جولداۋدا ايتىلعان جاڭا ەكونوميكالىق ساياساتقا قاتىستى ءاربىر باستاما ەل قولداۋىنا يە بولارى انىق. اۋىل شارۋاشىلىعى, سۋ ماسەلەسى, ۇلت ساۋلىعى, ءبىلىم بەرۋ سالالارى بويىنشا تىڭ دا قاراپايىم حالىققا جاعداي جاساۋ مەيلىنشە ەسكەرىلگەن باستامالاردى جۇزەگە اسىرۋ ماڭىزدى. مىسالى, شاعىن جانە ورتا بيزنەستى قولداۋدىڭ ناقتى جولدارى اتالدى. ايتا كەتەلىك, تۇركىستان وبلىسىندا كاسىپكەرلىكپەن اينالىساتىن ايەلدەر قاتارى ارتىپ كەلەدى. ستاتيستيكاعا سايكەس, شاعىن جانە ورتا كاسىپكەرلىكتىڭ 32%-ىندا ايەلدەر باسشىلىق جاساۋدا. ياعني تۇركىستان وڭىرىندە جۇمىس ىستەيتىن ءاربىر ءۇشىنشى كاسىپكەر – ايەل. «بيزنەستىڭ جول كارتاسى-2025» باعدارلاماسى دا ايەل كاسىپكەرلەرى تاراپىنان بەلسەندى قولدانىلۋدا. باعدارلاما ارقىلى وتكەن جىلى كاسىپكەرلەرگە 25 ملرد تەڭگەگە 6 پايىزبەن 1371 جەڭىلدەتىلگەن نەسيە بەرىلگەن بولسا, قولداۋ العان جوبالاردىڭ تەڭ جارتىسى – نازىك جاندار. وسى جىلدىڭ 6 ايىندا 9,6 ملرد تەڭگەگە 274 جوبا قولداۋ تاپسا, ونىڭ 48%-ى ايەل كاسىپكەرلەردىڭ ۇلەسىندە.
جولداۋدا سوڭعى كەزدە رۇقسات ەتىلگەن ميتينگىلەردە ءجيى كوتەرىلىپ جۇرگەن ايەلدەردىڭ زەينەتكە شىعۋ جاسىنا قاتىستى ناقتى جاۋاپ بەرىلدى. «كەڭىنەن كوتەرىلىپ جۇرگەن الەۋمەتتىك ساۋالدى ەسكەرە وتىرىپ, ايەلدەر ءۇشىن زەينەتكە شىعۋ جاسىنىڭ مەجەسى 2028 جىلعا دەيىن 61 جاس دەڭگەيىندە بەكىتىلەدى», دەدى مەملەكەت باسشىسى. سونىمەن قاتار پرەزيدەنت بىرىڭعاي جيناقتاۋ زەينەتاقى قورىنىڭ ءتيىمدى ينۆەستيتسيالىق ستراتەگياسىن ازىرلەۋدى تاپسىردى. ء«ار وتباسى ەلدىڭ ۇلتتىق بايلىقتارىن پايدالانۋدان ناقتى يگىلىك كورۋى كەرەك. سوندىقتان مەن جاريالاعان بالالار جىلىندا «ۇلتتىق قور – بالالارعا» اتتى تۇبەگەيلى جاڭا باعدارلامانى باستاۋ كەرەك دەپ ەسەپتەيمىن. ۇلتتىق قوردىڭ جىلدىق ينۆەستيتسيالىق كىرىسىنىڭ 50%-ىن بالالاردىڭ جاسى 18-گە تولعانعا دەيىن جەكە شوتتارىنا مەرزىمىنەن بۇرىن شەشىپ الۋ قۇقىعىنسىز اۋدارىپ وتىرۋدى ۇسىنامىن», دەدى مەملەكەت باسشىسى. بۇل قاراجاتتى 18-گە تولعان ازامات باسپانا مەن ءبىلىم الۋعا جۇمسايتىن بولادى. سونداي-اق ەلىمىزدە ەڭ تومەنگى جالاقى دەڭگەيى 60 مىڭنان 70 مىڭ تەڭگەگە دەيىن كوتەرىلەدى. ياعني ەلىمىزدەگى 1,8 ملن ادامنىڭ كىرىسى ارتادى.
ءوز سوزىندە قۋاتتى ۇلتتىڭ دىڭگەگى حالىق ەكەندىگىن ايتقان پرەزيدەنت ەل بىرلىگىنە ەرەكشە ءمان بەردى. ءيا, بۇگىندە قاشاندا ەڭ باستى قۇندىلىق سانالاتىن ەل بىرلىگىنىڭ وزەكتىلىگى ارتا تۇسكەن. دەمەك بىرلىك-ىنتىماعىمىزدى ساقتاپ جانە ونى نىعايتا تۇسە, جولداۋدا ايتىلعان يگى باستامالاردى جۇزەگە اسىرۋدا ايانبايىق.
ينارا نامازباەۆا,
«تۇركىستان وبلىسىنداعى ازاماتتىق اليانسى» بىرلەستىگىنىڭ پرەزيدەنتى,
وبلىستىق ءماسليحات دەپۋتاتى
