سۋرەتتى تۇسىرگەن تىلەۋبەك شاياحمەت
اۋەلى ايتا كەتەرلىگى, ەكى كورمە دە قۇداش داۋلەتقان ۇلىنىڭ ەسىمىمەن بايلانىستى. نەگە دەسەڭىز, شىعىستىڭ ءار تۇكپىرىندە قىلقالام ۇستاپ جۇرگەن جاستاردىڭ باسىن بىرىكتىرىپ, «جاڭعىرۋ» شىعارماشىلىق بىرلەستىگىن قۇرعان قۇداش نۇرسادىقوۆ. ونەر دەسە, ومەشەگى ءۇزىلىپ تۇراتىن ول وسىدان ەكى-ءۇش جىل بۇرىن سۋرەتشىلەردى ءبىر ارناعا توعىستىرىپ, بىرلەستىك قۇردى. ونى «جاڭعىرۋ» دەپ اتادى. ونداعى ماقساتى – تالانتى بولا تۇرا كورىنە الماي جۇرگەن جاس قىلقالام شەبەرلەرىن شىڭداۋ ەدى. «قازاقتىڭ ونەرلى جاستارى از ەمەس. بىراق قوعامدا كورىنە الماي ءجۇر. «جالعىزدىڭ ءۇنى شىقپايدى...» دەمەكشى, ءبارىمىز بىرىگىپ ءىس قىلساق, بەرەكەلى بولار دەپ ويلادىم. بىرلەستىكتى «جاڭعىرۋ» دەپ اتاعانىمىز, وسىناۋ سۋرەت ونەرىن وڭىرىمىزدە جاڭعىرتايىق, جاڭارتايىق دەدىك. ويىمىز, ارمانىمىز جۇزەگە اسىپ كەلەدى», دەيدى الپىستىڭ اسقارىنا شىققان سۋرەتشى ق.نۇرسادىقوۆ.
از ۋاقىتتىڭ ىشىندە «جاڭعىرۋ» شىعارماشىلىق بىرلەستىگى بىرنەشە رەت سالماقتى, تانىمدىق تاقىرىپتا سۋرەت كورمەلەرىن وتكىزدى. ەرەكشە ايتا كەتەرلىگى, الاش قايراتكەرلەرىنە ارنالعان كورمەنى كورۋگە كەلگەن حالىقتا ەسەپ بولماعان. وسكەمەندە بۇرىن-سوڭدى وتكىزىلمەگەن بۇل تاقىرىپتاعى كورمە كوپشىلىكتى رۋحتاندىرعانداي, جىگەرلەندىرگەندەي بولدى.
ال بۇگىنگى قۇداش نۇرسادىقوۆتىڭ مەرەيتويلىق كورمەسىندە پەيزاجدار, پورترەتتەر, سيۋجەتتىك كورىنىستەردى كورەرمەن نازارىنا ۇسىنىلعان. قىلقالام شەبەرىنىڭ كارتينالارىنان ۇلتتىق قۇندىلىقتىڭ دا ءيىسى اڭقيدى. 1984 جىلى سەمەي پەداگوگيكالىق ينستيتۋتىنىڭ گرافيكا فاكۋلتەتىن تامامداعان قۇداش داۋلەتقان ۇلى وسى ۋاقىتقا دەيىن ءبىر ساتكە قىلقالامىن قولىنان تاستاماعان. ونىڭ سالعان سۋرەتتەرىنىڭ سانى مىڭنان اسادى. 2014 جانە 2015 جىلدارى قىتاي مەن بىرىككەن اراب امىرلىكتەرىندەگى حالىقارالىق كورمەلەرگە, 2019 جانە 2021 جىلدارى كيپر مەن تۇركىستاندا وتكەن سيمپوزيۋمدارعا قاتىستى. بۇگىندە ول «سۋرەت» بالالار ستۋدياسىندا ۇستازدىق ەتەدى. ق.نۇرسادىقوۆتىڭ جانە «جاڭعىرۋ» بىرلەستىگىنىڭ شىعارماشىلىق كورمەسىن تاماشالايمىن دەسەڭىز, وبلىستىق ونەر مۋزەيىنىڭ ەسىگى ارقاشان اشىق.
شىعىس قازاقستان وبلىسى
