ميۋنحەندەگى وقيعا بىلاي وربىگەن: سول كۇنى تۇنگى ساعات 4:30-دا پالەستينانىڭ راديكالدى ۇيىمىنىڭ مۇزداي قارۋلانعان سەگىز مۇشەسى جاسىرىن تۇردە وليمپيادالىق قالاشىققا ەنىپ, ءيزرايلدىڭ سپورتتىق دەلەگاتسياسى ورنالاسقان پاۆيلونعا كەلەدى. كىرگەن بەتتە ۇيقىلى-وياۋلى بىرنەشە ادامدى كەپىلدىككە الادى. ارالارىندا قارسىلىق كورسەتپەك بولعان سپورتشىلاردى اياۋسىز جازالايدى. تەرروريستەر وزدەرىن «قارالى قىركۇيەك» دەپ اتالاتىن ۇيىمنىڭ مۇشەلەرى ەكەندەرىن ايتىپ, يزرايل مەن باتىس ەۋروپا ەلدەرىنىڭ تۇرمەلەرىندە جاتقان «پالەستينانى ازات ەتۋ» قوزعالىسىنىڭ 250 مۇشەسىن ساعات 9:00-گە دەيىن بوساتۋدى تالاپ ەتەدى. ال وزدەرى مىسىرعا اتتاناتىندارىن ايتىپ, ء«بىزدى ۇشاقپەن قامتاماسىز ەتىڭدەر» دەيدى. ساعات تاڭعى التىلار شاماسىندا بۇل وقيعا جەر جاھانعا تارايدى.
اۋەلدە تالاپقا كونگەندەي سىڭاي تانىتقان جەرگىلىكتى بيلىك استىرتىن جوسپار قۇرادى. تەرروريستەر مەن كەپىلدىككە الىنعان ادامداردى تىكۇشاقپەن ميۋنحەننىڭ اسكەري اەرودرومىنا اكەلىپ, «سىزدەردى كايرعا دەيىن ۇشاقپەن جەتكىزەمىز» دەپ سەندىرەدى. ال اەرودروم ايماعىندا سنايپەرلەر وق جاۋدىرۋعا دايار تۇرادى. تەرروريستەر بەلگىلەنگەن جەرگە جەتكەندە, باسشىلار بۇيرىق بەرەدى دە, مەرگەندەر دەرەۋ ىسكە كىرىسەدى. قارسى جاق تا قاراپ قالمايدى. تەلەديدار ارقىلى كۇللى الەم بۇل اتىس-شابىستىڭ كۋاسى بولادى. ناتيجەسىندە, كەپىلدىككە الىنعاندار تۇگەلدەي قازا تاۋىپ, سونىمەن قوسا بەس تەرروريست پەن ءبىر پوليتسەي وقيعا ورنىندا كوز جۇمدى. بارلىعى 17 ادام باقيلىق بولدى. قالعان قاراقشىلار قولعا تۇسەدى. بۇل وقيعا «قارالى قىركۇيەك» دەگەن اتاۋمەن تاريحتا قالدى.
ءيزرايلدىڭ سول كەزدەگى پرەمەر-ءمينيسترى گولد مەير پالەستينالىقتاردان قالايدا كەك الۋدى كوزدەپ, تەرروريستەردىڭ تۇگەلدەي كوزدەرىن جويىڭدار دەگەن بۇيرىق بەرەدى. ول تاپسىرما مۇلتىكسىز ورىندالادى. 16 قىركۇيەكتە «قارالى قىركۇيەكتىڭ» ريم قالاسىنداعى رەزيدەنتى ۆاەل ءابۋ تسۆايتەر ءوز ءۇيىنىڭ اۋلاسىندا وققا ۇشادى. 8 جەلتوقساندا پاريجدەگى تاعى ءبىر رەزيدەنت, دوكتور ماحمۇد ءحامشاريدىڭ تەلەفونىنا جارىلىس قوندىرعىسى ورناتىلىپ, ونىڭ ك ۇلى كوككە ۇشادى. قارالى ءتىزىم ءسويتىپ جالعاسا بەرەدى... باس-اياعى جەتى جىل ارالىعىندا ميۋنحەندەگى وقيعا تىكەلەي قاتىسى بار راديكالدى توپتىڭ بارلىق مۇشەسى قازا تاپتى.
