قاسىم-جومارت توقاەۆ قازاقستان حالقىنىڭ جانە جەكە ءوزىنىڭ اتىنان ليز تراسستى ۇلىبريتانيا جانە سولتۇستىك يرلانديا بىرىككەن كورولدىگىنىڭ پرەمەر-ءمينيسترى بولىپ تاعايىندالۋىمەن قۇتتىقتادى.
پرەزيدەنت ءوزىنىڭ قۇتتىقتاۋىندا ليز تراسس ۇكىمەتتى باسقارعان كەزەڭدە ۇلىبريتانيا بۇدان دا گۇلدەنگەن جانە ورنىقتى مەملەكەت قۇرۋ جولىندا تاباندى تۇردە ىلگەرىلەي بەرەتىنىنە سەنىم ءبىلدىردى.
«قازاقستان ۇلىبريتانيامەن بەرىك دوستىق بايلانىستارعا, ورتاق قۇندىلىقتار مەن باسىمدىقتارعا نەگىزدەلگەن ءارى ۇزاق جىلدار بويى قالىپتاسقان ستراتەگيالىق سەرىكتەستىكتى جوعارى باعالايدى. قازاق-بريتان كوپقىرلى قارىم-قاتىناسىن ودان ءارى نىعايتۋ جانە وزەكتى جاھاندىق ماسەلەلەر بويىنشا ۇستانىمدارىمىزدى ۇيلەستىرۋ ءۇشىن تىعىز ىنتىماقتاستىققا دايىن ەكەنىمدى جەتكىزگىم كەلەدى», دەپ جازىلعان پرەزيدەنت جولداعان جەدەلحاتتا.
