قوعام • 05 قىركۇيەك، 2022

قيسىنسىز زاڭ قۇقىق بۇزۋعا يتەرمەلەيدى

1350 رەت كورسەتىلدى

مەملەكەت باسشىسى قاسىم-جومارت توقاەۆ «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا: «بيۋدجەت ۇدەرىستەرىن بارىنشا جەڭىلدەتۋ قاجەت. مەملەكەتتىك ورگانداردىڭ يگەرىلمەگەن قاراجاتتى كەلەسى جىلعا قالدىرۋىنا مۇمكىندىك بەرۋ كەرەك. سول ارقىلى ولار اقشانى بيۋدجەتكە قايتارۋدىڭ ءتيىمسىز تارتىبىنەن قۇتىلادى»، دەي كەلىپ، وسى ماقساتتا جاڭا بيۋدجەت كودەكسى مەن «مەملەكەتتىك ساتىپ الۋ تۋرالى» جاڭا زاڭ قابىلداۋ قاجەتتىگىن ايتتى.

پرەزيدەنت كوپشىلىكتىڭ، اسىرەسە مەملەكەتتىك قىزمەتشىلەر مەن مەردىگەرلىك ۇيىمدار باسشىلارىنىڭ كوكەيلەرىندە كوپتەن جۇرگەن ماڭىزدى ماسەلەنى ءدوپ باسىپ، ونىڭ بىردەن-ءبىر دۇرىس شەشى­مىن ۇسىندى. سەبەبى تالاي مەملەكەتتىك قىزمەتشى مەن مەملەكەتتىك تاپسىرىس­تى ورىنداۋشى كاسىپكەر جىل سوڭىندا بولىنگەن قارجىنى تولىق يگەرە الماي، ونى قولدانىستاعى زاڭناماعا سايكەس قازىناعا قايتارماۋ ءۇشىن جالعان اكت جاساپ، قۇقىق بۇزۋعا ءماجبۇر بولىپ جۇرگەنى بەل­گىلى. بۇعان ءوز باسىم ەرتەرەكتە وبلىستىق تارتىپتىك كەڭەستىڭ مۇشەسى رەتىندە كوز جەتكىزگەنمىن. ءتىپتى كەيبىر مەملەكەتتىك قىزمەتشىگە قيانات جاساعانىمىزداي بولىپ كورىنىپ، ءالى كۇنگە جادىمىزدان شىقپايتىن جايلار دا بار.

سونىڭ ءبىر مىسالى – قىزىلجار مەن كوكشەتاۋ وڭىرىنە بەلگىلى اتبەگى ەرمەك ماحاتوۆ. ول ۇزاق ۋاقىت اۋداندىق ىشكى ىستەر ءبولىمىن باسقارىپ، پوليتسيا پودپولكوۆنيگى شەنىن الىپ، زەينەتكە شىققان سوڭ ۇيىندە قول قۋسىرىپ وتىرا الماي، كونكۋرس ارقىلى ءۋاليحانوۆ اۋدانى اكىمىنىڭ ورىن­باسارى قىزمەتىنە ورنالاسقان. بۇل جاۋاپتى قىزمەتىن دە بىرنەشە جىل بويى ابىرويمەن اتقارىپ، باسشى كادرلار تۇراقتاي قويمايتىن شالعايداعى اۋداننىڭ دامۋىنا وزىندىك ۇلەسىن قوسىپ جۇرگەن ەدى. ويلا­ماعان جەردەن ءبىر كۇنى وبلىستىق تارتىپتىك كەڭەستىڭ «كىلەمىنە» شاقىرىلىپ، ءارتۇرلى كىنا تاعىلعان مەملەكەتتىك قىزمەتشىلەردىڭ قاتارىنا قوسىلىپ، الدىمىزدا قاباعى ءتۇسىپ تۇردى.

