مينيستر بىرىككەن ۇلتتار ۇيىمىنىڭ باستاماسىمەن اتاپ وتىلە باستاعان بۇل كۇننىڭ نەگىزگى ماقساتى – جالپى ازاماتتىق قوعام وكىلدەرىن وزگەلەرگە كومەك كورسەتۋگە, ىزگىلىككە شاقىرۋ ءارى قايىرىمدىلىققا جۇمىلدىرۋ ەكەنىن اتاپ ءوتتى.
«مۇقتاج جانعا قامقور بولۋ, ۋاقىت نە قارجى ارقىلى كومەك بەرۋ, قايىرىمدىلىققا ىنتالى بولۋ, ۆولونتەرلىك جاساۋ – ءبىزدىڭ ىرىستى ىنتىماعىمىزدىڭ, تىنىشتىق پەن ۇيلەسىمدە ءومىر ءسۇرۋىمىزدىڭ كەپىلى ءارى دامىعان قوعامنىڭ ءبىر بەلگىسى سانالادى», دەدى دارحان قىدىرالى.
ونىڭ ايتۋىنشا, تاريحتىڭ تار كەزەڭدەرىندە ۇلت رەتىندە ساقتالىپ قالۋىمىزدا دا مەيىرىم-شاپاعات اسەرى مول.
«بارشاعا بەلگىلى, مەيىرىمدىلىك پەن قايىرىمدىلىق – حالقىمىزدىڭ قاسيەتتى قۇندىلىعى. ءال-فارابي ىندەتە ىزدەگەن ىزگىلىك, اباي تەرەڭ بويلاعان جىلى جۇرەك پەن پاراساتتىلىق بۇگىنگى بۋىننىڭ دا بويىنان تابىلادى. كەشە الەمدىك پاندەميادا ءبىر ەل بولىپ بىرىگىپ, بۇگىن قوستاناي حالقى تابيعي اپاتپەن بەتپە-بەت كەلگەندە, ۇلت بولىپ ۇيىسىپ, كومەك قولىن سوزا بىلدىك. ويتكەنى ادام ءومىرى, ازاماتتاردىڭ قاۋىپسىزدىگى – مەملەكەتىمىزدىڭ باستى بايلىعى.
قازاقستان پرەزيدەنتى ءوز جولداۋىندا «مەملەكەت, ەڭ الدىمەن, بارىنە بىردەي مۇمكىندىك بەرىپ, ادىلدىك ورناتادى. قوعام يگىلىگىنە ارنالعان قىزمەت دەڭگەيى جوعارى بولۋىنا كەپىلدىك بەرەدى. الەۋمەتتىك جاعىنان ءالسىز توپتاعى ازاماتتارعا قولداۋ كورسەتەمىز. مۇمكىندىگى شەكتەۋلى جاندارعا دا كومەكتەسەمىز», دەدى. بيىل «قايىرىمدىلىق تۋرالى» زاڭعا وزگەرىستەر ەنگىزىلىپ, ىزگى ىستەرمەن اينالىساتىن ۇيىمدار مەن مەتسەناتتارعا ءبىرشاما مەملەكەتتىك قولداۋ كورسەتىلەتىنى جازىلدى. بۇل باعىتتاعى جۇمىستار جالعاسا بەرمەك. ەرىكتى ەڭبەك ەتىپ, مۇقتاج جاندارعا قول ۇشىن سوزىپ, قايىرىمدىلىق جاساپ جۇرگەن بارشا ىزگى جانعا العىس ايتامىز!
مەرەكە قۇتتى بولسىن!», دەپ جازدى دارحان قىدىرالى.
