وتكەن عاسىردا ءبىلىم العاندار جاتاقحانادا تۇرماسا, تولىققاندى ستۋدەنتتىك ءومىردى كورگەن سانالمايتىن. دۋلى, شۋلى جاتاقحانا ءومىرىنىڭ قىزىقتىعى سونداي, قالادا ءۇيى نەمەسە ەتجاقىن تۋىسقانى بار قىز-بوزبالانىڭ ءوزى ستۋدەنتتەر ءۇيىن جاعالاپ ءجۇرۋشى ەدى...
جاتاقحانا – تەك ستۋدەنتتەر باسپاناسى ەمەس, ءتالىم مەن تاربيەنىڭ دە بەسىگى عوي. كەيىنگى جىلدارى جاتاقحانا تاپشى بولىپ, ستۋدەنت اتاۋلى پاتەر جاعالاپ كەتكەندە, جاس ۇرپاقتىڭ باسىم بولىگى قاداعالاۋسىز قالعانى راس.
بۇل ماسەلەنىڭ اسا وزەكتى بولىپ, مەملەكەتتىك دەڭگەيگە جەتكەنى سونداي, 2018 جىلى تۇڭعىش پرەزيدەنت ن.نازارباەۆ بەس الەۋمەتتىك باستاما كوتەرىپ, ەلگە ۇندەۋ جاسادى. مۇنداعى 5 ماسەلەنىڭ ءبىرى – ءدال وسى جاتاقحانا ەدى. بۇل تاپسىرما باتىس قازاقستان وبلىسىندا قالاي جۇزەگە استى؟
ء«بىزدىڭ وڭىردە بۇل باعدارلاما بويىنشا 4 جاتاقحانا قۇرىلىسى جوسپارلانعان بولاتىن. 2020 جىلى باتىس قازاقستان جوعارى مەديتسينالىق كوللەدجى ستۋدەنتتەرى ءۇشىن 144 ورىندىق جاتاقحانا پايدالانۋعا بەرىلدى. 2021 جىلى باتىس قازاقستان يندۋستريالدىق كوللەدجىنىڭ ستۋدەنتتەرى ءۇشىن «ورال ترانسفورماتور زاۋىتى» اۋماعىنداعى عيمارات جاڭعىرتىلىپ, ستۋدەنتتەر يگىلىگىنە ۇسىنىلدى. بۇگىن, مىنە, ورال پوليتەحنيكالىق كوللەدجى ستۋدەنتتەرىنە ارنالعان 150 ورىندىق جاتاقحانانىڭ تۇساۋىن كەسىپ وتىرمىز. ال 2023 جىلى ماحامبەت وتەمىس ۇلى اتىنداعى باتىس قازاقستان ۋنيۆەرسيتەتى ستۋدەنتتەرىنە ارنالعان 500 ورىندىق جاتاقحانانى پايدالانۋعا بەرۋدى جوسپارلاپ وتىرمىز», دەيدى وبلىس اكىمى عالي ەسقاليەۆ.
جاڭا وقۋ جىلى قارساڭىندا, كونستيتۋتسيا كۇنىنە وراي اشىلعان جاتاقحانا اباي داڭعىلىنىڭ بويىندا ورنالاسقان. مۇندا ورال پوليتەحنيكالىق كوللەدجى عانا ەمەس, جاقىن ماڭداعى وزگە دە كاسىپتىك ءبىلىم بەرۋ ۇيىمدارىنىڭ ستۋدەنتتەرى دە جاتا الادى. وڭىرگە بەلگىلى «بولاشاق-ت» قۇرىلىس كومپانياسى 604,453 ملن تەڭگە جۇمساپ, ءوز قاراجاتى ەسەبىنەن سالعان بەس قاباتتى عيماراتتىڭ اۋماعى 3 972,48 شارشى مەتردى قۇرايدى. 2021 جىلدىڭ مامىر ايىندا باستالعان قۇرىلىس ءبىر جىلدان اسا ۋاقىتتا جاس تۇرعىندارىن قابىلداۋعا دايىن بولعان. مۇندا ءبىلىم الۋعا كەلگەن ستۋدەنت ءۇشىن بارلىق جاعداي جاسالعان. قاراڭىز, جاتاقحانانىڭ ءبىرىنشى قاباتىندا اس ءۇي, 24 ورىنعا ارنالعان بۋفەت, يزولياتورى بار مەديتسينالىق كابينەت, ترەناجەر زالى, كەزەكشى وقىتۋشىلار مەن كومەندانت بولمەسى, سونداي-اق تۇرمىستىق قىزمەت, جەكە زاتتارىن ساقتاۋعا ارنالعان بولمەلەر ورنالاسقان. 1-5 قاباتتاردا ورنالاسقان ستۋدەنت بولمەلەرى ەكى ادامعا تۇرۋعا ارنالعان. 2 جانە 3 بولمەلىك وسىنداي بلوكتاردىڭ سانى 34 ەكەن. مۇنداعى ءاربىر تۇرعىن بلوك اس-ءۇي جيھازىمەن, تاماقتى جىلىتۋعا جانە دايىنداۋعا ارنالعان ەلەكتر پليتاسىمەن, توڭازىتقىشتارمەن, تۇسكى اس ۇستەلىمەن, سانيتارلىق توراپپەن جانە جۋىنۋ بولمەسىمەن جابدىقتالعان.
