قوعام • 31 تامىز، 2022

تەمىر جول وتكەلدەرىندە تەككە ءوتىپ جاتقان ەسىل ۋاقىت

227 رەت كورسەتىلدى

استانانىڭ ۇلكەن اينالما جولى پايدالانۋعا بەرىلگەلى جولاۋشىلاردىڭ ۋاقىتى، كولىك جۇرگىزۋشىلەرىنىڭ جانار-جاعارمايعا جۇمسالاتىن شىعىنى ەداۋىر ۇنەمدەلىپ، ءبارى دە ريزا بولىپ ءجۇرۋشى ەدى. الايدا بيىل بۋراباي كۋرورتىنا دەمالۋعا باراتىن، سونداي-اق كوكشەتاۋ مەن قىزىلجار وڭىرلەرىنە ساپارلايتىن جانە سول جاقتاردان ەلورداعا سان شارۋا­مەن كەلەتىن ازاماتتاردىڭ بۇرىنعىشا ماشاقات شەگۋلەرىنە تۋرا كەلىپ تۇر.

«قازاۆتوجول» ۇلتتىق كومپانياسى» اق بيىلعى ناۋرىزدىڭ ورتاسىندا: «رەسپۋبليكالىق ماڭىزى بار ر-10 نۇر-سۇلتان قالاسىنىڭ سولتۇستىك-باتىس اينالما جولىنىڭ 4 شاقىرىمىندا ورىن العان اپاتتى جاعدايعا بايلانىستى اتالعان جولدىڭ 1،4-شاقىرىمىنان باستاپ    6-شاقىرىمىنا دەيىنگى تەلىمى بيىلعى جىلدىڭ 25 ناۋرىزىنان 15 تامىزىنا دەيىن كۇردەلى جوندەۋ جۇمىستارىن جۇرگىزۋ ءۇشىن جابىلماق. وسى ورايدا نۇر-سۇلتان قالاسىنىڭ جانە اقمولا وبلىسىنىڭ تۇرعىندارى مەن قوناقتارىنا، سونداي-اق بارلىق ترانزيتتىك جۇرگىزۋشىلەرگە بالاما جول بارىن ەسكەرتەمىز. جەڭىل كولىك يەلەرى قالا ىشىمەن، لەسوزاۆود ەلدى مەكەنى ارقىلى جۇرە الاتىنىن، ال جۇك كولىك يەلەرى ءۇشىن شىعىس اينالما جولىنىڭ بار ەكەنىن ەسكە سالامىز»، دەگەن حابارلاما تاراتقان بولاتىن. ارينە، بۇل اقپارات كولىك جۇرگىزۋشىلەرىنىڭ ءبارىنىڭ قاپەرىنە جەتە قويماعانى انىق. سوندىقتان ولاردىڭ كوبى ساپارعا شىققاندا بۇرىنعىشا استانانىڭ سولتۇستىك-باتىس اينالما جولىنىڭ 1،4 شاقىرىمىنا دەيىن بارادى. سول ارادا الدارىنان شىققان «قازاۆتوجول»  قىزمەتكەرلەرى ءارى قاراي وتكىزبەي، لەسوزاۆود ارقىلى ءجۇرۋ كەرەكتىگىن ايتادى. استانالىقتار مەن ەلوردا مەيماندارىنىڭ كەمىندە ءبىر ساعات ۋاقىتىن الاتىن سەرگەلدەڭ وسىلاي باس­تالادى. بىرىنشىدەن، لەسوزاۆودقا قالاي بارۋ كەرەكتىگىن نۇسقايتىن ەشقانداي جول سىلتەگىش ورناتىلماعان. سونىڭ سالدارىنان جۇرگىزۋشىلەر قالاعا قايتا كىرگەندە پەتروپاۆل باعىتىنا شىعار جولدى اركىمنەن ءبىر سۇراپ اۋرەگە تۇسەدى. ەكىنشىدەن، اۆتوكولىكتەر استانانىڭ شەت جاعىنداعى ءۇش  تەمىر جول وتكەلىنەن وتەدى. جولاۋشى جانە جۇك پويىزدارى ەرسىلى-قارسىلى اعىلىپ جاتقاندىقتان، اتالعان تەمىر جول  وتكەلدەرىندە ۇنەمى اۆتوكولىك كەپتەلىسى پايدا بولادى. ۇزىن-سونار كەزەكتە تۇرعان اسىعىس جۇرگىزۋشىلەردىڭ قايسىبىرى جول ءجۇرۋ ەرەجەسىن بۇزىپ، كولىكتەردىڭ سوقتىعىسۋ وقيعالارى دا ۇشىراسىپ جاتادى. ال اينالما جولدى قالپىنا كەلتىرۋ جۇمىستارى ۇزاققا سوزىلىپ بارادى. اۋەلدە 25 تامىزعا دەيىن اياقتالۋعا ءتيىس كۇردەلى جوندەۋ ءالى بىتەر ەمەس. «قازاۆتوجول» اق-نىڭ حابارلاۋىنشا، بۇل جۇمىستى ءتامامداۋ ەندى قىركۇيەك ايىنىڭ سوڭىنا بەلگىلەنىپ وتىر. بۇل نە قىلعان جايباسارلىق؟!

