قولۇشىن بەرۋگە نيەتتى ازاماتتار كومەكتى شىعىس قازاقستان وبلىستىق Amanat پارتياسى فيليالىندا ورنالاسقان گۋمانيتارلىق پۋنكتكە اكەلدى.
– پارتيا توراعاسىنىڭ تاپسىرماسىنا سايكەس 4 قىركۇيەكتەن باستاپ شىعىس قازاقستان وبلىسى بويىنشا ورتتەن زارداپ شەككەن قوستاناي وبلىسى, اۋليەكول اۋدانى امانقاراعاي اۋىلىنىڭ تۇرعىندارىن قولداۋ ماقساتىندا پارتيانىڭ ءبىر وبلىستىق جانە 11 اۋماقتىق فيليالىندا ارنايى گۋمانيتارلىق كومەكتەردى جيناۋ پۋنكتى اشىلدى. يگى ءىس-شاراعا پارتيا بەلسەندىلەرى, دەپۋتاتتار, كاسىپكەرلەر, قاراپايىم تۇرعىندار اتسالىسىپ جاتىر, – دەدى Amanat پارتياسى شىعىس قازاقستان وبلىستىق فيليالىنىڭ اتقارۋشى حاتشىسى سايرانگۇل ءجۇمادىلوۆا.
قازىرگى ۋاقىتتا پارتيانىڭ وبلىستىق فيليالىندا ورنالاسقان گۋمانيتارلىق پۋنكتكە 14 توننا ۇن, 3 توننا مينەرالدى سۋ, 5 توننا ماكارون, 10 توننا كۇنباعىس مايى جانە 3 توننا وزگەدە ءداندى-داقىلدار جينالدى.
سونىمەن قاتار ءبىرىنشى قاجەتتى زاتتار كورپە-جاستىق, كيىم-كەشەك, تۇرمىستىق تەحنيكالار, گيگيەنالىق زاتتار قاتتالدى. جينالعان گۋمانيتارلىق كومەكتى جۇك كولىكتەرىنە تيەۋ ءۇشىن وبلىستاعى جوعارى وقۋ ورىندارى مەن كوللەدجدەردىڭ ستۋدەنتتەرى جانە ەرىكتىلەر توبى قولعابىس ەتتى.
جينالعان گۋمانيتارلىق كومەكتى تيەگەن كولىك كوپ بوگەلمەي قوستاناي وبلىسىنا جولعا شىقتى. ايتا كەتەرلىگى, ءوڭىر جۇرتشىلىعىن قولداۋعا ارنالعان يگى ءىس-شارا وسىمەن توقتالماي, جالعاسىن تابادى.
شىعىس قازاقستان وبلىسى