بۇعان قوسا ءار قاباتتا جاستاردىڭ ساباققا دايىندالاتىن جانە تۇرمىستىق قىزمەت كورسەتۋگە ارنالعان بولمەلەرى بار. مۇنداعى ءاربىر بولمەدە كەرەۋەت, ورىندىق, ۇستەل, كيىم-كەشەككە ارنالعان شكاف, كىتاپ سورەسى دايىن تۇر. ساباققا دايىندالاتىن بولمەدە كومپيۋتەرلەر, تۇرمىستىق قىزمەت بولمەلەرىندە كىر جۋاتىن ماشينا, ۇتىك سەكىلدى قاجەتتى قۇرال-جابدىقتىڭ تۇرعانىن ايتا كەتەيىك. ال عيماراتقا كىرەر جەردە بەينەباقىلاۋ كامەراسى قويىلىپ, تۋرنيكەت ورناتىلعان. «نىساندى كۇزەتۋگە ارناۋلى كۇزەت اگەنتتىگىمەن شارت جاسالادى», دەيدى جاتاقحانا كومەندانتى.
باتىس قازاقستان وبلىسىندا 700-دەي ستۋدەنت جاتاقحاناعا مۇقتاج ەكەن. وڭىردەگى دەموگرافيالىق احۋال دا جىل سايىن وڭ ديناميكا كورسەتىپ وتىر. ياعني الداعى جىلدارى وقۋشى جاستار كوبەيىپ, ستۋدەنتتەر سانى دا ارتارى انىق.
– ءبىزدىڭ قارجى ورتالىعىنىڭ مالىمەتىنشە, بىلتىردان باستاپ مەكتەپ بىتىرۋشىلەر سانى ايتارلىقتاي وسكەن. ماسەلەن, بيىل 5 672 وقۋشى مەكتەپ بىتىرسە, 2025 جىلعا قاراي بۇل كورسەتكىش 6 500-گە جەتۋى مۇمكىن. بۇل ماسەلەنى شەشۋ ءۇشىن مەملەكەتتىك مەكەمەلەردەن بولەك, زاڭدى تۇلعالاردىڭ جەكە قاراجاتى ەسەبىنەن ستۋدەنتتەرگە ارنالعان جاتاقحانا سالىپ, تابىس الا الاتىن مەحانيزم ازىرلەندى. ياعني جوباعا قاتىسۋعا نيەت بىلدىرگەن قۇرىلىس مەكەمەسى ءوز قاراجاتىنا نىسان سالىپ, پايدالانۋعا بەرگەن سوڭ 8 جىل ىشىندە ءاربىر توسەكتىك ورىن ءۇشىن مەملەكەتتەن تولەم الادى. بۇل تولەمنەن بولەك, ينۆەستوردىڭ ءوزى كوممەرتسيالىق كەڭىستىكتەن قوسىمشا تابىس الا الادى, ياعني جاتاقحانا بازاسىندا اسحانا, شاشتاراز جانە باسقا دا شارۋاشىلىق نىساندارىن اشۋ مۇمكىندىگى قاراستىرىلعان. بۇگىن مىنە, ورال پوليتەحنيكالىق كوللەدجى ستۋدەنتتەرى ءۇشىن «بولاشاق-ت» كومپانياسى 150 ورىندىق جاتاقحانا قۇرىلىسىن اياقتادى. ءوز جەكە ينۆەستيتسياسى ەسەبىنەن جاتاقحانا سالعان كومپانيا باسشىلىعىنا جاستارعا دەگەن قامقورلىعى ءۇشىن العىسىمدى بىلدىرەمىن. اقجايىق جاستارى ءۇشىن بۇل ۇلكەن سىي دەپ بىلەمىن, – دەدى وبلىس اكىمى ع.ەسقاليەۆ.
سالتاناتتى جيىندا مەردىگەر كومپانيا باسشىسى اسقار قوشانوۆ تا ءسوز سويلەپ, ستۋدەنت جاستاردى جاڭا باسپانامەن قۇتتىقتادى. ال ستۋدەنتتەر ءۇيىنىڭ تۇساۋىن كەسۋ ءبىلىم بەرۋ سالاسىنىڭ ارداگەرى, ورال پوليتەحنيكالىق كوللەدجىندە ۇزاق جىل ديرەكتور بولعان, قازىرگى تاڭدا وبلىستىڭ ءبىلىم سالاسى قىزمەتكەرلەرى ارداگەرلەر كەڭەسىنىڭ توراعاسى قانات قىرىقباەۆقا بەرىلدى. وسىنداي تاماشا وقيعا ەل پرەزيدەنتى قاسىم-جومارت توقاەۆ جاريالاعان بالالار جىلى اياسىندا وتكىزىلىپ وتىرعانى ايتىلدى.
مىنە, قىركۇيەك كەلدى, بارلىق ءبىلىم وردالارىندا ساباق باستالدى. بيىل پاتەر جالداپ, ءۇي يەسىنىڭ قاس-قاباعىنا قارايتىن ورالدىق ستۋدەنتتەردىڭ سانى 150-گە ازايدى. بۇل – ۇلكەن قۋانىش. ولار ەندى الاڭسىز ءبىلىم الاتىن بولادى.
باتىس قازاقستان وبلىسى
