بىلتىرعى قۋاڭشىلىقتا وبلىس ديقاندارى وسى مەزگىلدە گەكتار بەرەكەسىن 7,2 تسەنتنەردەن اينالدىرعان بولاتىن. بيىلعى ءونىم ءبىرشاما ءتاۋىر. ايتكەنمەن, بارلىق اۋدانداردا جاعداي بىركەلكى ەمەس. ماسەلەن, مامىر-ماۋسىم ايلارىندا كەيبىر اۋداندا جاۋىن جاۋمادى. ءدال كەرەك كەزىندە ىلعال بولماعاندىقتان, توپىراقتىڭ استىنداعى ءدان كوگەرىپ, كوكتەپ شىققانىمەن, بوي سالىپ وسپەي, بۋلىعىپ جاتىپ الدى.
– ەگىن وراعىن اياقتاپ قالدىق, – دەيدى قورعالجىن اۋدانىنداعى «اگروفيرما جەر 888» سەرىكتەستىگىنىڭ باسشىسى اباي مەدەۋباەۆ, – ءدال كەرەك ۋاقىتىندا كوكتەن يمەي, جىگەرىمىز قۇم بولدى ەمەس پە؟ 6 مىڭ گەكتار القاپقا ءداندى داقىلدار تۇقىمىن سىڭىرگەن بولاتىنبىز. قازىر كورشىلەرگە كومەك قولىن سوزۋدامىز. جالپى جاعداي تۋرالى ايتاتىن بولساق, گەوساياسي جاعدايعا بايلانىستى قوسالقى بولشەكتىڭ قۇنى اسپانداپ كەتتى. ءتىپتى ءۇش ەسە قىمباتتادى. بۇل جايت ديقاندارعا كەرى اسەرىن تيگىزىپ تۇر. ونىڭ ۇستىنە تىڭايتقىشتاردىڭ باعاسى دا ۋداي. ال بيداي باعاسى بۇرىنعى قالپىندا. ارينە, ءبىز دە ناننىڭ قىمباتتاعانىن قالامايمىز, بىراق ءدان وسىرۋگە جۇمسالعان شىعىن قايتۋى كەرەك قوي.
القاپ توسىندەگى ديقانداردىڭ ايتۋىنا قاراعاندا, جانار-جاعارمايدان تاپشىلىق جوق. الدىن الا ەسەپتەلىپ بەرىلگەن وتىنىمدەرگە بايلانىستى دەر شاعىندا جەتكىزىلۋدە. اۋا رايى دا قولايلى بولىپ تۇر. ەگىن وراعى باستالعان كەزدە ءدان ءبىرشاما ىلعالدى بولىپ, نەگىزگى كۇش استىق قابىلداۋ كاسىپورىندارىنا تۇسە مە دەگەن قاۋىپ بولىپ ەدى. سوڭعى كۇندەرى كۇن ىسىپ, ءدان كەۋىپ, ىلعال ازايدى.
– ەگىن وراعىن ورمەك جۇزىنەن اۋداردىق, – دەيدى «ەڭبەك» جاۋاپكەرشىلىگى شەكتەۋلى سەرىكتەستىگىنىڭ باسشىسى قۋانىش راقىشەۆ, – قازىر بىزدە عانا ەمەس, جالپى ديقانداردىڭ الدىنا ورالعى بولىپ تۇرعان ماسەلە – تەحنيكا مەن قوسالقى بولشەكتىڭ قىمباتتاۋى. بۇرىن رەسەيدەن جانە تاياۋ شەتەلدەردەن جەتكىزىلەتىن قوسالقى بولشەكتەر توقتاپ قالدى. ءتىپتى ديللەرلەر دە تاپتىرماي كەتتى. ەرتە كوكتەمنەن بەرى ەگىس مادەنيەتىن بارىنشا ساقتاپ, بارلىق تالاپتى مۇقيات ورىنداعاندىقتان بولار, گەكتار بەرەكەسى بىلتىرعا قاراعاندا الدەقايدا جاقسى.
ءبىز سويلەسكەن اۋىل شارۋاشىلىعى قۇرىلىمدارىنىڭ باسشىلارى ايتارلىقتاي قولبايلاۋدىڭ جوقتىعىن ايتىپ وتىر. تەك ناۋقاندىق ەمەس, جالپى جاعداي تۋرالى تۇيتكىلدى ماسەلەنىڭ ءتۇيىنىن تاراتاتىن بولساق, بۇل – مەحانيزاتور كادرلاردىڭ جەتىسپەۋشىلىگى.
– اۋىلدا قازىر كومبايندى تىزگىندەيتىن ادام قالمادى. جىل سايىن ىزدەپ, تابانىمىزدان تاۋسىلىپ جۇرگەنىمىز, – دەيدى «قۇلان» سەرىكتەستىگىنىڭ باسشىسى قۇلان بولاتوۆ, – الداعى ۋاقىتتا وبلىستىق اۋىل شارۋاشىلىعى باسقارماسى وڭىرگە قانشا مەحانيزاتور قاجەت ەكەندىگىن ەسەپتەپ, كاسىپتىك-تەحنيكالىق كوللەدجدەرمەن بايلانىس جاساپ, ءبىلىم الۋشىلاردى وندىرىستىك تاجىريبەدەن وتكىزىپ, بۇل جايدى تۇبەگەيلى شەشۋ كەرەك ءتارىزدى. جالعىز كومباينشى عانا ەمەس, دانەكەرلەۋشى دە قاسقالداقتىڭ قانىنداي تاپتىرمايدى. بۇل ءبىر كۇندىك قيىندىق ەمەس, جالپى ەلدىڭ, ونىڭ ىشىندە اۋىل شارۋاشىلىعى قۇرىلىمدارىنىڭ بولاشاعىنا بايلانىستى دۇنيە ەمەس پە؟!
وڭىردە قازىر جەردە وسكەن ءداندى جەردە قالدىرماۋ باعىتىندا قىرۋار جۇمىس اتقارىلۋدا. كۇزگى ەگىن وراعىمەن بىرگە قىس قامى دا ويلاستىرىلىپ, مالساق قاۋىم مال ازىعىن دايىنداۋدىڭ سوڭعى شارالارىن قولعا العان.
اقمولا وبلىسى
