وبلىس ورتالىعىنداعى Bolashaq Saraiy مەكەمەسى از عانا ۋاقىتتىڭ ىشىندە ونەگەلى تاربيە مەن بەرىك ءبىلىمنىڭ وشاعىنا اينالىپ ۇلگەردى. ءسال تاراتىپ ايتساق, بۇگىندە سپورت, مەديا, شىعارماشىلىق, عىلىمي-ينتەللەكتۋالدىق, ءىت باعىتتارى بويىنشا 3 500-دەن استام بالا 130 ءتۇرلى ۇيىرمەدە وزدەرىنىڭ جۇرەك قالاۋلارى بويىنشا بالاۋسا بويلارىنداعى بىلىمدەرىمەن ءبۇر جارىپ كەلە جاتقان قابىلەتتەرىن جەتىلدىرىپ, الىستى اڭساپ قاناتتانۋدا. ءبىر ايتا كەتەرلىگى, بالا جانىن باۋراپ, بولاشاقتىڭ سارا جولىن نۇسقايتىن, اياۋلى ارماندارىنا قانات بىتىرەتىن ۇيىرمە جەتەكشىلەرى جوعارى ءبىلىمدى, ءوز ماماندىقتارىنىڭ ناعىز مايتالماندارى. بالكىم ءىستىڭ العا باسۋى دا, ورتاق مۇراتتىڭ ورىندالۋى دا وسىدان شىعار. سوزىمىزگە دالەل رەتىندە شاكىرتتەردىڭ از ۋاقىت ىشىندە تولىمدى تابىسقا جەتىپ, الەمدىك دودالاردا توپ جارۋىن ايتۋعا بولادى. Bolashaq Saraiy ۇيىمىندا وقۋشىلار تەك قانا قوسىمشا ءبىلىم الۋمەن شەكتەلمەيدى, ولار جان-جاقتى پىكىر الماسىپ, بىلىمدەرىن بۇرلەپ, رەسپۋبليكالىق جانە حالىقارالىق دەڭگەيدەگى سايىستارعا قاتىسىپ, شىعارماشىلىق شابىتتارىنىڭ شىراعدانىن جاعۋدا. ءبىر جاقسىسى, پەيىلى قۇلاعان, بولاشاقتا وزدەرىنە قاجەت بولاتىن ماماندىقتارىن تاڭداۋعا دا باعدار بەرەدى. قازىر ولار جاندارىنا جاقىن ماماندىقتاردىڭ قىر-سىرىن تەرەڭنەن زەرتتەپ, وقۋعا مۇمكىندىك الىپ وتىر. راديو سالاسىن, كامەرا, دىبىس جازۋ, سۋرەت سالۋ ءتارىزدى بەيىمدىلىكتەرىن جەتىلدىرىپ, ارقيلى كورمەلەر مەن جارىستارعا قاتىسۋدا.
وقۋشىلاردىڭ دۇنيە-تانىمىن كەڭەيتىپ, وي-ءورىسىن دامىتۋعا كومەكتەسەتىن ايرىقشا ءماندى قۇندىلىقتىڭ ءبىرى – كىتاپ. مۇندا سوڭعى تەحنولوگيامەن جابدىقتالعان كىتاپحانا بار. ءبىر جاقسىسى, ەلەكتروندىق كىتاپحانادا كەز كەلگەن مالىمەتتى ىزدەپ, تابا الاسىز. ءوزىڭىز قالاعان ادەبيەتتى جۇكتەپ الۋعا دا بولادى. اۋديو كىتاپ تىڭداۋعا, قىزىقتى كىتاپتى قۇربىلارىمەن بىرگە تالقىلاۋعا, ءسويتىپ, كىتاپ قازىناسىنىڭ تۇڭعيىعىنا سۇڭگۋگە مول مۇمكىندىك بار. ءتىل جاتتىعۋلارى, جىلدام وقۋ مانەرى وي ۇشقىرلىعىنا باۋليدى. عىلىمي-ينتەللەكتۋالدى باعىتتاعى وقۋشىلار تەوريانى تاجىريبە جۇزىندە ىسكە اسىرادى. سوڭعى ۇلگىدەگى تەحنولوگيانى پايدالانا وتىرىپ, تۇرمىستىق قالدىقتار مەن پلاستيكالىق زاتتارعا ەكىنشى ءومىر سىيلاۋ مۇمكىندىگىمەن ەگجەي-تەگجەي تانىسادى.
بالالارعا بولاشاقتىڭ باعىتىن بەرەتىن ىستىق ۇيانىڭ مۇمكىندىگىن ايتا كەلە, العاشقى ناتيجەلەر تۋرالى دا ءسوز ساباقتاعان ءجون. مۇنداعى شاكىرتتەر رەسەي, بەلارۋس, لاتۆيا, ازەربايجان ەلدەرىندە وتكەن بايقاۋلاردىڭ گران-پري يەلەرى اتاندى. وسى ارادا ايتا كەتەتىن ءبىر جايت, جاس تولقىننىڭ بويىنداعى ۇلتتىق ونەرگە دەگەن ۇمتىلىسى. ىلكى زاماننان بەرى اتا-بابالارىمىزدىڭ جان سەرىگى بولعان ۇلتتىق اسپاپتاردى قايتا جاڭعىرتىپ, رۋحاني كوكجيەگىن كەڭەيتۋگە دەگەن ۇمتىلىس بايقالادى. ءدال وسىنداي ۇيىرمەلەرگە بارىپ, بابادان قالعان جان سەرىگىنىڭ ءتىنىن جالعاستىرامىز دەيتىن جاستاردىڭ كوبەيۋى كوڭىلگە قۋانىش.
