«شاڭىراق» بالالار اۋىلىنىڭ ديرەكتورى گۇلسارا بوتاتاەۆانىڭ ايتۋىنشا, بىلتىر مۇناي كومپانياسىنىڭ دەمەۋشىلىگىمەن جايىق وزەنىنىڭ جاعالاۋىنان سەگىز وتباسىنا ارنالعان تۇرعىن ۇيلەر سالىنعان ەدى. مۇندا ءوزىن ءوزى تانۋ جانە الەۋمەتتىك بەيىمدەۋ ورتالىعى بار. زاماناۋي كونفەرەنتس-زالدا بالالاردىڭ ونلاين-رەجىمدە وقۋىنا مۇمكىندىك جاسالعان. بالالار اتىراۋ قالاسىنداعى ءۇش مەكتەپكە قاتىناپ وقيدى.
– بالالار بوس ۋاقىتىن تەككە وتكىزبەيدى. ون جىل بۇرىن قويان ءوسىرۋدى قولعا العان ەدىك. قازىر 12 قويان, 6 تاۋىق پەن 18 بالاپان اسىراپ وتىرمىز. دەمەۋشىلىك كومەك ارقىلى 2014 جىلى تىگىن شەبەرحاناسىندا قىزدار ساحنالىق قويىلىمدارعا, وزگە دە ءىس-شارالارعا ارنالعان كيىمدەردى وزدەرى تىگەدى. سۇلۋلىق سالونى بار. ەندى الداعى ۋاقىتتا ۇلدارعا ارنالعان اعاش وڭدەۋ شەبەرحاناسى اشىلادى. قازىر ءۇش ستانوك ساتىپ الدىق, – دەيدى گۇلسارا بوتاتاەۆا.
جاقىندا مۇندا جىلىجاي اشىلدى. ونىڭ قۇرىلىسىنا وبلىستىق ىسكەر ايەلدەر كەڭەسى ۇيىتقى بولعان. كەڭەس جەتەكشىسى گۇلجان مۇحاتاەۆانىڭ ايتۋىنشا, جىلىجاي قۇرىلىسىنا 2 ملن تەڭگە جۇمسالعان.
– بۇل جىلىجاي بيىلعى بالالار جىلىنا وراي قولعا الىندى. قۇرىلىسى ماۋسىم ايىندا باستالدى. جىلىجايدىڭ اۋماعى 50 شارشى مەتردى قۇرايدى. جىلىجاي اشۋداعى ماقساتىمىز – وتباسى ۇلگىسىندەگى بالالار اۋىلىنىڭ تاربيەلەنۋشىلەرىن ەڭبەككە باۋلۋعا ىقپال ەتۋ. سول سەبەپتەن بالالارمەن بىرگە كوكونىستەردىڭ كوشەتىن ەگۋگە كەلدىك, – دەيدى گۇلجان مۇحاتاەۆا.
اتىراۋ وبلىسى
