32 جاستاعى ۆيتوريا قالاسىنىڭ تۋماسى اۋەسقوي رينگتە دە ەلەۋلى تابىستارعا قول جەتكىزدى. ول 2011 جىلى باكۋدە وتكەن الەم چەمپيوناتىندا قولا مەدال يەلەنسە, 2012 جىلى لوندوندا الاۋى تۇتانعان وليمپيا ويىندارىندا كۇمىسكە قول سوزدى. ەسكيۆا العاشىندا 81 كيلو سالماق دارەجەسىندە سايىسقا تۇسسە, ودان كەيىن 75 كيلوعا اۋىستى. قاپ تاۋىنىڭ بوكتەرىندە برازيليانىڭ بەتكەۇستارى ءبىزدىڭ دانابەك سۋجانوۆتى سان سوقتىرعانى دا ەسىمىزدە. ءبىر قىزىعى, جوعارىدا اتالعان جارىستىڭ ەكەۋىندە دە فالكاو وسىدان بىرەر اي بۇرىن عانا ءبىزدىڭ گەننادي گولوۆكيننەن تاياق جەگەن جاپونيانىڭ جۇلدىزى رەتا مۋراتاعا ەسە جىبەردى.
وڭتۇستىك امەريكانىڭ وعلانى 2014 جىلدان بەرى كاسىپقويلار اراسىندا كۇش سىناسىپ ءجۇر. سول ارالىقتا بىردە-ءبىر رەت جەڭىلگەن ەمەس. 28 قارسىلاسىنىڭ 20-سىن نوكاۋتقا جىبەردى. مىنە, ءدال سول ساڭلاق كۇنى كەشە عانا جانىبەك ءالىمحان ۇلىن جەكپە-جەككە شاقىردى. قازاقتىڭ قايسار ۇلىنىڭ دا جاۋابى كوپ كۇتتىرگەن جوق. ول: «مەنىمەن ايقاسقىڭ كەلسە, اۋەلى چەمپيوندىق بەلبەۋدىڭ ءبىرىن يەلەن. سودان كەيىن عانا سويلەسەمىز. سەنى سىيلايمىن, بىراق ەشقانداي اتاق-داڭقى جوق بوكسشىمەن جۇدىرىقتاسۋ مەنى ەش قىزىقتىرمايدى. ءدال قازىر ماعان كەرەگى – چارلو مەن «كانەلو», دەپ باتىل مالىمدەمە جاسادى.
جۋىق ارادا مەكسيكالىق ساۋل الۆارەستىڭ جانىبەكپەن جەكپە-جەككە شىعا قويۋى ەكىتالاي. ويتكەنى بۇل كۇندەرى «كانەلو» 17 قىركۇيەكتە لاس-ۆەگاستا قازاقستاننىڭ ەڭ بەلدى بوكسشىسى گەننادي گولوۆكينمەن بولاتىن ايقاسقا قىزۋ دايارلانۋدا. سول كەزدەسۋدەن كەيىن ونىڭ ءبىراز ۋاقىت بويى تىنىعاتىنى انىق. ال بۇل كۇندەرى WBC نۇسقاسى بويىنشا چەمپيوندىق بەلبەۋدى يەلەنىپ وتىرعان دجەرمالل چارلو كەلىسۋى ابدەن مۇمكىن. ال ول جايىندا ءبىز نە بىلەمىز؟
دجەرمالل 32 جاستا. ول 1990 جىلدىڭ 19 مامىرىندا اقش-تىڭ تەحاس شتاتىنا قاراستى ريچموند قالاسىندا دۇنيەگە كەلدى. 18 جاسىندا كاسىپقوي بوكسقا اۋىسقان دارىندى جىگىت 2008 جىلدىڭ كۇزىندە ءوزىنىڭ العاشقى جەكپە-جەگىن وتكىزدى. سول كەزدەن بەرى 32 مارتە شارشى الاڭعا كوتەرىلىپ, بارلىق باسەكەدە جەڭىسكە جەتتى. 22 قارسىلاسىن نوكاۋتقا جىبەردى. چارلودان تاياق جەگەندەر اراسىندا ۋگو سەنتەنو, انتۋان سميت, لەنني بوتتاي, كورنەليۋس باندرەيدج, وستين تراۋت, دجۋليان ۋيليامس, ماتۆەي كوروبوۆ, دەننيس حوگان, سەرگەي دەرەۆيانچەنكو جانە تاعى باسقا تانىمال بىلعارى قولعاپ شەبەرلەرى بار. سوڭعى رەت چارلو ۇستىمىزدەگى جىلدىڭ 18 ماۋسىمىندا پولشالىق ماتسەي سۋلەيتسكيدى سان سوقتىردى. كەزىندە ول ءبىرىنشى ورتا سالماقتا IBF نۇسقاسىنىڭ تەڭدەسسىزى دەپ تە تانىلعان ەدى.
