قازاقستاندا ماۋسىمنان الكوگول يمپورتىنا ۋاقىتشا تىيىم سالىنادى

استانا. 12 مامىر. قازاقستاننىڭ تۇتىنۋشىلاردىڭ قۇقىقتارىن قورعاۋ اگەنتتىگى 2014 جىلدىڭ 1 ماۋسىمىنان باستاپ ەل اۋماعىنا ىشىمدىك ونىمدەرىن اكەلۋگە جانە ساتۋعا ۋاقىتشا تىيىم سالادى. بۇل تۋرالى ۆەدومستۆونىڭ ءباسپاسوز قىزمەتى حابارلادى. «مۇنداي شارا قابىلداۋعا قازاقستاننىڭ تۇتىنۋشىلار نارىعىندا يتاليا, فرانتسيا, شوتلانديا, رەسەي, بەلارۋسيادا جانە باسقا دا كوپتەگەن ەلدەردە شىعارىلعان جانە ۇلتتىق زاڭنامانىڭ تالاپتارى مەن كەدەن وداعىنىڭ تەحنيكالىق رەگلامەنتىندە بەلگىلەنگەن تالاپتاردى بۇزا وتىرىپ, ساتىلاتىن الكوگول ونىمدەرىنىڭ ەلىمىزدە كوپتەپ تارالۋى سەبەپ», - دەلىنگەن حابارلامادا. بۇل ەلدەگى الكوگول ونىمدەرىن شىعارۋشىلار زات تاڭباسىندا 18 جاسقا دەيىنگى تۇلعالارعا تۇتىنۋعا قويىلعان شەكتەۋدە ىشىمدىكتىڭ دەنساۋلىققا تيگىزەر زيانىن دۇرىس كورسەتپەگەن. سونىمەن قاتار, زاتتاڭباسىندا ءونىمدى شىعارۋشىنىڭ اتاۋى, ورنالاسقان جەرى نەمەسە الكوگولدىك ءونىمدى يمپورتتاۋشىنىڭ مەكەن-جايى كورسەتىلمەگەن; ىشىمدىكتىڭ قۇرامى جازىلعان قاعازداعى تاڭبالار انىق كورىنبەيدى. بۇعان قوسا, مەملەكەتتىك تىلدەگى اقپارات جوق نەمەسە تولىق ەمەس. مۇرات ايتقوجا. دەرەككوز: قازاقستاننىڭ تۇتىنۋشىلاردىڭ قۇقىقتارىن قورعاۋ اگەنتتىگى. فوتو: gotovbsam.ru.