مەملەكەت باسشىسىنىڭ جولداۋىن ۇكىمەتتىك ەمەس ۇيىمنىڭ ۇجىمى بىرگە وتىرىپ تاماشالادىق. شىنىن ايتۋ كەرەك, بۇل جولعى جولداۋدىڭ ءمانى ەرەكشە بولدى. كۇتپەگەن جاڭالىقتارعا, سەنساتسياعا تولى بولدى دەسەك قاتەلەسپەيمىز.
پرەزيدەنت حالىقتىڭ كوكەيىندە جۇرگەن ماسەلەلەردى ءدوپ باسىپ ايتىپ, ەلدىڭ كوڭىلىنەن شىعاتىن رەفورمالار مەن جوسپارلاردى دا ورتاعا سالدى. جاسىراتىنى جوق, سوڭعى كەزدە ەلدە الەۋمەتتىك ماسەلە ءجيى كوتەرىلە باستادى. قىمباتشىلىق ءبىر جاعىنان قىسسا, كەيبىر تاۋار تاپشىلىعى حالىقتىڭ ەڭسەسىن باستى. وسى ورايدا پرەزيدەنت ساپالى, باتىل ءارى جىلدام ارەكەت جاسايتىن مەملەكەتتىك باسقارۋ جۇيەسىن قالىپتاستىرۋ كەرەكتىگىن كۇن تارتىبىنە شىعاردى.
ەڭ باستىسى باسقارۋ جۇيەسىندەگى رەفورمانى پرەزيدەنت الدىمەن وزىنەن باستاعانى جاڭا قازاقستانعا دەگەن سەنىمدى كۇشەيتە ءتۇستى. اسىرەسە مەملەكەت باسشىسىنىڭ پرەزيدەنت وكىلەتتىلىگىن قىسقارتۋ جانە ءبىر رەتتىك مەرزىمگە سايلانۋ تۋرالى ۇسىنىسى كوڭىلدەن شىقتى. بۇيىرتسا, كەلەسى جىلى حالىق قالاۋلىلارى قايتا سايلانىپ, ۇكىمەت قايتا جاساقتالسا, جاڭارعان قۇرامدا جاڭا قازاقستاندى قۇرۋ جولىندا ۇلكەن ەڭبەك باستالماق. سونىمەن بىرگە پرەزيدەنتتىك سايلاۋدى ءوز مەرزىمىن كۇتپەي الدىن الا وتكىزۋ وتە دۇرىس شەشىم دەپ ويلايمىن. ويتكەنى الدا تۇرعان رەفورمالاردى جۇزەگە اسىرۋدا ساياسي جاعدايلار كوڭىلدى وزىنە اۋدارماۋ كەرەك. ەكىنشىدەن ساياسي ناۋقاندارمەن ءجۇرىپ, ۋاقىتتى وتكىزىپ الماۋ دا ماڭىزدى.
پرەزيدەنتتىڭ بارلىعىمىزدى ەرەكشە تولقىتقان ءسوزى ارينە, ۇلتتىق قوردىڭ ينۆەستيتسيالىق تابىسىنىڭ 50 پايىزىن 18 جاسقا تولماعان ءاربىر قازاقستاندىق بالانىڭ جەكە شوتىنا اۋدارۋى جايىندا بولدى. دۇرىس قوي, بالا ءبىزدىڭ بولاشاعىمىز. ەلدىڭ ەرتەڭگى ەگەسى دە سولار. سوندىقتان ءبىرىنشى كەزەكتە سولاردىڭ دۇرىس تاربيەلەنىپ, قالىپتاسۋىنا, ەشكىمنەن كەم بولماي وسۋىنە جاعداي جاسالۋى كەرەك. وسى تۇرعىدان العاندا پرەزيدەنتتىڭ مۇنداي شەشىمى ءوز ۋاقىتىندا جانە وتە ءادىل بولدى دەپ ەسەپتەيمىن.
جالپى بيىلعى جولداۋدا قازاقستاننىڭ جاڭا ساياسي-ەكونوميكالىق, الەۋمەتتىك جانە قۇقىقتىق سالاداعى دامۋى تاريحىمىزدىڭ تاعى ءبىر كەزەڭىنىڭ باستالعانىن اڭعارتتى. مۇنى دەموكراتيالىق جولعا جاسالعان باتىل قادام دەپ تۇسىنگەنىمىز ابزال.
ءوز كەزەگىندە جۋىردا ازاماتتىق اليانس ۇكىمەتتىك ەمەس ۇيىمى جولداۋعا بايلانىستى ۇندەۋ قابىلداپ, وسى بويىنشا رەسپۋبليكانىڭ بارلىق ازاماتتىق قوعام ۇيىمدارىمەن بىرلەسكەن كونفەرەنتسيا وتكىزۋدى ۇيعارىپ وتىرمىز.
جۇماعالي بىلىسبەكوۆ,
شىمكەنت قالاسى ازاماتتىق اليانسىنىڭ توراعاسى
شىمكەنت قالاسى
