ءوزىم اۋىل شارۋاشىلىعى سالاسىنىڭ مامانى بولعان سوڭ, وسى باعىتتا كوپ جىل ەڭبەك ەتتىم. بۇگىنگى تاڭدا عالىمداردىڭ جاڭالىقتارى ءوندىرىس سالاسىنا ەنبەي جاتىر. عىلىم مەن وندىرىستە تىعىز بايلانىس جوق. عىلىم ءوز الدىنا, ونەركاسىپ پەن شارۋاشىلىق ءوز الدىنا دامۋدا. ال عىلىمنىڭ جەتىستىگى ءىس جۇزىندە جۇزەگە اسپاعان ەلدە ەكونوميكالىق قارقىندى سەرپىلىس تە بولمايتىنى انىق. ماسەلەن, ءبىزدىڭ ءوندىرىپ جاتقان بيداي, ارپا, جۇگەرى جانە باسقا داقىلداردىڭ ونىمدىلىك كورسەتكىشتەرى تومەن. باياعى كەڭەس داۋىرىندەگى دەڭگەيدە قالىپ قويعان. ءبىر گەكتاردان ەڭ جوعارى دەگەننىڭ وزىندە 17-20 تسەنتنەردەن الدىق دەپ ءماز بولامىز. ال دامىعان شەتەلدەردە بيدايدىڭ شىعىمدىلىعى گەكتارىنا 60-70 تسەنتنەردەن كەلەدى, ءتىپتى 100 تسەنتنەرگە جەتكىزگەندەرى دە بار. اۋىل شارۋاشىلىعىن دۇرىس جولعا قويىپ العان ەلدەردە بيدايدىڭ نەبىر كەرەمەت سۇرىپتارى بار. ەلىمىزدە ىزدەنىس جاسايتىن ازاماتتار از ەمەس. ايتالىق, جامبىل وبلىسىنىڭ قورداي اۋدانىندا ءبىر توپ جىگىت يگىلىكتى ءىستى قولعا الىپ, فرانتسيا جانە باسقا شەتەلدەن بيدايدىڭ جاڭا ءتورت-بەس سۇرىبىن الىپ كەلىپ, القاپقا سەپتى. سول القاپتان 70 تسەنتنەرگە دەيىن ءونىم العانىن كوزىمىز كوردى. وندىرىستە ۇلكەن جەتىستىككە عىلىمي جاڭالىقتارى ارقىلى جەتۋگە بولادى. بۇل سونىڭ ءبىر دالەلى عانا. وسى ورايدا, عالىمداردىڭ الدىندا ۇلكەن مىندەتتەر تۇر. جاڭا قۇرىلعان عىلىم جانە جوعارى ءبىلىم مينيسترلىگى اتالعان باعىتقا باسا كوڭىل ءبولىپ, تىڭ باستامالاردى جۇزەگە اسىرسا, وتاندىق ءونىمنىڭ تابىسى دا ارتا تۇسپەك.
ويتكەنى بولاشاقتا ازىق-ت ۇلىك ونىمدەرى ۇلكەن سۇرانىسقا يە بولاتىنى ءسوزسىز. ءوز حالقىمىزدى قامتاماسىز ەتىپ, ارتىعىن شەتەلگە وڭدەپ ساتاتىن بولساق, ەل ەكونوميكاسىنىڭ وركەندەۋىنە سۇبەلى ۇلەس بولىپ قوسىلار ەدى.
ومىردە ءارتۇرلى جاعداي بولادى. ەشكىم دە سوتقا ەرىككەننەن بارمايدى. ادىلەتسىزدىك, قىسىم نە ءجابىر كورسە, سوتقا شاعىمدانادى. ال «مەنى قورعايدى» دەگەن ۇمىتپەن بارعان سوتى دۇرىس شەشىم شىعارماسا, نە بولماق؟! حالىقتى اشىندىراتىن دا وسى جايت. ءادىل قازىلىق جاساۋ قاي قوعامدا دا ماڭىزدى ءرول اتقارادى. ءبيى ءادىل بولماعان جەردە بەرەكە دە, بىرلىك تە بولمايدى.