جالپى، تەمىر جول بويىنداعى جەر ءۇستى وتكەلدەرىندە قالىپتاسقان كەلەڭسىز جاعداي – كوپتەن بەرى كوتەرىلىپ كەلە جاتقان كوكەيكەستى ماسەلە. ءىىم كولىكتەگى پوليتسيا دەپارتامەنتىنىڭ مالىمەتىنە قاراعاندا، ەلىمىزدە بيىلعى جىل باسىنان بەرى تەمىر جولدان ءوتۋ كەزىندە 39 ادام اپاتقا ۇشىراپ قازا تاپقان. جاقىندا  قوستاناي وبلىسىندا تەمىر جول وتكەلىنەن تەزدەتىپ ءوتىپ كەتپەكشى بولعان «جيگۋلي» اۆتوكولىگى جىلدام كەلىپ قالعان جۇك پويىزىنىڭ استىنا ءتۇسىپ، ەكى ادام جان تاپسىرىپتى.  

بۇدان بىرەر جىل بۇرىن قىزىلوردا وبلىسى ارال قالاسىنىڭ تۇرعىندارىمەن كەزدەسكەنىمىزدە ولار وسى شاھاردى ەكىگە جارىپ وتەتىن تەمىر جول وتكەلى ماسەلەسىن جاندارى قينالا ايتقان ەدى. سول وتكەلدىڭ جابىق شلاگباۋمى الدىندا كەزەك كۇتىپ تۇراتىن كولىكتەر كەرۋەنىنىڭ ۇزىندىعى 3 شاقىرىمعا دەيىن سوزىلادى ەكەن. سەبەبى بۇل تەمىر جول وتكەلى پويىزداردىڭ ءجيى قاتىناۋىنا بايلانىستى تاۋلىگىنە 40 رەتكە دەيىن جابىلاتىن بولىپ شىقتى. ءتىپتى «جەدەل جاردەم» كولىكتەرى دە كەپتەلىستە امالسىز بوگەلىپ،
اۋرۋدان جاندارى قىسىلىپ جاتقان ناۋقاستارعا دەر كەزىندە جەتە المايدى ەكەن. ارالدىقتار وسىنداي تۇيىقتان شىعار جول – تەمىر جول وتكەلىنىڭ ورنىنا كوپىر سالۋ ەكەنىن ايتىپ كەلە جاتقانىنا ون شاقتى جىل بولعانىمەن، ماسەلە قارجى تاپشىلىعىنا بايلانىستى شەشىمىن تاپپاعان. بىلۋىمىزشە، بيىل عانا سەڭ ورنىنان قوزعالعان سىڭايلى.

اتا زاڭىمىز بويىنشا قازاقستان رەسپۋبليكاسىنىڭ ەڭ قىمبات قازىناسى – ادام جانە ادام ءومىرى. ۇكىمەت تەمىر جول وتكەلدەرىندەگى جاعدايعا مۇقيات نازار اۋدارىپ، قازاقستاندىقتاردىڭ ەسىل ۋاقىتىن تەككە وتكىزبەۋ جانە قاۋىپسىزدىگىن كۇشەيتۋ امالدارىن قاراستىرسا، قۇبا-قۇپ.

سوڭعى جاڭالىقتار

ايتىپ كەلگەن اپات

ايماقتار • كەشە

«مىڭ بالا» جەڭىمپازدارى

رۋحانيات • كەشە

اقيقاتتىڭ اي ديدارى – ءباسپاسوز

ەگەمەن قازاقستان • كەشە

ىنتىماقتاستىق ىقپالى

ەكونوميكا • كەشە

جاڭا فورماتتاعى ساۋدا

ەكونوميكا • كەشە

جوتەلگە جەڭىل قاراماڭىز

مەديتسينا • كەشە

بىتىمگەرشىلىك ساردارلارى

قازاقستان • كەشە

جىپ-جىلى جۇرەك بۋىنداي

ادەبيەت • كەشە

داۋىستىڭ دا ءتۇسى بار

ادەبيەت • كەشە

ۇقساس جاڭالىقتار