ءورتتىڭ سالدارىن جويۋ جۇمىستارى جالعاسادى
7 قىركۇيەك كۇنى ساعات 15.00-دە توتەنشە جاعداي ءمينيسترى يۋري يلين اۋليەكول اۋدانىنداعى ورمان ءورتىنىڭ اۋىزدىقتالعانىن رەسمي تۇردە ءمالىم ەتتى. جالپى اۋماعى 43 مىڭ گەكتاردى شارپىعان ءتىلسىز جاۋ بەسىنشى كۇن دەگەندە ءبىرجولا تىزگىندەلدى. قازىر ورماننىڭ ءار جەرىندە شالا جانعان قولامتا شوقتارىن ءسوندىرۋ جۇمىستارى ءجۇرىپ جاتىر. امانقاراعاي, لەسنوە, وزەرنوە جانە باعانالى اۋىلدارىنىڭ اۋماقتارىندا ورتكە قارسى قاراۋىل قىزمەتى تۇر.
– ءورت ءسوندىرۋ جۇمىستارىنا تارتىلعان كۇشتەر مەن قۇرالداردىڭ ءبىرازى تاراتىلادى. تابيعي اپات ورنىندا نەگىزىنەن قوستاناي جانە اقمولا وبلىستارىنىڭ كۇش قۇرالدارى قالىپ, ءورت سالدارىن جويۋدى جالعاستىرادى. اقمولا وبلىسىنان كەلگەن 50 ءورت ءسوندىرۋشى مەن 8 تەحنيكا سەگىزىنشى قىركۇيەككە دەيىن وسىندا بولادى. سونداي-اق «ۆوستوك» رمك جەكە قۇرامىنىڭ ينجەنەرلىك تەحنيكاسى ەلدى مەكەندەردىڭ اينالاسىن قاۋىپسىزدەندىرۋ ءۇشىن جەر جىرتۋ جۇمىستارىمەن اينالىسادى.
تجم پولكىنىڭ جەكە قۇرامى كومانديرلەرىمەن بىرگە جانە قوستاناي وبلىسىنىڭ بولىمشەلەرى جۇمىس ورنىنا ورالۋ تۋرالى شەشىم قابىلدانعانعا دەيىن وقيعا ورنىندا قالادى. قالعان بولىمشەلەر كەشكە دەيىن جۇمىستارىن جۇرگىزىپ, تۇراقتى جۇمىس ورىندارىنا ورالادى, – دەدى يۋري يلين.
ءبۇتىن ەلدى الاڭداتىپ, كوپتىڭ قابىرعاسىن قايىستىرعان الاپات ءورتتى سوندىرۋگە تجم, ءىىم ۇلتتىق ۇلان, قوستاناي قالاسىنداعى ءىىم اكادەمياسىنىڭ, قورعانىس مينيسترلىگىنىڭ, جاو جانە وبلىستىڭ كوممۋنالدىق قىزمەتتەرىنىڭ كۇش قۇرالدارى – بارلىعى 207 تەحنيكا, 5 ءورت ءسوندىرۋ پويىزى, 1785 ادام قاتىسقان. تج ءمينيسترىنىڭ ايتۋىنشا, قىزىل جالىندى اۋىزدىقتاۋعا قاتىسقان 5 تىكۇشاق 5 كۇن بويى ءالسىن-ءالسىن اۋەگە كوتەرىلىپ, جانىپ جاتقان ورماننىڭ ۇستىنەن 272 رەت سۋ بۇركىگەن.
امانقاراعاي مەن وزەرنىي اۋىلدارىندا 91 ءۇي جانىپ كەتتى. بۇگىندە باسپاناسىز قالعان 16 ادام اۋليەكول ورتا مەكتەبىن, ءبىر ادام اۋليەكول مەكتەپ-ينتەرناتىن پانالاپ وتىر. قالعان تۇرعىنداردىڭ ءبىرازى ءوز ۇيلەرىنە ورالسا, ءبىرازى تۋىس-تۋعاندارىنىڭ ۇيىندە تۇرىپ جاتىر.
ءورت باستالعالى 2091 ادام ەۆاكۋاتسيالانعان. دەنەسىن كۇيىك شالىپ, وكپەسىنە ىس تيگەن, سونداي-اق ءتۇرلى دەڭگەيدە جاراقات العان 12 ادام بار.
كوپ تۇكىرسە – كول
الاپات ورتتەن زارداپ شەككەن تۇرعىندارعا جان-جاقتان اعىلىپ كەلىپ جاتقان گۋمانيتارلىق كومەك كوپ. ارىسى – ەلىمىزدىڭ وڭتۇستىك, باتىس, شىعىس وڭىرلەرىنەن, بەرىسى – ىرگەلەس جاتقان وبلىستار مەن اۋدانداردان جەتكەن 300-دەن استام ۇلكەندى-كىشىلى جۇك كولىكتەرى اۋليەكولدەگى قايىرىمدىلىق ورتالىعىنىڭ قويماسىنا ازىق-ت ۇلىكتىڭ ءتۇر-ءتۇرىن, جەڭىل, جىلى كيىم-كەشەك پەن باسقا دا تولىپ جاتقان كۇندەلىكتى تۇرمىسقا قاجەتتى زاتتاردى تاۋ عىپ ءۇيىپ تاستاعان. ونىڭ ءبارىن ۆولونتەرلەر سۇرىپتاپ, تىزىمدەپ, تۇرعىندارعا ۇلەستىرىپ جاتىر.