وسىنى تەرەڭ تۇسىنگەن قازاقستان پرەزيدەنتى سوت سالاسىنداعى قوردالانعان ماسەلەلەرگە توقتالدى. ادىلەتتى قوعام ورناتۋ ءۇشىن ءبىرىنشى كەزەكتە سوت جۇيەسى ءادىل ءارى تاۋەلسىز بولۋعا ءتيىس. بىرنەشە ميلليون قاراجاتتى جىمقىرعاندار ەبىن تاۋىپ, قۇتىلىپ كەتىپ ءجۇر. ال مايدا-شۇيدە قىلمىسقا قاتىستى ۇستالعانداردى شىڭعىرتىپ سوتتاپ جاتادى. مۇنىڭ ءبارى سوت جۇيەسىنىڭ ەسكىرگەندىگىنەن تۋىپ وتىر. وسى سەكىلدى باسقا دا جاعدايلاردا ءادىل شەشىم شىقپاعان سوڭ, حالىقتىڭ سوت جۇيەسىنە ريزا ەمەستىگى ايتىلىپ ءجۇر. قوعامنىڭ مۇنداي دەرتىن جاسىرۋعا بولمايدى. سوت ءبىر-بىرىنە باعىنىستى بولسا, ءادىل شەشىم شىعارادى دەگەنگە سەنۋ قيىن.
پرەزيدەنت قوعامدا زاڭ ۇستەمدىگى ورىن الىپ, سوت تورەلىگى ءادىل بولۋى ءۇشىن سۋديالاردى دا سايلاۋ ارقىلى تاڭداۋ جانە ۇمىتكەرلەردى بالامالى نەگىزدە ۇسىنۋ ءتاسىلىن ەنگىزۋ قاجەت ەكەنىن ايتتى. سوندا عانا سۋديالاردىڭ دەربەستىگى ارتادى. قاسىم-جومارت كەمەل ۇلى ەلىمىزدەگى كۇش قۇرىلىمدارى سوتقا ىقپال ەتپەۋگە ءتيىس ەكەنىن جانە سۋديالارعا اكىمشىلىك قىسىم كورسەتەتىن امال-ءتاسىلدىڭ ءبارى جويىلۋى كەرەكتىگىن باسا ايتتى. بۇل باستامانى حالىق قۋانا قابىل الۋدا.
مەملەكەتتىك باسقارۋ جۇيەسىندە تۇبەگەيلى وزگەرىستەر بولاتىنى وتە قۇپتارلىق جايت. ءاربىر قىزمەتكەر وزىنە جۇكتەلگەن ۇلكەن جاۋاپكەرشىلىكتى سەزىنە وتىرىپ, ەلدىڭ مۇددەسى ءۇشىن ەڭبەك ەتۋى قاجەت. سوندا عانا ءبىز وركەنيەتتى ءارى ءادىل قوعام قۇرا الامىز. قازىر جاريالىلىق زامانى. ەشتەڭەنى جاسىرا المايسىڭ. تەلەارنالار مەن الەۋمەتتىك جەلىلەر ارقىلى كەيبىر باسشىلاردىڭ ورەسكەل قاتەلىكتەرى, جات قىلىق كورسەتكەنى ەلگە تەز تاراپ كەتەدى. ءوڭىر باسشىلارى دا سىنعا ىلىگىپ جاتادى. حالىقپەن جۇمىس ىستەي ءبىلۋ كەز كەلگەن ادامنىڭ قولىنان كەلە بەرمەيدى! ول ءۇشىن ءبىر ادامنىڭ بويىندا ونداعان قاسيەت بولۋعا ءتيىس. سونىڭ ىشىندە ىسكەرلىك, شەبەر ۇيىمداستىرۋشىلىق, ادامگەرشىلىك, ءبىلىم مەن بىلىكتىلىك, پاراسات پەن پايىم قاجەت. جۇمىستى جۇيەلى جۇرگىزۋ, وڭ ناتيجەگە قول جەتكىزۋ باسشىعا تىكەلەي بايلانىستى.