دەنى ساۋ ۇرپاق قالىپتاستىرۋ باعىتىندا قىرۋار جۇمىس اتقارىلۋدا. ارنايى سپورتتىق الاڭدار ۇيىمداستىرىلىپ, سپورتتىڭ نەگىزگى تۇرلەرى ۇيرەتىلۋدە. وقۋشىلار دوپ ويىندارىمەن بىرگە, جەكپە-جەك ونەرلەرىن مەڭگەرىپ, ۇلتتىق ويىندارىمىز اسىق, توعىزقۇمالاق, قازاقشا كۇرەسپەن اينالىسىپ, شەبەرلىكتەرىن شىڭداۋدا. Bolashaq Saraiy اشىلعالى تاربيەلەنۋشىلەر بارلىق سالادا ەلەۋلى جەتىستىكتەرگە جەتۋدە. سونىمەن قاتار ءوڭىردىڭ قوعامدىق ومىرىنە دە بەلسەنە ات سالىسىپ, ارقيلى مادەني, الەۋمەتتىك, عىلىمي-پراكتيكالىق ءىس-شارالاردى وتكىزۋگە قولعابىستارىن تيگىزۋدە. سارايدىڭ جاس شاكىرتتەرى – «روبووليمپ» حالىقارالىق بايقاۋىنىڭ جەڭىمپازى تالعات ماقسات پەن Euro Stars حالىقارالىق ونەر فەستيۆالىنىڭ جەڭىمپازى ياسمين قۋات قۇربىلارىنا ۇلگى. بالالار جىلىنىڭ باستاۋىندا تۇڭعىش رەت وتكىزىلگەن وبلىستىق JasSkills اqmola-2022 چەمپيوناتى ۇيىمداستىرىلدى. وسى شاراعا قاتىسقان 120-دان استام وقۋشىنىڭ ءبىلىمى مەن بىلىكتىلىگىنە جوعارى باعا بەرىلدى. ءتىپتى باسەكەدە توپ جارۋدىڭ تاماشا قۋانىشىن ايتپاعاننىڭ وزىندە تەحنيكالىق, ءىت, عىلىمي باعىتتاعى ۇيىرمەلەردىڭ ءبىلىم الۋشىلارعا زور پايداسى بار ەكەنىن ەكشەپ كورسەتۋگە بولار ەدى. وسى باعىتتا تالپىنىستارى قانات جاياتىن بولسا, بىرەر جىلدىڭ توڭىرەگىندە جاس كاسىبي مامان بولىپ قالىپتاساتىندىعىنا داۋ جوق.
بالالار جىلىنىڭ اياسىندا شىعارماشىلىق باعىت بويىنشا «ۇكىلى دومبىرا» ۇيىرمەسى حالىقارالىق ونەر بايقاۋىنىڭ, Bolashaq بي ءانسامبلى قازمەديا ورتالىعىندا وتكەن «ارەنا تانتسەۆ» حالىقارالىق كونكۋرس-فەستيۆالىنىڭ, Diamond بي ءانسامبلى «جۇلدىزعا قادام» حالىقارالىق كوپجانرلى بايقاۋىنىڭ جەڭىمپازدارى اتانىپ ۇلگەردى. ال «جۇلدىزدار» ۆوكالدىق ستۋدياسىنىڭ «ۇلگىلى» اتاعى, «گۇلدەر» حالىق بي ءانسامبلىنىڭ «حالىقتىق» اتاعى تاعى ءبىر مارتە راستالدى. وسىنىڭ ءبارى – ۇيىرمە جەتەكشىلەرى مەن شاكىرتتەرىنىڭ قاجىرلى ەڭبەكتەرىنىڭ جەمىسى.
ۇلت ۇستازى احمەت بايتۇرسىن ۇلىنىڭ 150 جىلدىعىنا ارنالعان «رۋح ساۋلەسى – اقىن سوزىندە» اتتى العاشقى وبلىستىق جاس اقىندار ايتىسى ءوتىپ, دارىنداردىڭ تانىمى مەن پاراساتىن, ءبىلىمى مەن تاعىلىمدى تاربيەسىن, بىرلىگى مەن ىنتىماعىن ودان سايىن شىڭداي ءتۇستى.
تالاي بايراقتى باسەكەدە دەس بەرمەگەن Bolashaq Saraiy-نىڭ جاس بالۋانى, قازاقستاننىڭ نامىسىن قورعاپ جۇرگەن, ەركىن جانە گرەك-ريم كۇرەسىنەن 3 دۇركىن ەل چەمپيونى الديار بالتاشەۆ برازيليا ەلىندە وتكەن سۋردوليمپيادادا گرەك-ريم كۇرەسىنەن قولا جۇلدەنى قانجىعاسىنا بايلاپ, كوك تۋىمىزدى تاعى ءبىر جەلبىرەتىپ, سوڭىنان ەرگەن ءىنى-قارىنداستارىن قاناتتاندىردى, ەل مەرەيىن اسىردى.
ىستىق ۇيا بۇگىندە بولاشاقتىڭ سارا جولىن سالىپ جاتىر. ەل ەرتەڭىنە ەلەڭدەگەن دارىنى مول بالالار بويلارىنا ءبىلىم مەن بىلىكتى ءسىڭىرىپ, قاۋلاپ ءوسىپ كەلەدى.
كوكشەتاۋ
