەر كورسەتتى. شىمكەنتتەن شىققان ۆەو­لەنچەليست باعجان وكتيابر دە ءوز ونەرىن تۋىسقان ەل ازەربايجان حالقىنىڭ الدىندا پاش ەتتى. قوس پرەزيدەنت تە شىمكەنتتىڭ مادەني كونتسەرتتىك باعدارلاماسىنا ارنايى كەلىپ قاتىستى. سونداي-اق قازاقستان بويىنشا العاش رەت اشىلعان «ساندىق» ۇلتتىق مەيرامحاناسى ءوزىنىڭ قازاقى داستۇرمەن ازىرلەگەن تاعامدارىن قوناق بوپ كەلگەن قوس پرەزيدەنتكە دە ارنايى ۇسىندى. وسى شىمكەنت كۇندەرى اياسىندا ازەربايجاندىق تۋروپەراتورلارمەن جانە بيزنەس وكىلدەرىمەن ىسكەرلىك كەزدەسۋلەر ۇيىمداستىرىلدى. وندا مەگاپوليستىڭ تۋريستىك جانە ينۆەستيتسيالىق مۇمكىندىكتەرى جان-جاقتى باياندالدى. وسى ورايدا 27 قىر­كۇيەك حالىقارالىق تۋريزم كۇنىنە وراي باسقارما ارنايى ءىس-شارا ۇيىمداستىر­­عا­لى جاتىر. وعان شاقىرىلعان ازەربايجان­­دىق ارىپتەستەر اتالعان ءىس-شاراعا قاتىسۋعا ­زور قىزىعۋشىلىق تانىتىپ وتىر. تۋريس­تەردى شاقىرۋ ماقساتىندا ۇيىمداستىرىل­عان ءتۇرلى پرەزەنتاتسيالاردىڭ كوزدەيتىن مۇراتى سول ءىس-شارانى وتكىزۋگە بيۋدجەتتەن 1 تەڭگە جاراتىلسا, ارتىنان كەلەتىن تۋريستەردىڭ ەسەبىنەن ول مەملەكەتكە 20-30 تەڭگە پايدا رەتىندە قايتادى.

شىمكەنت 11 قالا, 10 ەلمەن باۋىر­لاس­تىق قاتىناس ورناتقان. سونىڭ ىشىندە تۇر­كيانىڭ 3 قالاسى بار. مۇندا تەك باۋىر­لاستىق بايلانىستار ورناپ قانا قويماي, سونىمەن بىرگە شىمكەنتتىڭ ىسكەرلىك الە­ۋەتىنىڭ ارتۋىنا دا زور سەپتىگىن تيگىزىپ وتىر. كابينەتتە وتىرعاننان ءىس بىتپەيتىنى بەل­گىلى. سوندىقتان باسقارما كوبىنەسە شە­تەلدىك تۋروپەراتورلارىمەن تىكەلەي كەزدەسۋگە وزدەرى باستاپ شىعادى. جانە جاي عانا پرەزەنتاتسيا وتكىزىپ قايتپايدى. سول جەردە تۋروپەراتورلارمەن كەلىسىمگە كەلىپ, شىمكەنتكە تۋريستەردى تارتادى. باسقارما سول ارقىلى قالا ەكونوميكاسىنا قوسىمشا تابىس ءتۇسۋىن جانە تۋريستىك بيزنەستە ناپاقا تاۋىپ جۇرگەندەردىڭ جۇمىس ورىندارىنىڭ ساقتالۋىن كوزدەيدى.

شەتەلدەردە تۋروپەراتورلىق قىزمەت جاقسى دامىعان. بۇل ءۇردىس ءبىزدىڭ ەلدە دە ەندى-ەندى جاندانىپ كەلەدى. ياعني تۋريست ءبىر جەردى ارالاپ قايتۋ ءۇشىن الدىن الا تۋرمارشرۋت ساتىپ الادى. بۇرىن ادامدار ءبىر قالاعا جەتىپ الىپ, سوسىن قوناقۇي ىزدەپ جۇرەتىن. ىڭعايلى سەرۆيس شەتەلدە الدەقايدا اياققا ەرتە تۇرىپ قويعان. سوندىقتان وسى ءۇردىس بىزدە دە كەڭ ەتەك جايۋ ءۇشىن جوعارىدا اتالعانداي, بالالارعا تەگىن اۋە بيلەتتەرىن ۇسىناتىن مەملەكەتتىك جەڭىلدىكتەر ادەيى قاراستىرىلىپ وتىر. سوندا ادامدار ساياحاتتاعان كەزدە تەك تۋروپەراتوردىڭ دايىن قىزمەتىنە سۇيەنىپ قىدىرۋدى ۇيرەنەدى.

شىمكەنت