جولداۋدا ەسكەرتۋلەر دە ايتىلدى, جاڭا باعىتتار دا بەرىلدى. پرەزيدەنت كاسىپكەرلەرگە مەملەكەت تاراپىنان قولداۋ جاسالاتىنىن جەتكىزدى. ولارعا جەر تەلىمدەرىن اشىق ءارى جەدەل ءبولۋدىڭ ءتيىمدى تاسىلدەرى ايقىندالاتىن بولدى. سونداي-اق قۇلشىنىپ تۇرعان جاستارعا كاسىپكەرلىك باستامالارىن جۇزەگە اسىرۋ ءۇشىن جان-جاقتى قولداۋ جاسالاتىنى, ولارعا جەڭىلدەتىلگەن تارتىپپەن شاعىن نەسيە بەرىلەتىنى ايتىلدى. بۇل – وسكەلەڭ ۇرپاق وكىلدەرىنە بىلدىرىلگەن ۇلكەن سەنىم. كاسىپ جاساپ, وتباسىمدى اسىرايمىن, ەلىمنىڭ دامۋىنا پايدام تيەدى دەپ تۇرعان ازاماتتاردىڭ قولتىعىنان دەمەپ جىبەرسەك, ەرتەڭ-اق ەكونوميكامىزدىڭ باسەكەگە قابىلەتتى بولۋىنا, حالىقتىڭ جاعدايى جاقسارۋىنا ىقپال ەتەتىنى اقيقات.
ۇلتتىق قوردان جانە «سامۇرىق-قازىنا» قورىنىڭ تازا پايداسىنان الەۋمەتتىك سالالارعا قارجى ءبولىنىپ, سونىڭ ىشىندە بالالار ءۇشىن جاڭا باعدارلامالار قولعا الىناتىن بولدى. جەرىمىزدىڭ استى مەن ۇستىندەگى بايلىعىنان تۇسەتىن تابىس تا حالىقتىڭ يگىلىگىنە جۇمسالماق.
مەملەكەت باسشىسى جاس ۇرپاقتىڭ كەلەشەگىنە جاناشىرلىقپەن الاڭداۋشىلىعىن ءبىلدىردى. ەسىرتكى ونىمدەرىن نەشە ءتۇرلى جولدارمەن ساتاتىندارعا تىيىم سالۋ كەرەك ەكەنىن ەسكەرتە كەلە, ءتيىستى ورگاندارعا ونىمەن كۇرەسۋدىڭ كەشەندى جوسپارىن ازىرلەۋدى تاپسىردى.
قاسىم-جومارت كەمەل ۇلىنىڭ ەلدى ەلەڭ ەتكىزگەن جاڭالىعى – پرەزيدەنت مانداتىنىڭ ۇزاقتىعىن 7 جىلعا ۇزارتۋ جانە ونىڭ سايلانۋىن ءبىر-اق مەرزىممەن شەكتەۋ تۋرالى شەشىمى. ول حالىقتىڭ كوڭىلىنەن شىعاتىن ويدى ءدوپ باستى. الەمدە مۇنداي جاڭالىقتار سيرەك بولادى.
بۇل جولداۋدا قۇرعاق ۋادە نەمەسە كۇنى ەرتەڭ-اق عاجايىپ جەتىستىكتەرگە جەتەمىز دەگەن ۇراندار بولعان جوق. حالىقتى تولعاندىرىپ وتىرعان قازىرگى كۇردەلى قوعامدا وزەكتى پروبلەمالاردى شەشۋدىڭ ناقتى جولدارى ۇسىنىلدى.
جولداۋدا قامتىلعان ماسەلەلەردىڭ ءبارى ىسكە اسۋى كەرەك. ول ءۇشىن ءتيىستى زاڭدارعا وزگەرىستەر ەنگىزىلگەنى ءجون. مۇنىڭ ءبارى مەملەكەتىمىز بەن حالقىمىز ءۇشىن جاسالعان يگىلىك بولادى.
ءبىزدىڭ حالىق الەمدىك قوعامداستىقتا بەدەلى زور, مارتەبەسى بيىك, ادىلەتتى قازاقستاندى كورگىسى كەلەدى. پرەزيدەنتتىڭ جولداۋداعى تىڭ باستامالارى وسى ەلدىك مۇددەنىڭ بەرىك ىرگەتاسى بولىپ قالانۋىن تىلەيمىز.
قۇرمانعالي ءۋالي,
قوعام قايراتكەرى
