وسكەمەندەگى تاسىمالداۋشى كومپانيا جولاقىنى كوتەرۋدى تالاپ ەتتى

وسكەمەن. 12 مامىر. بۇگىن تاڭەرتەڭ وسكەمەندىكتەر جۇمىسقا جەتە الماي, ايالدامالاردا اۆتوبۋستاردى ساعاتتاپ كۇتىپ قالدى. بۇعان ءبىر تاسىمالداۋشى كومپانيانىڭ ءوز كولىكتەرىن مارشرۋتقا شىعارماي قويعانى سەبەپ بولدى. بۇل تۋرالى Egemen.kz ءتىلشىسى حابارلادى. وسىنىڭ سالدارىنان تاڭەرتەڭ جولاۋشىلاردىڭ قاتارى سيرەگەن كولىكتەر سالونىنا سىيماي قالۋ وقيعالارى تۋىندادى. سوڭىنان بەلگىلى بولعانداي, قالاداعى ءىرى جولاۋشى تاسىمالداۋشى «روست» جشس تاسىمالداۋ باعىتتارىنا 200 دانا كولىكتى شىعارماي, تەك جۇمىسقا بارۋ جانە قايتۋ ۋاقىتتارىندا عانا قىزمەت كورسەتەتىنىن مالىمدەگەن ەكەن. ول تاڭعى 6.00 مەن 10.00 جانە 15.00 پەن 21.00 ساعاتتار ارالىعىندا عانا قىزمەت كورسەتۋدى ۇيعارىپ, وسىعان بايلانىستى تالاپ-تىلەكتەرىن حاتىن قالا اكىمدىگىنە جولداپتى.

قالا باسشىلىعى ءوز كەزەگىندە اتالعان حاتتى كومپانيا ارەكەتىنە قۇقىقتىق باعا بەرۋ ءۇشىن پروكۋراتۋراعا جولدادى. ال وسكەمەن قالاسى اكىمىنىڭ ورىنباسارى ماقسۇت يساحوۆ وبلىستىق اقپارات ورتالىعىندا بريفينگ وتكىزىپ, ماسەلەنىڭ سەبەبى قالا اكىمدىگى مەن تاسىمالداۋشى كومپانيانىڭ جولاقى قۇنىن 75 تەڭگەگە كوتەرۋ توڭىرەگىندە مامىلەگە كەلە الماي جاتقانىندا ەكەنىن ايتتى. ەسكە سالا كەتەيىك, بۇعان دەيىن دە جولاقى قۇنىن كوتەرۋدى تالاپ ەتكەن جولاۋشى تاسىمالداۋشىلاردىڭ ءوتىنىشىن قالا بيلىگى قاناعاتتاندىرماعان ەدى. «ءبىز اۆتوتاسىمالداۋشىلاردىڭ جاعدايىن جانە ولاردىڭ ءتاريفتى كوتەرۋ تالابىنىڭ نەگىزىن جاقسى تۇسىنەمىز. دەگەنمەن, ءبىز قالا تۇرعىندارىنىڭ دا جاعدايىن ويلايمىز. كوپتەگەن وتباسىلاردىڭ مۇشەلەرى قوعامدىق كولىكتى پايدالانادى. ولارعا باعانىڭ كوتەرىلۋى اۋىر تيەدى», – دەدى قالا اكىمىنىڭ ورىنباسارى. قازىرگى كەزدە قالا باسشىلىعى مەن «روست» جشس وكىلدەرى اراسىندا كەلىسسوز ءجۇرىپ جاتىر. تاعى ءبىرشاما ۋاقىتقا باعانى كوتەرمەۋ جونىندە كومپانياعا بىرنەشە ۇسىنىستار ازىرلەندى. ەرتەڭ بارلىق اۆتوبۋستار ءوز باعىتتارىنا قىزمەت كورسەتۋگە شىعادى دەپ كۇتىلۋدە. ال جولاقى قۇنىن وزگەرتۋ تۋرالى شەشىمدى قالالىق ءماسليحات دەپۋتاتتارى مامىر ايىنداعى وتىرىستا قابىلدايتىن بولادى. دۋمان اناش. دەرەككوز: Egemen.kz. فوتو: Egemen.kz, Altaynews.kz.