مەملەكەت باسشىسىنىڭ 1 قىركۇيەكتەگى قازاقستان حالقىنا جولداۋىندا ايتىلعان تاپسىرمالاردى ورىنداۋ ءۇشىن 2023 جىلعى 1 قاڭتاردان باستاپ مەملەكەتتىك جاردەماقى جانە مەملەكەتتىك الەۋمەتتىك ساقتاندىرۋ قورىنان (ماسق) ءبىر جارىم جاسقا دەيىنگى بالا كۇتىمى بويىنشا الەۋمەتتىك تولەم تولەۋ مەرزىمدەرى ۇلعايتىلادى. انا مەن بالانى قولداۋدىڭ وسى جانە باسقا دا شارالارى قر الەۋمەتتىك كودەكسىنىڭ جوباسىندا قاراستىرىلادى.
الەۋمەتتىك كودەكس جوباسىندا قولدانىستاعى مەملەكەتتىك جاردەماقىلار مەن الەۋمەتتىك تولەمدەر تولىق ساقتالعانىن اتاپ ءوتۋ قاجەت. سونىمەن قاتار, قۇجاتتا بالالى وتباسىلاردى مەملەكەتتىك دەڭگەيدە الەۋمەتتىك قولداۋدى جاقسارتاتىن كەلەسى نورمالار قاراستىرىلعان:
«بىرىنشىدەن, بالا كۇتىمىنە بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان بالا كۇتىمى بويىنشا مەملەكەتتىك جاردەماقى جانە الەۋمەتتىك تولەم تولەۋ مەرزىمدەرى ءبىر جىلدان ءبىر جارىم جىلعا دەيىن ۇلعايتىلاتىن بولادى», دەلىنگەن ۆەدومستۆو حابارلاماسىندا.
بۇل رەتتە, ماسق-تەن تولەم الۋشى جۇمىسقا ەرتە شىققان جاعدايدا, ونىڭ مولشەرى مەملەكەتتىك جاردەماقى دەڭگەيىندە ساقتالادى.
جۇمىس بەرۋشىلەردىڭ ولاردىڭ قىزمەتكەرلەرى ءۇشىن ماسق-كە الەۋمەتتىك اۋدارىمدار مولشەرلەمەسىنىڭ مولشەرى وزگەرىسسىز قالاتىنىن اتاپ ءوتۋ قاجەت.
«ەكىنشىدەن, بالا تۋىلعانعا دەيىنگى سوڭعى 2 جىلدا الەۋمەتتىك ساقتاندىرۋ جۇيەسىنە 6 ايدان از ۋاقىت قاتىسقان اتا-انالار جۇمىس ىستەمەيتىن ادامدارمەن قاتار رەسپۋبليكالىق بيۋدجەتتەن تولەنەتىن بالا كۇتىمى بويىنشا مەملەكەتتىك جاردەماقى الاتىن بولادى.
ۇشىنشىدەن, الەۋمەتتىك ادىلەتتىلىكتى ورناتۋ ءۇشىن ناگرادتالعان انالارعا بەرىلەتىن جاردەماقىنىڭ مولشەرى سارالانادى. ماسەلەن, «التىن القا» القاسىمەن ناگرادتالعان نەمەسە بۇرىن «باتىر انا» اتاعىن العان, I جانە II دارەجەلى «انا داڭقى» وردەندەرىمەن ناگرادتالعان انالار ءۇشىن جاردەماقى مولشەرى 6,4 اەك-تەن 7,4 اەك-كە دەيىن ۇلعايتىلادى», دەلىنگەن حابارلامادا.
سونداي-اق 6 جانە 7 جانە ودان دا كوپ بالا تۋىپ, تاربيەلەگەن انالار بىردەي جاردەماقى الادى.
