ءمامس جۇيەسىن ەنگىزۋ مەديتسينالىق كومەكتى قارجىلاندىرۋ كولەمىن ەكى ەسە ارتتىرۋعا مۇمكىندىك بەردى. 2022 جىلى تمككك جانە ءمامس پاكەتتەرىن قامتاماسىز ەتۋگە 2 ترلن-نان استام تەڭگە باعىتتالدى. بۇل رەتتە بيىل مەديتسينالىق كومەكتى ساتىپ الۋ جوسپارىندا امبۋلاتوريالىق-ەمحانالىق جاعدايداعى كونسۋلتاتسيالىق-دياگنوستيكالىق قىزمەتتەرگە قارجىلاندىرۋدى وتكەن جىلعى 186 ملرد تەڭگەدەن 283 ملرد تەڭگەگە دەيىن ۇلعايتۋ كوزدەلگەن.
4 ايدا بەيىندى مامانداردىڭ 54,6 ملن كونسۋلتاتسياسى مەن دياگنوستيكالىق زەرتتەۋلەرى 97 ملرد تەڭگە سوماسىنا كورسەتىلدى. ونىڭ ىشىندە قىمبات تەكسەرۋلەر (كت, مرت, پەت) بويىنشا 510 مىڭنان استام قىزمەت كورسەتىلدى.
«پاتسيەنتتەردىڭ كونسۋلتاتسيالىق-دياگنوستيكالىق قىزمەتتەردى الۋ كەزىندەگى ماسەلەسى – بەيىندى مامانداردىڭ قابىلداۋىن كۇتۋ, دياگنوستيكا مەن تالداۋعا جىبەرۋ ۇزاقتىعى. جوسپارلى مەديتسينالىق كومەك پاتسيەنتتىڭ ومىرىنە قاۋىپ توندىرمەيتىن اۋرۋلار مەن جاعدايلار كەزىندە كورسەتىلەتىنىنە جانە ءسال كەيىنگە قالدىرۋ پاتسيەنتتىڭ جاي-كۇيىنىڭ ناشارلاۋىنا اكەپ سوقپايتىنىنا قاراماستان, پاتسيەنت كونسۋلتاتسيالىق نەمەسە دياگنوستيكالىق قىزمەتتى 10 كۇننەن ارتىق كۇتپەۋگە ءتيىس. بۇل مونيتورينگ ەرەجەلەرىمەن بەكىتىلگەن. مەديتسينالىق ساقتاندىرۋ قورىمەن شارت جاساي وتىرىپ, مەديتسينالىق قىزمەتتەردى كورسەتەتىندەر تولىق كولەمدە تيەسىلى كومەكتى ۇسىنۋعا مىندەتتەمە الادى جانە بۇل كومەكتىڭ قولجەتىمدىلىگى مەن ساپاسى جاۋاپتى بولادى», دەدى الەۋمەتتىك مەديتسينالىق ساقتاندىرۋ قورىنىڭ مەديتسينالىق كومەكتىڭ ساپاسىن باعالاۋ دەپارتامەنتىنىڭ ديرەكتورى لاززات شومانوۆا.
ەگەر مەديتسينالىق ۇيىمدا بەكىتىلگەن حالىققا دەربەس جانە ۋاقتىلى مەديتسينالىق قىزمەت كورسەتۋ مۇمكىندىگى بولماسا, ول قوردىڭ باسقا دا قىزمەت كورسەتۋشىلەرى قاتارىنان بىرلەسىپ ورىنداۋشىنى تارتۋعا مىندەتتى. بۇگىنگى تاڭدا بازادا 2 مىڭنان استام الەۋەتتى ورىنداۋشىلار بار.
قارجىلاندىرۋدىڭ ايتارلىقتاي ءوسۋى ەسەبىنەن جۇيەگە جاڭا مەديتسينالىق قىزمەت كورسەتۋشىلەردىڭ كەلۋى قامتاماسىز ەتىلەدى. قورمەن شارت جاساسقان 1 426 مەديتسينالىق ۇيىمنىڭ 744-ءى (52%) – جەكەمەنشىك نىسانىنداعى كلينيكالار.