– وبلىستىڭ ەڭ الىس اۋدانىندا قىزمەت ىستەپ جۇرسەك تە، توزىعى جەتكەن ەسكى كولىك ءمىنىپ، قيىنشىلىق كورىپ كەلەمىز. سوعان وراي بىلتىرعى 18 قاراشادا بولعان اۋداندىق ءماسليحاتتىڭ سەسسياسىنىڭ شەشىمىمەن ءوزىم نەگىزگى قىزمەتىمە قوسا باسقارىپ وتىرعان اۋداندىق قۇرىلىس بولىمىنە جاڭا اۆتوموبيل ساتىپ الۋعا 2 ميلليون تەڭگە ءبولىندى. بۇل قارجى شوتىمىزعا تۇسكەن سوڭ 5 جەلتوقساندا مەملەكەتتىك ساتىپ الۋ پورتالىنا باعا ۇسىنىستارى ءادىسى بويىنشا جەڭىل اۆتوموبيل ساتىپ الۋ تۋرالى كونكۋرس جاريالادىق. ونىڭ جەڭىمپازى بولىپ، 1 ميلليون 971مىڭ 200 تەڭگە باعا ۇسىنعان دارا كاسىپكەر تانىلدى. ونىڭ استانادا تۇراتىن باسشىسىمەن 12 جەلتوقساندا ەكىجاقتى كەلىسىمشارت جاساستىق. وندا كاسىپكەردىڭ «لادا 21214» ماركالى ءاۆتوموبيلدى 31 جەلتوقسانعا دەيىن جەتكىزىپ بەرەتىنى اتاپ كورسەتىلدى. ول بىزگە شوت-فاكتۋراعا قوسا، جازباشا كەپىلدىك حاتىن دا تاپسىردى. سوعان سەنىپ، قازىناشىلىق ورگانى ارقىلى تولەم جاسالاتىن سوڭعى كۇن – 28 جەلتوقساندا اۆتوموبيل ساتىپ الۋعا بولىنگەن قارجىنىڭ كەلىسىمشارتتا كورسەتىلگەن سوماسىن دارا كاسىپكەردىڭ شوتىنا اۋدارىپ جىبەردىك. الايدا ول سوزىندە تۇرمادى. ۋاعدالاسقان مەرزىمدە كولىك قولىمىزعا تيمەگەن سوڭ، ءوزىمىز دابىل قاعىپ، پروكۋراتۋرا مەن قارجى پوليتسياسى ورگاندارىنا شاعىمداندىق. سونداي-اق استانانىڭ مامانداندىرىل­عان ەكونوميكالىق سوتىنا جۇگىنىپ، دارا كاسىپكەردەن اۋدارعان قارجىمىزدى ءوندىرىپ الۋ تۋرالى شەشىمدى دە الدىق. ءبىزدىڭ ەشقانداي بوتەن ويىمىز بولعان جوق. جىل سوڭىندا بولىنگەن اقشانى ۋاقتىلى يگەرمەسەك، ول سوما بيۋدجەتكە قايتارىلىپ الىناتىندىقتان، وسىلاي ىستەۋگە ءماجبۇر بولدىق... – دەپ اقتالعان-تۇعىن ەرمەك ماحاتوۆ.

ارينە، «مەملەكەتتىك ساتىپ الۋ تۋرالى» زاڭ بويىنشا ونىڭ قولعا تيمەگەن تاۋار ءۇشىن تولىق اقى تولەۋگە حاقىسى جوق ەدى. بۇل – سىبايلاس جەمقورلىققا قارسى كۇرەس زاڭناماسىن بۇزۋ بولىپ سانالادى. سوعان وراي ءبىز، وبلىستىق تارتىپتىك كەڭەس مۇشەلەرى، پروكۋراتۋرانىڭ ۇسىنىمىمەن كەلىسىپ، ەرمەك ماحاتوۆتى اتقارىپ جۇرگەن قىزمەتىنەن بوساتۋ تۋرالى شەشىمدى قينالا قابىلداعانبىز.

ەندى، مىنە، مەملەكەت باسشىسى وسىنداي قيسىنسىز زاڭنان تۋىندايتىن ادىلەتسىزدىكتى بولدىرماۋ جولىن تاۋىپ بەرىپ وتىر. بۇل ەلىمىزدە جىل سوڭىندا تىم كوبەيىپ كەتەتىن سىبايلاس جەمقورلىق قۇقىق بۇزۋشىلىقتار سانىن الدەقايدا ازايتا تۇسەرى داۋسىز. 

سوڭعى جاڭالىقتار

ۇمىتىلماس تاريحي ءسات

پىكىر • بۇگىن، 07:43

باتىل كوزقاراس، بايىپتى جول

پىكىر • بۇگىن، 07:42

ەل سەنىمىن ارتتىرعان

پىكىر • بۇگىن، 07:41

قاپىسىز حالىق قالاۋى

پىكىر • بۇگىن، 07:40

شاعىن بيزنەستىڭ شاراپاتى

بيزنەس • بۇگىن، 07:39

ساپالى ينتەرنەت قولجەتىمدى

قوعام • بۇگىن، 07:35

ۇقساس جاڭالىقتار