بىراق ونى بىردەن جۇزەگە اسىرۋ مۇمكىن بولمادى, ءتۇرلى بيۋروكراتيالىق كەدەرگىلەرگە ۇشىرادىم. مەن دە الدىما قويعان ماقساتىما قول جەتكىزۋ ءۇشىن كەرى قايىرىلمادىم, ىلگەرى ۇمتىلا بەردىم. مۇنداي تاباندىلىعىم كەلەسى جىلى ءوز جەمىسىن بەردى.
ءسويتىپ, 2021 جىلى ءبىزدىڭ ورتالىعىمىز ءوز ەسىگىن ايقارا اشتى. بۇعان سول جىلى قۇرىلعان «التىن ۇيا – ەركەلە» قايىرىمدىلىق قورى كوپ سەپتىگىن تيگىزدى. اتالعان قور ءبىرىنشى كەزەكتە بەلگىلى سەبەپتەرمەن وزدەرىنىڭ قۇقىقتارىن قورعاۋعا قابىلەتسىز, ياعني اۋتيزممەن اۋىراتىن بالالاردىڭ مۇددەسىن قورعايدى.
ورتالىعىمىزدا كوررەكتسيالىق كابينەت, بالالار يوگاسىمەن اينالىسۋعا ارنالعان بولمە, قۇم تەراپياسى, تۇز شاحتاسى, لوگوپەد-دەفەكتولوگتىڭ كابينەتى, لوگوپەدتىك ماسساج كابينەتى بار. قازىردىڭ وزىندە ورتالىعىمىزدا ءاۋتيزمى بار 200-دەي بالا تىركەلگەن. ال ورتالىق ماماندارىنىڭ باستى ماقساتى – بالالاردىڭ ءومىرىن قوعامعا بەيىمدەۋ, وزدەرىن تولىققاندى قوعام مۇشەسى رەتىندە سەزىندىرۋ. بۇل جەردە, ارينە, ماماندار مەن اتا-انالار اراسىندا ءوزارا سەنىمگە نەگىزدەلگەن قارىم-قاتىناس ورناتۋدىڭ ماڭىزى اسا زور. بۇل باعىتتاعى جۇمىستارىمىز دا جەمىسسىز ەمەس.
ءسوز رەتىندە ءبىزدىڭ ورتالىعىمىز پسيحيكالىق-فيزيكالىق دامۋىندا اۋىتقۋشىلىقتارى بار 6 مەن 18 جاس ارالىعىنداعى بالالاردى قابىلدايتىنىن ايتا كەتكەندى ءجون كورىپ وتىرمىن. بايقاساڭىزدار, ءبارى دەرلىك مەكتەپ جاسىنداعى بالالار. دەمەك, بىزدە بالالاردىڭ ءتيىستى دەڭگەيدە ءبىلىم الۋلارىنا دا بارلىق جاعداي جاسالعان. پەداگوگتەر دە تاربيەلەنۋشىلەر ءۇشىن پسيحولوگيالىق تۇرعىدان جايلى احۋال قالىپتاستىرۋعا بارلىق قابىلەت-قارىمىن جۇمساپ كەلەدى.
قورىتا ايتقاندا, ءبىزدىڭ وسىنداي ورتالىق قۇرۋداعى ماقساتىمىز – ءاۋتيزمى بار ەرەكشە بالالاردىڭ ومىردەگى اۋىرتپالىقتارىن, قارلىعاشتىڭ قاناتىمەن سۋ سەپكەندەي, ءسال دە بولسا جەڭىلدەتۋگە ۇلەس قوسۋ.
اينۇر سولوتوۆا,
كوپبالالى انا
نۇر-سۇلتان
