كوكتەم مەن جازدا كوك وسكىننىڭ كوكتەۋىنە وتە قاجەتتى ىلعال دا جاقسى ءتۇستى. مامانداردىڭ ەسەپتەۋىنە قاراعاندا, ءدان تامىرلانىپ, القاپتاعى قارابۇيرا توپىراقتان كوكتەپ شىعۋ ءۇشىن اسا قاجەتتى ىلعال كولەمى جەتكىلىكتى بولعان. ماسەلەن, مامىر-شىلدە ايلارىندا ءار اۋداندا ءارتۇرلى بولعانىمەن, ورتا ەسەپپەن 11,6 ميلليمەتردەن 68,2 ميلليمەترگە دەيىن ىلعال تۇسكەن. بۇل كولەم قالىپتى دەڭگەيدەن 33,3 جانە 57,4 ميلليمەترگە كوپ. قازاقتىڭ جالپاق تىلىمەن ايتقاندا, كوكتەن ءيىپ كوكتەدى دەگەن وسى. وراق جاڭا باستالعاندىقتان قاپقا ءتۇسىپ, قىرمانعا ۇيىلگەندى عانا ەسەپكە الاتىن ديقاندار بيىل استىقتىڭ از بولمايتىنىن ايتىپ وتىر.
– بارلىق ەگىننىڭ 75 پايىزى نەمەسە 3,4 ملن گەكتار استىقتى القاپتاعى ءونىم كولەمى وتە جاقسى, – دەيدى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ەركەش الەنوۆ, – ءبىر جارىم گەكتار القاپتىڭ شىعىمدىلىعى قاناعاتتانارلىق. وتكەن جىلى گەكتار بەرەكەسى 9,1 تسەنتنەردەن اينالسا, بيىل 10-11 تسەنتنەرگە جەتىپ قالۋى ابدەن ىقتيمال. 4,6 ملن توننا استىق جينايمىز دەپ مەجەلەپ وتىرمىز.
جەردە وسكەندى جەردە قالدىرماي جيناپ الۋعا مۇمكىندىك بار. بيىلعى ەگىن وراعىنا 8,7 مىڭ استىق جينايتىن كومباين قاتىسپاق. ونىڭ 4,4 مىڭى – جوعارى ءونىمدى, جاڭا كومباين. باسقارما باسشىسىنىڭ ورىنباسارى مەملەكەتتىڭ قولداۋىمەن وبلىستاعى اۋىل شارۋاشىلىعى قۇرىلىمدارى ماشينا-تراكتور پاركىن جىل سايىن جاڭارتىپ كەلە جاتقانىن ايتىپ ءوتتى. بيىلعى جەتى ايدا ديقاندار جالپى قۇنى 35 ملرد تەڭگە بولاتىن 1 025 اۋىل شارۋاشىلىعى تەحنيكاسىن ساتىپ العان. ورىلعان ەگىندى تاسىمالداۋعا 4,8 مىڭ جۇك كولىگى جۇمىلدىرىلماق.
ەندىگى ماسەلە – زور ەڭبەكپەن جينالعان ءداندى ساقتاۋ. مامانداردىڭ ايتۋىنا قاراعاندا, جازدىڭ سوڭىندا جاۋىن ءجيى جاۋعاندىقتان ءدان ىلعالدى, دەمەك, نەگىزگى كۇش ەلەۆاتورلارعا تۇسپەك. بيىل وبلىستا ليتسەنزيالانعان 70 استىق قابىلداۋ كاسىپورىنى جۇمىس ىستەيدى. ولاردىڭ قامباسىنا 4,7 ملن توننا استىق سىيادى. وزگە دە ءىرى اۋىل شارۋاشىلىعى قۇرىلىمدارىنىڭ 2 ملن توننالىق قويمالارى بار.
كۇزگى وراققا قاجەتتى 83 مىڭ توننا جانار-جاعار ماي تاسىمالدانىپ, بىتۋگە تاياۋ. كەپىلدەندىرىلگەن ديزەل وتىنىنىڭ قۇنى وسكەن جوق. اۋىل شارۋاشىلىعى ەڭبەككەرلەرى ەگىن وراعىمەن قاتار, مال ازىعىن اياقتاۋ باعىتىندا دا قاۋىرت قيمىلداپ جاتىر. بيىل وڭىردە 640 مىڭ باس مال قىستاتىلادى. وسىعان وراي 1 ملن 260 مىڭ توننا ءشوپ, 260 مىڭ توننا پىشەندەمە, 190 مىڭ سۇرلەم دايىندالدى. ەگىن وراعىنان كەيىن 750 مىڭ توننا سابان دايىنداۋ جوسپارلانۋدا. بۇل جۇمىسقا مال ازىعىن دايىندايتىن 1,5 مىڭ بريگادا جۇمىلدىرىلعان. قازىر شابىندىقتاردا 2 500 تراكتور, 1 100 شالعى, 2 مىڭعا تاياۋ باسقا دا اۋىل شارۋاشىلىعى تەحنيكالارى پايدالانىلۋدا. بۇگىنگە دەيىن قاجەتتى ءشوپتىڭ 95 پايىزى جينالىپ, قىستاقتارعا تاسىمالدانىپ الىندى. سونداي-اق 234 مىڭ توننا پىشەندەمە, 95 مىڭ توننا سۇرلەم دايىندالدى.
وتكەن جىلعى قۋاڭشىلىقتان ساباق العان مالساق قاۋىم قىتىمىر قىسقا قاپىسىز قامدانۋدا.
اقمولا وبلىسى