اۋداندىق ءماسليحات حاتشىسى داۋلەت قويشىبايدىڭ ايتۋىنشا, اۋليەكولگە ەلىمىزدىڭ ءار تۇپكىرىنەن گۋمانيتارلىق كومەك تۇرىندە كەلىپ جەتكەن كيىم-كەشەك, قانت, كارتوپ, ماكارون, ۇن سياقتى اس-سۋ قورى ورتتەن زارداپ شەككەندەردىڭ مۇقتاجىن وتەۋگە تولىق جەتەدى.
– بۇگىنگە دەيىن 500 توننادان استام ءونىم جەتكىزىلدى. اۋدانعا ەل كولەمىنەن ۇزىن سانى 302 كولىك كەلدى. ونىڭ ىشىندە 279 گازەل, 15 رەفريجەراتور, 2 كاماز جانە جەڭىل كولىكتەر بار. جينالعان ونىمدەر ورتتەن زيان شەككەن تۇرعىنداردى قامتاماسىز ەتۋگە جەتكىلىكتى. بۇكىل قازاقستان حالقىنا شەكسىز العىسىمىزدى ايتامىز. ءتىپتى ەلدەن ازىق-ت ۇلىك جىبەرۋدى توقتاتا تۇرۋدى ءوتىنىپ سۇرادىق. ەندى تۇرعىن ءۇي سالۋ جۇمىستارىنىڭ باستالۋىنا بايلانىستى, قۇرىلىس ماتەريالدارىنا دەگەن قاجەتتىلىك بار. پاۆلودار وبلىسى العاشقى بولىپ 2 جۇك كولىگىمەن قۇرىلىس ماتەريالدارىن جىبەردى. باسقا دا وڭىرلەر كومەك قولىن سوزۋعا نيەت ءبىلدىرىپ وتىر. تاعى ءبىر ايتا كەتەرلىگى, قارجىلاي جاردەمدەسكىسى كەلەتىن ازاماتتارعا بىزدە ءبىر عانا ەسەپشوت بار ەكەنىن ەسكەرتەمىز. جەكەلەگەن ادامدارعا كومەكتەسكىلەرىڭىز كەلسە, تۇرعىنداردىڭ وزدەرىمەن بايلانىسۋلارىڭىزعا بولادى. ولارعا اس-سۋ, كيىم-كەشەك, كورپە-توسەك قانا ەمەس, شكاف, كەرەۋەت, وزگە دە تۇرمىستىق تەحنيكالار قاجەت, – دەدى داۋلەت قويشىباي.
ءماسليحات حاتشىسى زارداپ شەككەن ادامداردىڭ قۇجاتتارى دا قالىپقا كەلتىرىلىپ جاتقانىن ايتتى. ەرىكتىلەر سانى كۇن سايىن ارتىپ, بىرلىكتى ىسكە بىلەك سىبانىپ كىرىسىپ كەتكەن.
بالاباقشا قۇرىلىسىنا 1,3 ملرد تەڭگە بولەدى
ءورت سالدارىنان جۇزگە جۋىق ءۇي ورتەنىپ, جەرگىلىكتى تۇرعىنداردىڭ ءومىرى مەن قاۋىپسىزدىگىنە قاۋىپ ءتوندى. ۇكىمەت تۇرعىنداردى قولداۋ جانە قيىن جاعدايدان شىعۋ ءۇشىن بارلىق مۇمكىندىكتەردى پايدالانىپ, تابيعي اپاتتىڭ زارداپتارىن جويۋ بويىنشا بەلسەندى جۇمىس جۇرگىزۋدە.
اۋليەكول تۇرعىندارىنىڭ باسىنا تۇسكەن اۋىرتپالىق ەشكىمدى بەيجاي قالدىرعان جوق. ورمان ورتىنەن ويسىراپ قالعان جۇرتقا ەلىمىزدىڭ ءار وڭىرىندە ەڭبەك ەتىپ جاتقان كاسىپكەرلەر مەن قوعام قايراتكەرلەرى دە كومەك كورسەتۋگە نيەتتى ەكەنىن ءبىلدىرىپ جاتىر. مۇنىڭ ءبىر مىسالى, «حالىق» قايىرىمدىلىق قورى اۋليەكول اۋدانىندا ورمان ورتىنەن زارداپ شەككەندەرگە ارناپ 280 ورىندىق جاڭا بالاباقشا سالۋ ءۇشىن 1,3 ملرد تەڭگە ءبولدى.
بالاباقشا قۇرىلىسى تاياۋ ارادا باستالىپ, كەلەسى جىلى كىشكەنتاي بالدىرعانداردى قابىلداۋ ءۇشىن ەسىگىن ايقارا اشاتىن بولادى.
– ورتتەن زارداپ شەككەن تۇرعىنداردىڭ بارلىعىنىڭ قايعىسىنا ورتاقپىز. ءبىزدىڭ كومەگىمىز ولاردىڭ باسىنا تۇسكەن اۋىرتپالىقتى ءسال دە بولسا جەڭىلدەتىپ, بولاشاقتا قالىپتى ومىرگە تەز ورالۋىنا سەپتىگىن تيگىزەدى دەگەن ۇمىتتەمىز, – دەيدى «حالىق» قورىنىڭ وكىلدەرى.
قوستاناي وبلىسى
