بيىل ديسپانسەردىڭ ونكوحيرۋرگيالىق بولىمشەسىندە ونكوپلاستيكالىق رەزەكتسيالار جاساۋ باستالدى. بولىمشەگە ناۋقاستار وڭەش پەن اسقازاننىڭ, ۇيقى بەزىنىڭ, باۋىردىڭ, تىكىشەك پەن ءسۇت بەزىنىڭ, ايەل مەن ەر ادامداردىڭ جىنىس مۇشەلەرىنىڭ, سونداي-اق قيمىل-تىرەك اپپاراتىنىڭ ىسىگىمەن تۇسەدى. بيىلعى ساۋىردە 59 جاستاعى ەر ادام قويۋ تاماق ىشكەندە ءوزىن جايسىز سەزىنگەن. ءتىپتى السىزدىك بايقالعان.
ديسپانسەر دارىگەرلەرى ناۋقاسقا فيبروگاستروسكوپيا جۇرگىزىپ, وڭەشتىڭ ورتاكوكىرەك تۇسىندا ىسىك بارىن انىقتاعان. گيستولوگيالىق قورىتىندى – وڭەشتىڭ ادەنوكارتسينوماسى. ناۋقاسقا «وڭەشتىڭ ورتاكوكىرەك بولىگىنىڭ قاتەرلى ىسىگى» دياگنوزى قويىلعان. سول سەبەپتەن ناۋقاسقا ارالاس توراكولاپاروتوميا وپەراتسياسىن جاساۋعا شەشىم قابىلداندى. بۇل – وڭ جاق پلەۆرالىق قۋىستا ليمفوديسسەكتسيامەن ىشكى كەۋدەلىك ەزوفاگاسترواناستوموزدى قۇرا وتىرىپ, اسقازان پلاستيكاسى بار وڭەشتىڭ سۋبتوتالدى ديستالدى رەزەكتسياسى. كوكباۋىردىڭ توسەگىن, ىشەك استى كەڭىستىگىن, وڭ جاق پلەۆرالىق قۋىستى درەناجداۋ. ءتورت ساعاتقا سوزىلعان وپەراتسيانى حيرۋرگ ماقسات شامشەنوۆ جاساعان.
وتادان كەيىنگى گيستولوگيالىق قورىتىندىدا كەسىلگەن شەتتەردەن ىسىكتىڭ ءوسۋى انىقتالعان جوق. ناۋقاسقا ساۋلەلىك جانە حيميالىق تەراپيامەن ەمدەۋدىڭ ەكى كۋرسى جۇرگىزىلگەن. قازىر ناۋقاس ەم الۋدى جالعاستىرىپ جاتىر.
– ونكولوگيالىق اۋرۋلار الەۋمەتتىك ماڭىزى بار دەرت قاتارىنا جاتادى. مۇنداي دياگنوزبەن اۋىرعان ناۋقاستارعا مەديتسينالىق كومەك, ونىڭ ىشىندە دارىلىك قامتاماسىز ەتۋ ءمامس بويىنشا ساقتاندىرىلعان ستاتۋسىنىڭ بار نەمەسە جوقتىعىنا قاراماستان كورسەتىلەدى, – دەيدى «الەۋمەتتىك مەديتسينالىق ساقتاندىرۋ قورى» كەاق اتىراۋ وبلىسى بويىنشا فيليالىنىڭ ديرەكتورى بايتوللا عازيزوۆ.
اتىراۋ وبلىسى
