الدىمەن بۇگىنگى الەۋمەت ارداقتاعان ارقالى اقىن تۋرالى ءبىر اۋىز ءسوز ايتا كەتكەنىمىز ءجون بولار. مۇسا جالەل 1906 جىلدىڭ 2 اقپانىندا ورىنبور گۋبەرنياسىنىڭ مۇستافينو سەلوسىندا تۋعان. 1917-1919 جىلدارى بۇرق-سارق ەتكەن رەۆوليۋتسيا جاس مۇساعا, ونىڭ دۇنيەتانىمىنا, ومىرگە دەگەن كوزقاراسىنا ايرىقشا اسەر ەتسە كەرەك. سول جىلدارى ادەبيەت الەمىنىڭ تابالدىرىعىن اتتاعان جاس اقىننىڭ قالامىنان تۋعان جالىندى جىرلار ۋاقىت وتە كەلە تاتار ادەبيەتىنىڭ شوقتىقتى تۋىندىلارى ساناتىنا ەنگەن. ۇتىمدىسى سول, اقىن ادال ەڭبەك پەن شىنايى قۋانىشتى, ءمولدىر ماحاببات پەن قايتپاس قايسار ەرلىكتى جىرلاعان. ونىڭ شىعارماشىلىعىندا وتتاي ىستىق وتاندى ءسۇيۋ سەزىمى شۇپىلدەپ تۇر. سوعىس كەزىندە وتان قورعاۋ يدەياسىن ناسيحاتتاپ, جالپى, مىنا ومىردەگى ادامدىق پەن جاۋىزدىقتىڭ, ىزگىلىك پەن تاعىلىقتىڭ الما-كەزەك استاسىپ, تايتالاسىپ جاتقان سۇراپىل كورىنىسىن كوز الدىڭا اكەلەتىن, ءمولدىر جىرلارىن وقىعاندا جۇرەك شىمىرلاتار اسەر بەرەتىنى بار.
ەسكەرتكىشتىڭ اشىلۋ سالتاناتىندا وبلىس اكىمىنىڭ ورىنباسارى ەلدوس رامازانوۆ ەل قورعاعان ەسىل ەردىڭ ولمەس ءسوزى كەيىنگى ۇرپاقتىڭ رۋحاني الەمىن بايىتۋعا سەپتىگىن تيگىزىپ جاتقانىنا توقتالا كەلىپ, وسى ءبىر التىن تامىرلى دوستىقتىڭ ارقاۋ ءجىبى بۇگىن دە بەكي تۇسەتىنىن ايتىپ ءوتتى. سالتاناتتى ساتكە ادەيى كەلگەن تاتارستان رەسپۋبليكاسى پرەمەر-ءمينيسترىنىڭ ورىنباسارى ۆاسيل شايحرازيەۆ, قازاقستان حالقى اسسامبلەياسى توراعاسىنىڭ ورىنباسارى تاۋفيك كاريموۆ, وبلىستىق «ۆايناح» شەشەن-ينگۋش ەتنو-مادەني قوعامىنىڭ باسشىسى گەريحان يانديەۆ, كوكشەتاۋ قالالىق ارداگەرلەر كەڭەسىنىڭ توراعاسى شياپ اليەۆتەر قازاق-تاتار جۇرتشىلىعىنىڭ ەجەلدەن تىلەگى ءبىر, نيەتى ورتاق ەل ەكەنىنە باسا توقتالىپ, ۇلتتار مەن ۇلىستار اراسىنداعى سۇتتەي ۇيىعان بىرلىكتىڭ ءدال وسىنداي ءبىر-ءبىرىنىڭ اسىلدارىن ارداقتاپ, قۇرمەتتەي بىلگەندە عانا بەكي تۇسەتىنىن ايتىپ ءوتتى. شىنىندا دا, وتتى جىرىمەن ورتاق اسپاندى نۇرلاندىرىپ, دوستىق الىپ بايتەرەكتىڭ تامىرىنا اتالى ءسوز, جالىندى جىرىمەن ءنار قۇيعان ەسىل ەرلەردىڭ ەستى ەستەلىككە اينالعان بەدەرلى بەينەسىنىڭ ءوزى بۇگىنگى ۇرپاعىن ءتىل تابىسىپ, بەرىشتەي بەكەم ءبىرتۇتاس بولۋعا شاقىرىپ تۇرعانداي ەمەس پە؟!
ەسكەرتكىش الدىندا مۇسا جالەلدىڭ جالىندى جىرلارى وقىلىپ, كوگىلدىر كوكشە اسپانىندا ۇلى دوستىقتىڭ نۇر شۋاعى سەبەزگىلەپ تۇردى.
كوكشەتاۋ
