مايدانگەرلەر مەن ساربازدارعا قۇرمەت

وتان قورعاۋشى كۇنى مەن 9 مامىر مەرەكەسىن قاراعاندىلىقتار زور سالتانات جانە كوڭىل-كۇيى ورلەۋى ۇستىندە اتاپ ءوتتى. وبلىس اكىمى باۋىرجان ابدىشەۆ وسى كوكتەمدە اسكەر قاتارىنا شاقىرىلۋشىلاردى شىعارىپ سالۋعا قاتىسۋمەن بىرگە, سوعىس ارداگەرلەرىنىڭ ءبىر توبىن قابىلداپ, بارشا ادامزاتقا قاستەرلى كۇنمەن قۇتتىقتادى. ارقايسىسىنا 80 مىڭ تەڭگەدەن تارتۋ جاسالسا, سونداي-اق, اۋعانستانداعى ايقاستاردا ەرلىگىمەن ەرەكشە كوزگە تۇسكەن جاۋىنگەرلىك قىزىل تۋ وردەنىنىڭ يەگەرى, ءى توپتاعى مۇگەدەك مەيرام قادىرباەۆقا جەڭىل كولىك تارتۋ ەتىلدى. قالالار مەن اۋداندار تۇرعىندارى ورتالىق الاڭداردا, ساياباقتاردا مايدانگەرلەرمەن بىرگە باس قوسىپ, ولارعا ونەردەن شاشۋ شاشتى. استانادا وتكەن اسكەري پاراد قالا كوشەلەرىندە ورناتىلعان تەلەديدارلار ارقىلى تىكەلەي كورسەتىلدى. ەكىنشى دۇنيەجۇزىلىك سوعىسقا وڭىردەن 60 مىڭعا جۋىق ازامات قاتىسىپ, 6587-ءى جاۋىنگەرلىك وردەن جانە مەدالدارمەن ماراپاتتالدى. سونىڭ ىشىندە 33-ءى كەڭەس وداعىنىڭ باتىرى اتاعىن السا, جەتى ادام «داڭق» وردەنىنىڭ تولىق يەگەرى بولدى. بۇل جىلداردا قاراعاندى مەن جەزدى, بالقاش پەن تەمىرتاۋ قورعانىس ونەركاسىبىن كومىر, مارگانەتس, مىس, بولاتپەن ۇزدىكسىز قامتاماسىز ەتىپ وتىردى. مايدانعا اتتانعان اكەلەرى مەن ەرلەرىنىڭ ورنىندا شاحتالاردا 12 مىڭ ايەل ەڭبەك ەتتى. 3 بيس شاحتاسىنىڭ شاحتەرلەرى جاكەن مۇقانوۆا, كۇلاش قۇلجانوۆالاردىڭ ەرەن ەڭبەكتەرى 1941 جىلى جەلتوقساندا سوۆينفورمبيۋرو ارقىلى حابارلاندى. بۇگىندە جاسى 90-نان اسىپ, 100-گە جاقىنداعان تالعاتبەك ابدرازاقوۆ, سەمەن كراسنوگۋتسكي اقساقالداردىڭ ۇيلەرىنە بارىپ, ارنايى قۇتتىقتالدى. بىرقاتار مەكەمەلەر مەن ۇيىمدار سو­عىس جانە تىل ارداگەرلەرىن كونتسەرت­­­تىك كەزدەسۋلەرگە شاقىرىپ, مايداننىڭ سۇيىكتى اندەرىن ەستەرىنە تۇسىرە شىر­قادى. مەرەكەلىك ءسان-سالتانات كەشكىسىن كوك ءجۇزىن سان الۋان بوياۋلارعا بولەگەن وتشاشۋلارمەن جارقىرادى. ايقىن نەسىپباي, «ەگەمەن قازاقستان». قاراعاندى.