دجەرماللدىڭ ەگىزى دجەرمەلل چارلونىڭ دا مىقتى بوكسشى ەكەنىن جانكۇيەر جاقسى بىلەدى. 15 جاسىندا جاسوسپىرىمدەردىڭ دۇنيەجۇزىلىك وليمپياداسىندا قولا مەدال يەلەنگەن ول 2007 جىلدىڭ اياعىندا كاسىپقوي رينگتەگى تۇساۋكەسەر كەزدەسۋىن وتكىزدى. سول 15 جىل ارالىعىندا 37 رەت شارشى الاڭعا كوتەرىلىپ, 35 رەت جەڭىس تويىن تويلادى. 19 قارسىلاسىن ەسىنەن تاندىردى. Iron Man («تەمىر ادام») دەگەن جاناما ەسىمدى يەلەنگەن دجەرمەلل تەك ءبىر رەت قانا جەڭىلىستىڭ كەرمەك ءدامىن تاتتى. 2018 جىلدىڭ جەلتوقسان ايىندا ءوزىنىڭ وتانداسى توني حارريسونعا ۇپاي سانىمەن ەسە جىبەرسە, بىلتىر جازدا ارگەنتينالىق برايان كاستانومەن تەڭ ءتۇستى. قازىرگى كەزدە اقش بوكسشىسى ءبىرىنشى ورتا سالماقتا ءابسوليۋتتى الەم چەمپيونى اتانىپ وتىر. ەگەر دە دجەرمەللدىڭ سالماعى ءسال اۋىرلاسا, كەلەشەكتە ول ءالىمحان ۇلىنا قارسىلاس اتانۋى دا ابدەن مۇمكىن.
قازىرگى كەزدە «جانىبەك ءالىمحان ۇلى ءوز اتاعىن قاي كەزدە قورعايدى؟» دەگەن ساۋال كوپشىلىكتى قىزىقتىرۋدا. ول جاعىن ءدال بۇگىن ەشكىم ءدوپ باسىپ ايتا المايدى. دەسەك تە كەيبىر دەرەك كوزدەرىنە سۇيەنسەك, قانداسىمىز قاراشا ايىندا چەمپيوندىق بەلبەۋىن قورعاۋ ءۇشىن جەكپە-جەككە شىعۋى بەك مۇمكىن. ونىڭ قارسىلاستارى رەتىندە جوعارىدا ءبىز ءسوز ەتكەن ەسكيۆا فالكاودان بولەك, مەكسيكالىق حايمە مۋنگيا مەن ۇلىبريتانيالىق كريس يۋبەنكتىڭ دە ەسىمدەرى اتالۋدا. بۇل بوكسشىلاردىڭ ۇشەۋى دە الەمدىك رەيتينگتە العاشقى ۇشتىكتىڭ قاتارىندا. ماسەلەن, كەلەسى ايدا 26 جاسقا تولعالى وتىرعان مۋنگيا وسى كۇنگە دەيىن ادام بالاسىنان جەڭىلگەن ەمەس. ول 40 باسەكەنىڭ 32-ءسىن مەرزىمىنەن بۇرىن اياقتادى. 33 جاستاعى يۋبەنك 34 كەزدەسۋدىڭ تەك ەكەۋىندە عانا ۇتىلدى. 23 ايقاستا ايقىن باسىمدىق تانىتتى. وسىلاردىڭ قايسىسىمەن جولىقسا دا, قازاقتىڭ ۇلى نامىستى قولدان بەرمەيتىنى انىق. سول سەبەپتى دە ءبىز الداعى ۋاقىتتا جانىبەكتىڭ جارقىن جەڭىستەرىنە تالاي مارتە كۋا بولامىز-اۋ دەپ ۇمىتتەنەمىز.
