شىعىس قازاقستان وبلىسىنىڭ اۋماعى گيدروگرافيالىق قاتىناستا ەرتىس باسسەينى جانە ءىشىنارا بالقاش-الاكول ويىسىنداعى كولدەر باسسەينى بار.
نەگىزگىسى, ەرتىس وزەنى. ول زايسان كولىمەن بىرگە ەرەكشە مەملەكەتتىك ماڭىزى بار سۋ وبەكتىلەرى بولىپ تابىلادى. ەرتىس اعىنىنىڭ ءبىر بولىگى قىتايدان جىلىستاپ, قازاقستاندى كەسىپ ءوتىپ, رەسەي اۋماعىنا تۇسەدى. ياعني, ترانسشەكارالىق وزەن.
سونىمەن قاتار, ەرتىس وزەنىنىڭ سۋ رەسۋرستارىن پايدالانۋ ءۇشىن سۋ وزەن القابىندا بۇقتىرما, وسكەمەن جانە ءشۇلبى گيدروەلەكتر ستانسالارى جۇمىس ىستەيدى. ءبىزدىڭ مىندەت, وسى كاسىپورىنداردى جۇمىسشى كۇشىمەن قامتاماسىز ەتۋ.
ءبىز وسى ۋاقىتقا دەيىن سۋ سالاسىنا قاتىستى حالىقارالىق, رەسپۋبليكالىق بىرنەشە دوڭگەلەك ۇستەلدەر وتكىزىپ, قازاقستاندا سۋمەن جابدىقتاۋ جانە سۋ بۇرۋ ماماندارىنىڭ بىلىكتىلىگىن ارتتىرۋ جۇيەسى ءتيىستى دەڭگەيدە ەمەس ەكەندىگىنە كوز جەتكىزگەن ەدىك. بۇل پىكىردى بۇگىن پرەزيدەنت تە راستاپ وتىر. سۋمەن قامتۋ سالاسى ماماندارىن دايىنداۋ ءۇشىن جوسپارلى تۇردە جۇمىس ىستەۋىمىز كەرەك.
الداعى ۋاقىتتا وقۋ ورنىمىزدا سۋ شارۋاشىلىعى جانە سۋ پايدالانۋ سالاسىنداعى قۇزىرەتتەر جانە تەحنولوگيالار ترانسفەرى ورتالىعىنىڭ بازاسىندا ءبىلىم بەرۋ الاڭىن قۇرۋ تۋرالى شەشىمدەر قابىلدانادى. پرەزيدەنت اتاپ وتكەندەي, «سۋ رەسۋرستارى جانە سۋدى پايدالانۋ» ماماندارىن دايىنداۋدى نازارعا الىپ, باكالاۆرلاردى جانە «سۋمەن جابدىقتاۋ جانە كارىز» ماماندىعى بويىنشا ماگيسترانتتاردى دايىنداۋ ءۇشىن كۇش سالاتىن بولامىز. ارينە, بۇعان دەيىن دە اتالعان سالا ماماندارى وقىتىلىپ كەلگەن ەدى.
ماسەلەن, ۋنيۆەرسيتەتىمىز «اعارتۋ» عىلىمي-ءبىلىم بەرۋ كونسورتسيۋمى ماماندارىمەن بىرلەسىپ, مامانداردى وقىتىپ قانا قويمايمىز, قايتا دايىنداۋدان وتكىزەمىز, ەلدەگى يننوۆاتسيالىق دامۋعا, تسيفرلاندىرۋ جۇيەسىنە قاراي بىلىمدەرىن جەتىلدىرەمىز, شىڭدايمىز.
ايتا كەتەرلىگى, بىزدە سۋ سالاسى ماماندارىن دايىنداۋ ءۇشىن وقىتۋ بازاسى تولىق جەتكىلىكتى. ارنايى ورتالىقتىڭ قۇرامىنا 5 زەرتحانا كىرەدى: «گيدراۆليكا», «سۋ رەسۋرستارىن بىرىكتىرىلگەن باسقارۋ», «سورعىلار, جەلىلەر جانە سۋ دايىنداۋ», «گيدروحيميا», «جىلىتۋ جانە جەلدەتۋ». پروفەسسورلىق-وقىتۋشىلىق قۇرام دا جۇيەلى تۇردە جۇمىس ىستەپ كەلەدى.
الايدا, پرەزيدەنت ايتقانداي, رەسپۋبليكادا مامانداردىڭ جەتكىلىكسىزدىگى انىق بايقالادى. ءبىز ءوز تاراپىمىزدان ءبىلىمدى كادرلاردى دايىنداۋ ءۇشىن جوعارى قارقىنمەن جۇمىس ىستەيتىن بولامىز.
ساۋلە راحمەتۋللينا,
د. سەرىكباەۆ اتىنداعى شقتۋ باسقارما توراعاسى-رەكتور
