بۇل باسەكەدە اقش-تىڭ EF Education-EasyPost كلۋبىنىڭ ساپىنداعى 35 جاستاعى كولۋمبيالىق ۆەلوشاباندوز ريگوبەرتو ۋران الدىنا جان سالمادى. ونىڭ ۋاقىتى – 3 ساعات 42 مينۋت 28 سەكۋند. Groupama-FDJ ۇجىمىنىڭ ۇزدىگى كۆەنتين پاچەر ەكىنشى ورىن السا, Cofidis كومانداسىنىڭ مۇشەسى, يسپانيالىق حەسۋس ەررادا ءۇشىنشى ساتىعا تابان تىرەدى. بۇل كلۋبتاردىڭ ەكەۋىنىڭ دە ىرگەتاسى فرانتسيادا قالانعان.
جالپى ەسەپتە ءبىراز وزگەرىس بار. اتاعى الىسقا جايىلعان پريموج روگليچ (Jumbo-Visma) ۇزدىك ۇشتىكتىڭ قاتارىنان شىعىپ قالدى. سلوۆەنيا سپورتشىسىنىڭ ورنى يسپانيانىڭ وكىلى حۋان ايۋساعا (UAE Team Emirates) بۇيىردى. پيرەنەي تۇبەگىنىڭ تاعى ءبىر وكىلى ەنريك ماس (Movistar Team) ەكىنشى ساتىعا جايعاستى. ال كوش باسىنداعى بەلگيالىق رەمكو ەۆەنەپۋل (Quick-Step Alpha Vinyl Team) ءالى دە ەشكىمگە ەسە جىبەرەر ەمەس. «استانانىڭ» سەركەسى ميگەل انحەل لوپەس تاعى ءبىر ساتىعا جوعارىلاپ, بەسىنشى ورىندى يەلەندى.
