وبلىس اكىمىنىڭ ايتۋىنشا, 7 ايدىڭ قورىتىندىسى بويىنشا ايماقتىڭ نەگىزگى ماكروەكونوميكالىق كورسەتكىشتەرىندە وڭ ديناميكا بايقالدى. اتاپ ايتقاندا, بىلتىرمەن سالىستىرعاندا تارتىلعان ينۆەستيتسيالار كولەمى 111,5 پايىزعا, وندەۋ ونەركاسىبىنىڭ كولەمى 105,5 پايىزعا وسكەن.
نۇرلىبەك نالىباەۆ مۇناي قورىنىڭ سارقىلۋى سالدارىنان مۇناي ءوندىرۋ كولەمىنىڭ كەمۋىنىڭ ورنىن تولتىرۋ ءۇشىن سەيسميكالىق بارلاۋ جانە گاز قورلارىن يگەرۋ جۇمىستارى قولعا الىنعانىن حابارلادى.
«ينۆەستورلارمەن جۇمىس قارقىن الىپ كەلەدى. ءسىز جۇكتەگەن تاپسىرماعا سايكەس, قۇنى 215 ميلليارد تەڭگەنى قۇرايتىن, قۋاتى 240 مەگاۆاتت جاڭا جىلۋ ەلەكتر ورتالىعى سالىنىپ, 2025 جىلى تاپسىرىلادى. سونىمەن قاتار جەكە ينۆەستور ەسەبىنەن 11,8 ميلليارد تەڭگەگە قىزىلوردا قالاسى اۋەجايىنىڭ جاڭا تەرمينالى 2024 جىلى حالىق يگىلىگىنە بەرىلەدى دەگەن جوسپار بار», دەدى اكىم.
وبلىس اكىمى سىرداريا وزەنىنىڭ جوعارعى اعىسىندا ورنالاسقان مەملەكەتتەر اراسىنداعى كەلىسسوزدەر ناتيجەسىندە سۋ كولەمى بىلتىرعى دەڭگەيدەن ارتقانىن جەتكىزدى. ايماقتا سۋدى از قاجەت ەتەتىن مايلى جانە جەمدىك داقىلدار القاپتارىن ۇلعايتۋعا باسىمدىق بەرىلىپ, باقشا جانە كوكونىس القاپتارىنىڭ كولەمى كوبەيگەن. ونىڭ ايتۋىنشا, وڭىردە كۇرىش سالاسىن دامىتۋدىڭ جاڭا باعدارلاماسى ازىرلەنەدى.
مەملەكەت باسشىسى وڭىردەگى ەڭبەك داۋلارىن شەشۋ ماسەلەسىنە نازار اۋداردى. ايماقتاعى ءىرى 49 كاسىپورىنمەن مەموراندۋمعا قول قويىلدى. الداعى ۋاقىتتا قىزمەتكەرلەردىڭ ەڭبەكاقىسىن كەزەڭ-كەزەڭىمەن ارتتىرۋ كوزدەلگەن.
ايتا كەتسەك, بيىل وبلىستا 9 مەكتەپ, 1 وقۋشىلار ءۇيى, 2 بالاباقشا پايدالانۋعا بەرىلىپ, 11 دەنە شىنىقتىرۋ كەشەنى, 6 مادەني نىساننىڭ قۇرىلىسى ءجۇرىپ جاتىر.
قاسىم-جومارت توقاەۆ وبلىس اكىمىنە وڭىردەگى تۇراقتى الەۋمەتتىك-ەكونوميكالىق دامۋدى قامتاماسىز ەتۋدى تاپسىردى.
