34 جاستاعى اقش-تىڭ الىبى اۋەلدە تاي بوكسى مەن كيكبوكستى جەتىك مەڭگەرىپ, ەلەۋلى تابىستارعا قول جەتكىزدى. تىپتەن جاپونياداعى ك-1 ءتۋرنيرىنىڭ گران-پريىندە دە ايقاستى. كەيىننەن بوكسقا اۋىستى. كەزىندە ول داڭقتى ميركو كروكوپپەن كۇش سىناسىپ, ۆلاديمير كليچكو, تايسون فيۋري جانە تاعى باسقا دۇلەي كۇش يەلەرىنىڭ سپاررينگ-ارىپتەسى بولدى. ءوزى كاسىپقوي رينگتە 26 كەزدەسۋ وتكىزىپ, بىردە-ءبىر رەت جەڭىلگەن ەمەس. دجاررەلل 20 قارسىلاسىن نوكاۋتقا جىبەردى. ونىڭ ءالى تەك ءوزىنىڭ وتانداسى دجوي داۆەيكوعا عانا جەتپەدى. 2013 جىلدىڭ باسىندا وتكەن بۇل كەزدەسۋدە تەڭ ەسەپ تىركەلدى. كەزىندە ميللەر احرور مۋراليموۆ, دەرالد ۆاشينگتون, ماريۋش ۆاح, جوان ديۋوپا, توماش ادامەك, بوگدان دينۋ سىندى تانىمال بوكسشىلاردان باسىم ءتۇستى.
2019 جىلدىڭ اقپان ايىندا دجاررەلل ميللەر چەمپيوندىق ءتاج ءۇشىن ۇلىبريتانيالىق ەنتوني دجوشۋامەن جۇدىرىقتاسۋعا ءتيىس ەدى. الايدا امەريكالىق الىپ دوپينگ-تەكسەرۋدەن وتە المادى. سونىڭ كەسىرىنەن ول جەكپە-جەك وتپەي قالدى. بيىل جازدا باس-اياعى ءبىر ايدىڭ ىشىندە ميللەر ەكى جەكپە-جەك وتكىزىپ ۇلگەردى. 23 ماۋسىمدا ارگەنتينالىق اريەل ەستەبان براكامونتەنى ۇپاي سانىمەن ۇتسا, 23 شىلدەدە مەكسيكالىق دەرەك كاردەناستى ءتورتىنشى راۋندتا ەسىنەن تاندىردى. ارينە, وعان تاڭدانۋعا بولمايدى.
الاتاۋ باۋرايىندا ماگومەدراسۋل مەدجيدوۆ تا ءوز ونەرىن ورتاعا سالادى. وسىدان توعىز جىل بۇرىن الماتىدا وتكەن الەم چەمپيوناتىنىڭ فينالىندا ول ءبىزدىڭ يۆان دىچكونى اۋىر نوكاۋتقا جىبەرگەنىن جانكۇيەرلەر ۇمىتا قويعان جوق. 27 قىركۇيەكتە ازەربايجاننىڭ 26 جاسقا تولعالى وتىرعان الىبى اۋەسقوي رينگتى ارمانسىز شايقادى. ول – لوندون وليمپياداسىنىڭ قولا جۇلدەگەرى, الەمنىڭ ءۇش دۇركىن چەمپيونى, ەۋروپا چەمپيوناتى مەن يسلام ىنتىماقتاستىعى ويىندارىنىڭ جەڭىمپازى. 2009 جىلدان بەرى مەدجيدوۆ كاسىپقويلار اراسىندا كۇش سىناسىپ ءجۇر. ازىرگە ءتورت كەزدەسۋ وتكىزىپ, ۇشەۋىندە جەڭىسكە جەتتى.
الماتىداعى كاسىپقوي بوكس كەشىندە داۋرەن ەلەۋسىنوۆ, انگەلينا لۋكاس جانە تاعى باسقا وتاندىق بىلعارى قولعاپ شەبەرلەرىمىز شارشى الاڭعا كوتەرىلەدى. سونداي-اق شەت مەملەكەتتەردەن كەلگەن بىرقاتار تانىمال بوكسشىنىڭ دا ونەرىن تاماشالايمىز.
